UZUAZỌ OLELEIKRISTI
Whai Esẹgbini, Wha Wuhrẹ Emọ Rai Eware nọ U Fo nọ A rẹ Riẹ
Ma be rria akpọ nọ ahwo a bi jo ru eware nọ e rẹ sae lẹliẹ omai roro nọ ewoma yọ eyoma, eyoma o tẹ rrọ ewoma. (Aiz 5:20) Ahwo jọ a re ru eware nọ Jihova o mukpahe, eware wọhọ, uruemu otọtọ nọ ezae i re ro lele ezae wezẹ hayo eyae i re ro lele eyae wezẹ. Ibe emọ-isukulu gbe amọfa a rẹ gwọlọ bẹbẹ emaha na họ re a rọ aro kele ai ru eware nọ a bi ru. Ẹvẹ whọ sai ro fiobọhọ kẹ emọ ra re a sai fi odawọ nana gbe efa kparobọ?
Wuhrẹ emọ ra re a riẹ izi Jihova. (Ize 18:3) Rọ ẹmẹrera wuhrẹ ai oware nọ Ebaibol na ọ ta kpahe owezẹ ọzae-avọ-aye. Vuẹ ae oware nọ a rẹ sai wo otoriẹ riẹ lele epanọ a kpako te. (Izi 6:7) Nọ omara nọ: ‘Kọ me wuhrẹ emọ mẹ no kpahe oghẹrẹ nọ a rẹ rọ riẹ nọ ohwo o te bi dhesẹ uyoyou nọ u fo kẹ ae hayo nọ o te bi dhesẹ isiuru ọfariẹ kẹ ae? Kọ a riẹ epanọ u wuzou te re a gọ ẹgọ nọ ọ rrọ kpatiẹ? Kọ me wuhrẹ i rai epanọ a gbẹ rọ kuvẹ re amọfa a rọ ẹba rai zaharo ho no? Kọ emọ mẹ a riẹ oware nọ a re ru nọ ohwo jọ ọ tẹ gwọlọ dhesẹ ifoto-ẹbẹba kẹ ai hayo ta kẹ ai nọ a ru oware nọ Jihova o mukpahe?’ Nọ emọ ra a tẹ riẹ eware nana, u re fiobọhọ kẹ ae whaha ebẹbẹ buobu. (Itẹ 27:12; Ọt 7:12) Nọ who te bi wuhrẹ emọ ra, yọ who bi dhesẹ nọ who rri ukuoriọ nọ Jihova ọ kẹ owhẹ na ghaghae.—Ol 127:3.
WHA RRI IVIDIO NA BỌ UWOU NỌ O RẸ TỌ—THỌ EMỌ RA NO “OWARE UYOMA,” KẸSENA WHA VẸ KIYO ENỌ NANA:
Fikieme ahwo jọ a gbẹ rọ kaki wuhrẹ emọ rai kpahe owezẹ ọzae-avọ-aye he?
Fikieme o rọ gwọlọ nọ esẹgbini a rọ “ọwhọkuo gbe ehrẹ Jihova” yọrọ emọ rai?—Ẹf 6:4
Areghẹ ọ rẹ thọ ohwo
Eware jọ vẹ ukoko Jihova u ru no re u fiobọhọ kẹ esẹgbini wuhrẹ emọ rai kpahe owezẹ ọzae-avọ-aye?—w19.05 12, ẹkpẹti
Fikieme u ro fo re whọ hai lele emọ ra ta ẹme ẹsikpobi taure ẹbẹbẹ ọ tẹ te romavia?