EWARE AGHAE NỌ E RRỌ EBAIBOL NA

Rọ Udu Ra Kpobi Nya Lele Jihova

Kelẹb ọ rọ udu riẹ kpobi nya lele Jihova no oke uzoge riẹ ze (Jos 14:7, 8)

Dede nọ Kelẹb ọ kpako no, o gbe fievahọ Jihova inọ o ti fiobọhọ kẹe ru iruo nọ e rrọ gaga (Jos 14:10-12; w04 12/1 7 ¶2)

Jihova ọ ghale Kelẹb fikinọ ọ rọ udu riẹ kpobi gọe (Jos 14:13, 14; w06 10/1 18 ¶11)

Iwoho na: Oniọvo-ọmọtẹ jọ nọ ọ gọ Jihova kri no nọ owho o be kẹ uye. 1. Ọ keria be lẹ yọ o kru ubiọkpọ họ obọ. 2. Avọ oniọvo-ọmọtẹ ọfa nọ ọ gbẹ maha a rrọ usi uwoma ota ẹgbede. 3. O bi dhesẹ ifoto kẹ emaha nọ a gbẹ rrọ ukoko. 4. Ovao riẹ o rrọ ohwohwẹ.

Fikinọ Kelẹb o je ru lele ẹme nọ Jihova ọ ta, u ru nọ ẹrọwọ riẹ o rọ jọ gaga, yọ Jihova ọ ghale riẹ. Epọvo na re, nọ ma tẹ ruẹ epanọ Jihova ọ be rọ kuyo elẹ mai je bi fiobọhọ kẹ omai evaọ idhere sa-sa, o rẹ bọ ẹrọwọ mai ga.—1Jọ 5:14, 15.