UZUAZỌ OLELEIKRISTI
Daoma Riẹ Oghẹrẹ nọ Ọghẹnẹ O re Rri Eware
Ma gwọlọ nọ oware kpobi nọ ma bi ru o rẹ were Jihova. (Itẹ 27:11) Re ma sai ru onana, o gwọlọ nọ iroro kpobi nọ ma be jẹ e rẹ rọwokugbe oreva Ọghẹnẹ o tẹ make rọnọ Ọghẹnẹ o jie uzi ovo gbiae kpahe ẹme na ha. Eme ọ rẹ sai fiobọhọ kẹ omai jiroro nọ e rẹ were iẹe?
Fi oke họ nọ who re ro wuhrẹ Ebaibol na kẹse kẹse. Ẹsikpobi nọ ma te se Ebaibol na, o rẹ wọhọ ẹsenọ ma rrọ kugbe Jihova bi wuhrẹ mi ei. Ma sae riẹ oghẹrẹ nọ Jihova o re rri eware nọ ma te rri oghẹrẹ nọ o ro yerikugbe idibo riẹ evaọ oke nọ u kpemu, je roro kpahe iriruo ahwo nọ a ru eware nọ e were riẹ gbe enọ e dha riẹ eva. Kẹsena nọ ma jẹ be jiroro, ẹzi ọfuafo na o ve fiobọhọ kẹ omai kareghẹhọ eware nọ ma wuhrẹ no ẹme Ọghẹnẹ ze.—Jọ 14:26.
Ru ekiakiẹ. Nọ whọ tẹ gwọlọ jiroro jọ, nọ omara nọ, ‘Eria Ebaibol vẹ hayo iku Ebaibol vẹ e rẹ sai fiobọhọ kẹ omẹ riẹ oghẹrẹ nọ Jihova o rri oware nọ mẹ be jiroro kpahe na?’ Lẹ se Jihova re o fiobọhọ kẹ owhẹ, re whọ jẹ rehọ ebe ukoko na gbe eware efa nọ ukoko na u ru no, nọ wha wo evaọ ẹvẹrẹ rai ru ekiakiẹ. Onana u ti ru nọ whọ te rọ ruẹ ehrẹ Ebaibol nọ e rẹ sai fiobọhọ kẹ owhẹ jẹ emamọ iroro.—Ol 25:4.
WHA RRI IVIDIO NA MA RẸ RỌ “ITHIHAKỌ DHẸ OHRẸ” NA HRỌ—RE EMAMỌ EMU, KẸSENA WHA VẸ KIYO ENỌ NANA:
Ebẹbẹ vẹ oniọvo-ọmọtẹ nọ ma ruẹ evaọ ividio na ọ jẹ rẹriẹ ovao dhe evaọ obọ isukulu?
Who te wo oghẹrẹ ebẹbẹ itieye, ẹvẹ whọ sai ro ru ekiakiẹ re whọ riẹ oware nọ who re ru?
Irere vẹ i re te omai nọ ma tẹ be hae romatotọ ru ekiakiẹ je ru uwuhrẹ omobọ mai nọ ma tẹ be jiroro?—Hib 5:13, 14