Sẹro Orọo Ra

Jihova o se eyaa orọo gboja gaga, o re rri rie jeve jeve he. Ọ ta nọ ọzae avọ aye a rẹ talamu ohwohwo. (Mt 19:5, 6) Ma rẹ jọ udevie idibo Ọghẹnẹ ruẹ emamọ iriruo buobu erọ ahwo nọ a rọo no nọ a bi wo evawere evaọ orọo rai. O make rrọ ere na, orọo ọvuọvo ọ kare ẹbẹbẹ hẹ. Ebẹbẹ e rẹ romavia. Nọ ọzae-avọ-aye a te bi wo ebẹbẹ evaọ orọo rai, u fo nọ ma rẹ whaha eriwo akpọ na inọ, nọ ohwo ọ tẹ fa orọo hayo hẹriẹ no ọzae hayo aye riẹ họ oware nọ u re ku ebẹbẹ na họ. Eme Ileleikristi nọ e rọo no a re ru re a sae sẹro orọo rai?

Roro kpahe eware isoi jọ nọ i wuzou gaga.

1. Sẹro udu ra ẹkwoma eware nana nọ whọ rẹ whaha, ighe gbe arozaha ọfariẹ-ogbe, gbe isiuru obẹlẹ nọ who re dhesẹ kẹ ohwo nọ ọ rrọ ọzae hayo aye ra ha, keme eware enana e rẹ raha orọo.—Mt 5:28; 2Pi 2:14.

2. Ru usu nọ who wo kugbe Ọghẹnẹ ga viere, re whọ jẹ gbaemu nọ who re ru oware nọ o rẹ were iẹe evaọ orọo ra.​—Ol 97:10.

3. Gbẹ hae whẹ uruemu okpokpọ na họ oma, re whọ hai je ru emeware esese jọ enọ e rẹ lẹliẹ eva were ọzae hayo aye ra.​—Kọl 3:8-10, 12-14.

4. Wha hae ta ẹme kugbe ẹsikpobi avọ adhẹẹ.​—Kọl 4:6.

5. Ru ẹgwọlọ ọzae ra hayo orọ aye ra kẹe avọ uyoyou.​—1Kọ 7:3, 4; 10:24.

Nọ Ileleikristi a tẹ be rọ ọghọ kẹ orọo, koyehọ a be rọ ọghọ kẹ Jihova, Ọnọ ọ to orọo họ na.

WHA RRI IVIDIO NA MA RẸ RỌ “ITHIHAKỌ DHẸ OHRẸ” NA HRỌ​—RU LELE IZI OHRẸ-ODHẸ NA, KẸSENA WHA VẸ KIYO ENỌ NANA:

• 

  Dede nọ ọzae avọ aye a tẹ ruọ orọo obọ eware e rẹ riẹ nya ziezi, ebẹbẹ jọ vẹ e rẹ sae romavia?

• 

  Oghẹrẹ vẹ ehri-izi Ebaibol e sai ro fiobọhọ kẹ ahwo nọ a roro nọ uyoyou o rrọ orọo rai hi?

• 

  Izi vẹ Jihova o fihọ nọ a re lele evaọ orọo?

• Re orọo o sai wo evawere, eme o gbahọ nọ ọzae avọ aye na a re ru?