Rọ Abọ Sa-Sa Obe Ebaibol Wuhrẹ na Wuhrẹ Ahwo avọ Onaa

Nọ ọmọ-uwuhrẹ Ebaibol o te bi wo otoriẹ eware nọ Ebaibol na o gine wuhrẹ je bi fi ai họ iruo, ọ te jọ wọhọ ure nọ o be rro jẹ mọ ibi. (Ol. 1:​1-3) Ma sai fiobọhọ kẹ ọmọ-uwuhrẹ mai wo ẹnyaharo ẹkwoma eware sa-sa nọ e rrọ obe Ebaibol Wuhrẹ na nọ ma re fiba uwuhrẹ na.

Enọ Emuhọ: Uzoẹme kpobi u wo enọ jọ evaọ emuhọ, enọ a kiyo rai evaọ uzoẹme na. Nọ wha ti mu uwuhrẹ na họ, whọ sae nọ enọ nana ababọ uyo rai nọ wha rẹ kẹ, re ọmọ-uwuhrẹ na o rẹro iyo rai evaọ etoke uwuhrẹ na. Hayo whọ sae ta kẹe re ọ kuyo kpẹkpẹe fihọ enọ na. Otẹrọnọ ọ kuyo jọ gba ha, who du kpọe vi hi evaọ oke yena. Iyo nọ ọ kẹ na i ti fiobọhọ kẹ owhẹ riẹ eware nọ who ti ru vẹ evaọ etoke uwuhrẹ na.​—⁠Itẹ 16:23; 18:⁠13.

Eme-Ofiba: Otẹrọnọ ọmọ-uwuhrẹ na o wo otoriẹ eware nọ o bi wuhrẹ na jẹ rọwo ae, whọ sae ta kẹe re o se eme-ofiba na kẹ omobọ riẹ. Whọ sae rọ omoke jọ nọe evaọ etoke uwuhrẹ ọfa sọ o wo otoriẹ eware nọ o se evaọ eme-ofiba na. Rekọ, whọ tẹ ruẹ nọ u ti fiobọhọ kẹe, whọ sai wuhrẹ eme-ofiba na hayo abọ riẹ jọ kugbei, kẹsena whọ vẹ nọe enọ nọ whọ ruẹrẹ kpahe.

Ẹkpẹti Ọkiẹkpemu: Ẹkpẹti ọkiẹkpemu nọ ọ rrọ urere uzoẹme kpobi na o kiyo enọ obọ emuhọ na. Whọ sae rọ ẹkpẹti nana riẹ sọ ọmọ-uwuhrẹ na o wo otoriẹ igogo eware nọ o wuhrẹ na jẹ sae rọ eme obọriẹ ta ae. Wha se eme nọ e rrọ ẹkpẹti na ọvuọvo do via je se eria Ebaibol nọ i lele i rie na. Kẹsena whọ vẹ ta kẹ ọmọ-uwuhrẹ na re ọ rọ eria Ebaibol na dhesẹ oware nọ ọ rọ rọwo nọ eme nọ wha se do via na uzẹme.​—⁠Iruẹru 17:​2, 3.