UZUAZỌ OLELEIKRISTI

Salọ Emamọ Eware Ẹkeriotọ

Fikieme u ro woma re ma salọ emamọ eware ẹkeriotọ? Nọ ma tẹ be salọ ifimu nọ ma re riwi, ole nọ ma re kporo, oria itanẹte nọ ma re kpohọ, obe nọ ma re se, hayo igemu nọ ma rẹ fa, yọ ma be salọ eware nọ ma te hai roro kpahe. Oware kpobi nọ ma salọ u re kpomahọ omai. U yoma kẹhẹ, eware iyoma nọ Jihova o mukpahe eye e mae rrọ eware ẹkeriotọ buobu nẹnẹ. (Ol 11:5; Gal 5:19-21) Fiki onana, Ebaibol na ọ vẹvẹ omai unu nọ ma muẹrohọ eware nọ e mae roja.—Fil 4:8.

WHA RRI IVIDIO NA OGHẸRẸ EWARE ẸKERIOTỌ VẸ MẸ RẸ SALỌ? KẸSENA WHA VẸ KIYO ENỌ NANA:

Ẹvẹ erozaha ahwo Rom oke anwae nọ a jẹ hai ro lele ahwo gbe erao họre e rọ wọhọ erọ igemu gbe ifimu inẹnẹ?
Oghẹrẹ vẹ inievo ukoko na a sai ro fiobọhọ kẹ emaha na re a salọ emamọ eware ẹkeriotọ?
Ẹvẹ obe Ahwo Rom 12:9 u re ro fiobọhọ kẹ omai evaọ eware ẹkeriotọ nọ ma rẹ salọ?
Emamọ eware ẹkeriotọ vẹ a rẹ jọ oborai ru?

ENỌ WHO RE RRI MANIKỌ ENỌ WHẸ ỌVO WHO RE RU?

O be mae were ahwo buobu nẹnẹ re a keria totọ gaviezọ kẹ hayo rri eware nọ amọfa a ru vi ukpenọ ae ọvo a re ru eware na. Eware nọ e rrọ iroro ahwo eye a bi ro kere ebe, ru ifimu, gbe eware nọ a bi dhesẹ evaọ etẹlẹvisiọno orọnikọ enọ e rrọ iroro ra ha. Dede nọ o thọ re ma rri eware nọ amọfa a ru hu, ahwo buobu a ruẹ no inọ eware ẹkeriotọ nọ ae ọvo a rọ obọ rai ru e rẹ mai woma. Wọhọ oriruo, o rẹ were ahwo jọ re a kporo okwakwa ile jọ hayo drọ eware. Eware nọ e rẹ were amọfa họ, ebọro nọ a rẹ fa, ohrẹ-odhẹ, ile nọ a re gbe hayo so, gbe eware itieye na efa. Oghẹrẹ eware ẹkeriotọ kpobi nọ ma salọ kẹhẹ, joma “ru eware kpobi rọ kẹ Ọghẹnẹ oruaro.”—1Kọ 10:31.