Ma You Jihova Ọsẹ Mai Gaga

1-2. Fikieme Jihova o ro ru re ma jọ ahwo uviuwou riẹ, kọ oghẹrẹ vẹ o ro ru ei?

JIHOVA o zizie omai re ma jọ usu ahwo uviuwou riẹ nọ e be gọe. A rẹ ruẹ obọ uvẹ-ọghọ riẹ hẹ. Ahwo kpobi nọ a rrọ uviuwou nana a roma mudhe kẹ Ọghẹnẹ no, a te je fi ẹrọwọ họ idhe ẹtanigbo Jesu. Ma be wereva evaọ uviuwou nana. Ma bi yeri emamọ uzuazọ enẹna, ma te je wo obọdẹ ẹruore uzuazọ ebẹdẹ bẹdẹ evaọ obọ odhiwu hayo Aparadase otọakpọ.

² Jihova o ru ọruẹrẹfihotọ nọ ma rọ rrọ usu ahwo uviuwou riẹ fikinọ o you omai gaga. Yọ onana o rehọ oware ulogbo jọ mi ei. (Jọn 3:16) Ọ “hwa osa rọ dẹ” omai. (1 Kọr. 6:20) Jihova ọ rọ idhe ẹtanigbo Jesu ru ei lọhọ nọ ma re ro wo usu okpekpe kugbei. Ma wo uvẹ-ọghọ nọ ma bi ro se Ọnọ ọ mae rro evaọ ehrugbakpọ na Ọsẹ mai. Wọhọ epanọ ma wuhrẹ evaọ uzoẹme nọ o vrẹ na, Jihova họ Ọsẹ nọ ọ mai woma.

3. Onọ vẹ ma rẹ sae nọ? (Rri ẹkpẹti na re, “Kọ Jihova O bi Muẹrohọ Omẹ?”)

³ Ma sae nọ onọ nọ ọso-ilezi jọ ọ nọ, inọ: “Eme mẹ te rọ hwosa kẹ Jihova rọkẹ eware iwoma kpobi nọ o ru kẹ omẹ no?” (Ol. 116:12) Uyo onọ na họ, ma sae hwosa eware nọ Ọsẹ obọ odhiwu mai o bi ru kẹ omai zihe vievie he. Ghele na, ma sai you rie wọhọ epanọ o you omai na. Jọn ukọ na o kere nọ: “Ma wo uyoyou keme ọye ọ kaki you omai.” (1 Jọn 4:19) Idhere vẹ ma sai ro dhesẹ nọ ma you Ọsẹ obọ odhiwu mai?

SI KẸLE JIHOVA

4. Wọhọ epanọ o rrọ Jemis 4:8, fikieme ma rẹ rọ daoma si kẹle Jihova?

⁴ Jihova ọ gwọlọ nọ ma si kẹle iẹe, re ma hae jẹ lẹ sei. (Se Jemis 4:8.) Ọ tuduhọ omai awọ nọ ma “ruabọhọ olẹ,” yọ ọ rẹ gaviezọ kẹ omai ẹsikpobi. (Rom 12:12) Eware i re bu ei abọ hrọ họ hayo oma o rẹ rrọe no ho, nọ ọ gbẹ rọ gaviezọ kẹ omai hi. Mai omamai ma rẹ gaviezọ kẹe nọ ma tẹ be hai se Ebaibol na, gbe ebe ukoko na nọ i re fiobọhọ kẹ omai wo otoriẹ Ebaibol na. Ma tẹ be hae gaviezọ ziezi evaọ iwuhrẹ ukoko yọ ma be gaviezọ kẹe re. Wọhọ epanọ usu ọsẹ avọ ọmọ o rẹ kpekpe nọ a tẹ be hae ta ẹme kugbe na, ere usu mai avọ Jihova o rẹ kpekpe nọ ma tẹ be hae lẹ sei je se Ebaibol na.

5. Ẹvẹ ma sae rọ lẹ elẹ nọ i re no udu ze?

⁵ Roro kpahe oghẹrẹ nọ elẹ ra e be hae jọ. Jihova ọ gwọlọ nọ ma hae ta eva mai kpobi kẹe nọ ma tẹ be lẹ sei. (Ol. 62:8) U fo nọ ma rẹ nọ omamai onọ nana: ‘Kọ eme evona mẹ be hai dhe ẹwẹwariẹ evaọ elẹ mẹ wọhọ ẹsenọ me bi se ai no obe ze, manikọ e be hai no omẹ udu ze?’ Ababọ avro, who you Jihova gaga, yọ whọ gwọlọ ru oware nọ usu ra kugbei o rẹ rọ ga. Re usu rai o sae kpekpe, u fo nọ whọ rẹ lẹ sei ẹsikpobi. Horie eva ra kpobi kẹe. Vuẹe eware nọ e be kẹ owhẹ uye gbe enọ i bi ru eva were owhẹ. Jọ u mu owhẹ ẹro nọ whọ rẹ sae lẹ sei ẹsikpobi re o fiobọhọ kẹ owhẹ.

6. Eme ma re ru re usu mai kugbe Jihova o kpekpe ziezi?

⁶ Re usu mai kugbe Jihova o kpekpe ziezi, o gwọlọ nọ ma re dhesẹ edẹro ẹsikpobi. Ma rọwokugbe ọso-ilezi na, nọ ọ ta nọ: “Eware nọ who ru no i bu kẹhẹ, O Jihova Ọghẹnẹ mẹ, iruo igbunu ra avọ iroro nọ who wo kpahe omai. Ọvuọvo ọ rrọ nọ a sae rọ wawo owhẹ hẹ; mẹ tẹ make daoma re mẹ ta kpahe ae je gbiku rai dede, i bu vi eware nọ mẹ rẹ sai kele!” (Ol. 40:5) Orọnikọ ma re wo edẹro kẹ eware nọ Jihova o ru kẹ omai ọvo ho, ma rẹ daoma rọ ẹmeunu gbe uruemu mai dhesẹ edẹro na via. Onana u re dhesẹ nọ ma wo ohẹriẹ no ahwo-akpọ buobu nẹnẹ. Evaọ akpọ na, ahwo buobu a bi dhesẹ edẹro kẹ eware kpobi nọ Ọghẹnẹ o bi ru kẹ ae he. Ahwo a “kare uyere-ọghọ,” oka jọ nọ u bi dhesẹ nọ “edẹ urere” na ma rrọ na. (2 Tim. 3:1, 2) Ajọ ma wo oghẹrẹ uruemu nana vievie he!

7. Eme Jihova ọ gwọlọ mi omai emọ riẹ, kọ fikieme?

⁷ Esẹgbini a rẹ gwọlọ nọ emọ rai a jọ ọvo ukpenọ a rẹ whọ kuoma. Epọvo na re, Jihova ọ gwọlọ nọ mai emọ riẹ ma rẹ rria dhedhẹ kugbe ohwohwo avọ evawere. Uyoyou nọ ma wo kẹ ohwohwo, oye u re dhesẹ nọ mai yọ Ileleikristi uzẹme. (Jọn 13:35) Ma rọwokugbe ọso-ilezi na nọ o kere nọ: “U woma jẹ were kẹhẹ re inievo e rria kugbe evaọ okugbe!” (Ol. 133:1) Ma te you ibe Ileleikristi mai, yọ ma bi dhesẹ kẹ Jihova nọ ma you rie. (1 Jọn 4:20) U woma kẹhẹ nọ ma rọ rrọ usu inievo nọ i bi “dhesẹ uwowou kẹ ohwohwo, [je] wo uvi ọdawẹ”!​—Ẹf. 4:32.

RỌ ẸMEOYO DHESẸ NỌ WHO YOU JIHOVA

8. Wọhọ epanọ o rrọ 1 Jọn 5:3, eme o rẹ mae wọ omai yoẹme kẹ Jihova?

⁸ Jihova ọ gwọlọ nọ emọ i re yoẹme kẹ esẹgbini rai, yọ ere ọvona ọ gwọlọ nọ ma re yoẹme kẹe. (Ẹf. 6:1) O te ọnọ ma re yoẹme kẹ keme ọye họ Ọnọ ọ ma omai, Ọnọ ọ be sẹro uzuazọ mai, ọ tẹ jẹ rrọ Ọsẹ nọ ọ mai wo areghẹ. Rekọ oware nọ o rẹ mae wọ omai yoẹme kẹe họ, fikinọ ma you rie. (Se 1 Jọn 5:3.) Dede nọ u wo ẹjiroro buobu nọ ma re ro yoẹme kẹ Jihova, ọ rẹ gba omai họ yoẹme kẹe he. Jihova ọ kẹ omai uvẹ nọ ma rẹ rọ jiroro oware nọ ma gwọlọ ru, fikiere eva e rẹ were iẹe nọ ma tẹ jiroro nọ ma re yoẹme kẹe fikinọ ma you rie.

9-10. Fikieme u ro wuzou re ma riẹ izi Ọghẹnẹ jẹ hai koko ai?

⁹ Esẹgbini a gwọlọ nọ oware uyoma ovo o rẹ via kẹ emọ rai hi. Oyejabọ nọ a re ro fi izi họ kẹ emọ rai nọ e rẹ thọ ae. Nọ emọ na a te ru lele izi yena, yọ a bi dhesẹ nọ a fievahọ ọsẹgboni rai jẹ be kẹ ae adhẹẹ. Kọ o gbẹ tubẹ mai wuzou re ma riẹ izi Ọsẹ obọ odhiwu mai jẹ hai koko ai ẹsikpobi? Ma te bi ru ere, yọ ma bi dhesẹ kẹ Jihova nọ ma you rie jẹ be kẹe adhẹẹ. Onana o rẹ wha erere se omai re. (Aiz. 48:17, 18) Rekọ ahwo nọ a rẹ rọwo koko izi Jihova ha a rẹ wha enwoma se omobọ rai.​—Gal. 6:7, 8.

¹⁰ Ma te bi ru eware nọ e rẹ were Jihova, o rẹ thọ omai no oghẹrẹ enwoma gbe awaọruọ sa-sa, yọ usu mai kugbe Jihova o rẹ jọ ziezi ẹsikpobi. Jihova ọ riẹ oware nọ o mai woma kẹ omai. Oniọvo-ọmọtẹ jọ nọ a re se Aurora nọ ọ be rria obọ America ọ ta nọ: “Mẹ riẹ nọ ma te bi yoẹme kẹ Jihova ẹsikpobi, uzuazọ mai o rẹ jọ wowoma ziezi.” Ere o rrọ kẹ omai kpobi. Irere vẹ who wo no fikinọ who bi yoẹme kẹ Jihova?

11. Ẹvẹ olẹ u re ro fiobọhọ kẹ omai?

¹¹ Olẹ u re fiobọhọ kẹ omai yoẹme, makọ evaọ okenọ ẹmeoyo ọ rrọ bẹbẹ kẹ omai. Ẹsejọ, o sae jọ bẹbẹ re ma yoẹme kẹ Jihova fiki sebaẹgba mai, rekọ ma rẹ daoma whaha aghẹmeeyo. Ọso-ilezi na ọ lẹ Ọghẹnẹ nọ: “Fiobọhọ kẹ omẹ re mẹ rọ unevaze yoẹme kẹ owhẹ.” (Ol. 51:12) Oniọvo-ọmọtẹ nọ a re se Denise nọ ọ rrọ ọkobaro oke-kpobi, ọ ta nọ: “O tẹ rrọ bẹbẹ kẹ omẹ re me koko uzi Jihova jọ, mẹ rẹ lẹ sei re o fiobọhọ kẹ omẹ ru oware nọ u fo.” O rẹ sai mu omai ẹro nọ Jihova o re yo oghẹrẹ olẹ utioye ẹsikpobi.​—Luk 11:9-13.

FIOBỌHỌ KẸ AMỌFA YOU ỌSẸ OBỌ ODHIWU MAI

12. Wọhọ epanọ o rrọ Ahwo Ẹfisọs 5:1, eme u fo nọ ma re ru?

¹² Se Ahwo Ẹfisọs 5:1. Fikinọ mai yọ “emọ iyoyou” Jihova, ma rẹ daoma rọ aro kele iei. Wọhọ Jihova, ma re dhesẹ uyoyou, jọ wowou, jẹ rọvrẹ amọfa no eva ze. Nọ ahwo nọ a riẹ Ọghẹnẹ hẹ a te muẹrohọ emamọ uruemu mai, onana o sai ru nọ a rẹ rọ gwọlọ wuhrẹ kpahe Jihova. (1 Pita 2:12) U fo nọ esẹgbini a rẹ rọ aro kele Jihova evaọ oghẹrẹ nọ o bi ro yerikugbe emọ riẹ. Nọ a te ru ere, onana o sai ru nọ emọ rai a rẹ rọ gwọlọ mu usu okpekpe kugbe Ọsẹ oyoyou mai na.

13. Eme ma re ru re ma sai wo udu?

¹³ Ọmọ ọ rẹ rọ ọsẹ riẹ seha jẹ gwọlọ ta ẹme kpahe iẹe. Epọvo na re, ma rẹ rọ Jihova Ọsẹ obọ odhiwu mai seha, yọ ma gwọlọ nọ amọfa a riẹe. Oware nọ o rrọ omai kpobi iroro o nwane rọwokugbe ẹme nọ Devidi ovie na o kere, inọ: “Mẹ te rọ Jihova seha.” (Ol. 34:2) Kọ otẹrọnọ ma rẹ dhomovuọ hayo dhozọ? Ẹvẹ ma sai ro wo udu? Ma re wo udu nọ ma te roro kpahe epanọ eva e te were Jihova te gbe irere nọ i ti te amọfa nọ a te wuhrẹ kpahe iẹe. Jihova o ti fiobọhọ kẹ omai wo udu. O fiobọhọ kẹ Ileleikristi ikpe-udhusoi ọsosuọ wo udu, yọ o ti fiobọhọ kẹ omai re.​—1 Tẹs. 2:2.

14. Fikieme u ro wuzou re ma ta usi uwoma Uvie na?

¹⁴ Jihova o re dede oghẹrẹ ahwo kpobi rehọ, yọ eva e rẹ were iẹe nọ ọ tẹ ruẹ nọ ma bi dhesẹ uyoyou kẹ amọfa, ghelọ oria kpobi nọ a no ze kẹhẹ. (Iruẹru 10:34, 35) Edhere jọ nọ ọ mai woma nọ ma re ro dhesẹ uyoyou kẹ amọfa họ, nọ ma tẹ be hae ta usi uwoma Uvie na kẹ ae. (Mat. 28:19, 20) Irere vẹ i re no iruo nana ze? Ahwo nọ a gaviezọ kẹ omai a sai yeri emamọ uzuazọ enẹna, je wo ẹruore uzuazọ ebẹdẹ bẹdẹ evaọ Aparadase.​—1 Tim. 4:16.

YOU JIHOVA ỌSẸ MAI NA RE WHO WO EVAWERE

15-16. Fikieme eva e sae rọ were omai?

¹⁵ Jihova yọ Ọsẹ oyoyou, fikiere ọ gwọlọ nọ uviuwou riẹ o rẹ wereva. (Aiz. 65:14) U wo eware buobu nọ e be kẹ omai evawere enẹna, dede nọ ma bi wo ebẹbẹ. Wọhọ oriruo, ma riẹ nọ Ọsẹ obọ odhiwu mai o you omai gaga. Ma wo eriariẹ egbagba Ẹme Ọghẹnẹ. (Jeri. 15:16) Ma tẹ jẹ rrọ obọdẹ uviuwou nọ ahwo nọ a you Jihova a rrọ, enọ i bi koko izi riẹ, a te je you ohwohwo.​—Ol. 106:4, 5.

¹⁶ Eva e rẹ sae were omai ẹsikpobi keme ma wo uvi ẹruore inọ evaọ obaro, uzuazọ u ti woma vi enẹ. Ma riẹ nọ kẹle na Jihova ọ te raha ahwo omuomu kpobi no, ọ vẹ te rọ Uvie riẹ zihe akpọ na kpobi ruọ Aparadase. Ma te je wo obọdẹ ẹruore inọ a te kpare ahwo mai nọ i whu no ziọ uzuazọ, a vẹ te wariẹ kuomagbe omai. (Jọn 5:28, 29) Akpọ ọ te were kẹhẹ! Mai woma na, ma wo imuẹro nọ kẹle na emama kpobi evaọ odhiwu gbe otọakpọ a te kẹ Ọsẹ oyoyou mai na orro gbe ujiro nọ u fo rie, jẹ rọ eva kpobi gọe.