Jihova Ọ rẹ Sẹro Idibo Riẹ

1. Fikieme Jesu ọ rọ lẹ nọ jọ Jihova ọ sẹro ilele riẹ?

EVAỌ aso urere taure Jesu o te ti whu, ọ lẹ se Jihova Ọsẹ obọ odhiwu riẹ kpahe oware jọ. Ọ lẹ nọ jọ Jihova ọ sẹro ilele riẹ. (Jọn 17:15, 20) Jihova ọ be sẹro idibo riẹ no vẹre anwẹdẹ, yọ ọ be hae rẹrote ae jẹ thọ ae. Rekọ Jesu ọ lẹ ere keme ọ riẹ nọ Setan o ti kpokpo idibo Jihova vi epaọ anwẹdẹ. Ọ tẹ jẹ riẹ nọ Jihova o gbe fiobọhọ kẹ ilele riẹ hẹ, a te sai kru ẹrọwọ rai hi.

2. Eme Olezi 33:18-20 o ta nọ o lẹliẹ udu rrọ omai awọ?

² Ebẹbẹ buobu i bi te idibo Jihova nẹnẹ fikinọ akpọ Ẹdhọ ma rrọ. Ma gbẹ yọroma ha, ebẹbẹ na e rẹ sae lẹliẹ omai ru oware nọ o rẹ dha Jihova eva. Rekọ jọ ozọ u mu omai hi nọ ebẹbẹ i te te omai. Jihova ọ be sẹro mai, ọ be ruẹ ebẹbẹ kpobi nọ i bi te omai, ọ gwọlọ nọ o re fiobọhọ kẹ omai, yọ ere o bi gine ru. Ma te jọ uzoẹme nana ta kpahe oghẹrẹ nọ Jihova o ro fiobọhọ kẹ imava jọ nọ a gbiku rai fihọ Ebaibol. Yọ o te lẹliẹ omai ruẹ nọ Jihova o re “rri enọ e be dhozọ riẹ.”—Se Olezi 33:18-20.

NỌ OMA O TẸ RRỌ OMAI GOLI

3. Eme o rẹ sae lẹliẹ omai jọ goli hayo jọ ọkọkora ẹsejọ?

³ Dede nọ ma wo inievo buobu evaọ ukoko na, ẹsejọ oma o rẹ jọ omai goli. Wọhọ oriruo, ẹsejọ o rẹ nwane lọhọ tere he re emaha nọ e rrọ ukoko na a ta usi uwoma evaọ obọ isukulu, keme ẹsejọhọ ae ọvo họ Osẹri Jihova nọ ọ rrọ etẹe. Oma o sae jẹ jarae goli nọ ae avọ esẹgbini rai a tẹ kwa kpohọ ukoko ọfa siọ egbẹnyusu rai ba. U te no ere no, inievo jọ a rẹ jọ ọkọkora fiki eware jọ nọ e be kẹ ae uye, yọ a rẹ gwọlọ vuẹ ohwo ọvo ho. A re roro nọ a tẹ make vuẹ ohwo jọ, ohwo na ọ te riẹ epanọ oware na o be kẹ ae uye te he. A sai tube roro nọ ohwo ọvo ọ be daezọ rai hi. Oghẹrẹ oware utionana u re ru nọ udu u gbe ro te ohwo otọ họ. Rekọ Jihova ọ gwọlọ nọ udu u te omai otọ. Ẹvẹ ma rọ riẹ?

4. Fikieme Elaejah ọ rọ ta nọ: “Mẹ ọvo o kiọkọ”?

⁴ Joma ta kpahe oware nọ o via kẹ Elaejah ọruẹaro na. Jezibẹl o seha nọ o ti kpei no. Ere ọmayọ na o ro muhọ ẹdhẹ re a se iẹe ba ekpe, yọ o vrẹ edẹ udhuvẹ soso nọ ọ jẹ rọ dhẹ. (1 Iv. 19:1-9) Uwhremu na ọ tẹ dhẹ dhere eghogho-utho jọ. Ọ tẹ jọ etẹe bo se Jihova nọ: “Mẹ ọvo [họ ọruẹaro nọ] o kiọkọ.” (1 Iv. 19:10) Whaọ eruẹaro efa e gbẹ jọ orẹwho Izrẹl. Obedaya o si eruẹaro udhusoi (100) no họ eghogho-utho jọ re Jezibẹl ọ se ae ba ekpe. (1 Iv. 18:7, 13) Kọ fikieme Elaejah o je ro roro nọ ọye ọvo o kiọkọ? O sae jọ nọ o je roro nọ eruẹaro nọ Obedaya o si fihọ eghogho-utho na, a kpe rai no. Hayo o sae jọ nọ o je roro ere keme ahwo a rọwo kurẹriẹ ze te gọ Jihova ha ghelọ oware nọ o via evaọ ugbehru Kamẹl. O sae jẹ jọ nọ o je roro nọ ohwo ọvo ọ riẹ nọ a be gwọlọ iẹe kpe he hayo inọ ohwo ọvo ọ be daezọ riẹ hẹ. Ebaibol ọ nwane vuẹ omai oware nọ o jẹ lẹliẹ Elaejah roro nọ ọye ọvo họ ọruẹaro Jihova nọ o kiọkọ họ. Rekọ ma riẹ nọ Jihova ọ riẹ oware nọ o jẹ lẹliẹe roro ere. Ọ tẹ jẹ riẹ oware nọ u ti fiobọhọ kẹe.

5. Eme Jihova o ru oke nọ Elaejah o je roro nọ ọye ọvo họ odibo riẹ nọ o kiọkọ?

⁵ Jihova o ru eware buobu ro fiobọhọ kẹ Elaejah. Ọjọ họ, ọ nọ Elaejah onọ nọ o rẹ lẹliẹe ta eva riẹ. Isiava soso ọ nọ riẹ nọ: “Eme whọ rrọ etenẹ ru?” (1 Iv. 19:9, 13) Jihova ọ kuvẹ re Elaejah ọ ta oware kpobi nọ o riẹe eva. Jihova o te je ru eware nọ i dhesẹ nọ ọ rrọ kugbei, o te je wo ogaga thesiwa. Ere ọvo ho, ọ ta kẹ Elaejah nọ amọfa buobu a riẹ nọ a gbẹ be gọe, orọnọ ọye ọvo ho. (1 Iv. 19:11, 12, 18) Nọ Elaejah ọ ta eva riẹ kẹ Jihova no, Jihova o dhesẹ ogaga riẹ kẹe jẹ tuduhọ iẹe awọ. Yọ o lẹliẹ udu tei otọ. Jihova ọ kẹ Elaejah iruo jọ nọ i wuzou gaga. Ọ ta kẹe nọ ọ rọ Hazaẹl mu ovie Siria, inọ ọ rọ Jehu mu ovie Izrẹl, ọ vẹ rọ Elaesha mu re ọ jọ ọruẹaro. (1 Iv. 19:15, 16) Iruo nana nọ Jihova ọ kẹ Elaejah na o lẹliẹ e riẹ si iroro no ebẹbẹ riẹ, u te ru nọ o je ro roro kpahe emamọ eware. Jihova o te je ru nọ o ro wo emamọ ogbẹnyusu, koyehọ Elaesha. Nọ o rrọ ere na, eme who re ru nọ whọ tẹ rrọ goli, hayo nọ whọ tẹ rrọ ọkọkora?

6. Eme whọ rẹ sae lẹ kpahe nọ oma o tẹ rrọ owhẹ goli hayo nọ whọ tẹ rrọ ọkọkora? (Olezi 62:8)

⁶ Jihova ọ gwọlọ nọ whọ lẹ sei. Ọ riẹ eware nọ e be kẹ owhẹ uye. Yọ ọ ta nọ oke kpobi nọ whọ tẹ lẹ sei, o ti yo olẹ ra. (1 Tẹs. 5:17) Elẹ idibo Jihova e rẹ were iẹe gaga, yọ o re yo elẹ rai. (Itẹ 15:8) Kọ eme whọ rẹ sae lẹ kpahe nọ whọ tẹ rrọ goli hayo rrọ ọkọkora? Vuẹ Jihova oware kpobi nọ ọ rrọ owhẹ eva wọhọ epanọ Elaejah o ru na. (Se Olezi 62:8.) Vuẹe oware nọ o be kẹ owhẹ uye gbe epanọ o be kẹ owhẹ uye te. Lẹ sei inọ jọ o fiobọhọ kẹ owhẹ riẹ oware nọ who re ru. Otẹrọnọ whẹ yọ uzoge nọ ọ rrọ isukulu, yọ ozọ u bi mu owhẹ re whọ jọ obọ isukulu ta usi uwoma, lẹ se Jihova re ọ kẹ owhẹ udu. Whọ sae lẹe nọ jọ o fiobọhọ kẹ owhẹ re whọ rọ areghẹ ta ẹme na, o gbẹ dha ahwo nọ whọ be tae kẹ eva ha. (Luk 21:14, 15) Otẹrọnọ whọ rrọ ọkora fiki oware jọ nọ o be kẹ owhẹ uye, lẹ se Jihova inọ o fiobọhọ kẹ owhẹ tae kẹ oniọvo jọ nọ o kruga ziezi. Whọ sae lẹ nọ jọ o ru re oniọvo nọ whọ te ta ẹme na kẹ na ọ riẹ oware nọ o be ginẹ kẹ owhẹ uye na. Vuẹ Jihova epanọ oware na o be kẹ owhẹ uye te, re who je muẹrohọ oghẹrẹ nọ o ti ro yo olẹ ra. Vuẹ inievo na re a fiobọhọ kẹ owhẹ. Who te ru ere, oma o te sasa owhẹ.

7. Eme iku Mauricio na i wuhrẹ owhẹ?

⁷ Jihova ọ kẹ omai kpobi na emamọ iruo nọ ma bi ru. Riẹ nọ ọ be ruẹ epanọ whọ be daoma te evaọ iruo usi uwoma na gbe iruo nọ a kẹ owhẹ evaọ ukoko na, yọ iruo ra e da riẹ ẹro fia. (Ol. 110:3) Whọ tẹ be hae kpohọ usi uwoma ziezi je ru iruo nọ a kẹ owhẹ evaọ ukoko na, ẹvẹ u re ro fiobọhọ kẹ owhẹ nọ whọ tẹ rrọ ọkọkora? Joma ta kpahe oniọvo-ọmọzae jọ nọ a re se Mauricio.b Nọ ọ họ-ame no, u gbe kri hi, ogbẹnyusu ọkpekpe riẹ jọ ọ tẹ rọ ẹmẹrera kie no ukoko na no. Mauricio ọ ta nọ: “Ogbẹnyusu mẹ na nọ o kie no ukoko na u ru nọ ozọ u je ro mu omẹ. Me je roro nọ mẹ te sai ru eyaa nọ mẹ ya kẹ Jihova gba ha inọ mẹ te gọe bẹdẹ bẹdẹ. Oware na o kẹ omẹ uye gaga, yọ me je roro nọ mẹ tẹ make tae kẹ ohwo jọ dede, ọ te sae riẹ oware nọ o be kẹ omẹ uye he.” Kọ eme u fiobọhọ kẹ Mauricio? Ọ ta nọ: “Mẹ tẹ jẹ hai kpohọ usi uwoma ẹsikpobi. Yọ o wha riẹ ze nọ me gbe je ro roro kpahe oware na tere he. Usi uwoma nọ mẹ jẹ hai lele inievo na nya o jẹ hae lẹliẹ oma sasa omẹ.” Dede nọ ma gbẹ be sai lele inievo mai kpohọ usi uwoma no uwou ruọ uwou ho, ma sae rọ ifonu lele ai kpohọ usi uwoma, je kere ileta se ahwo. Ma te ru ere, o rẹ lẹliẹ oma sasa omai. Eme ọfa o fiobọhọ kẹ Mauricio? Ọ ta nọ: “Mẹ jẹ hai ru eware nọ a kẹ omẹ evaọ ukoko na. Nọ a tẹ kẹ omẹ ẹme, mẹ rẹ romatotọ ruẹrẹ iẹe kpahe je ru ei ziezi. Ẹme nọ a jẹ hae kẹ omẹ na o lẹliẹ omẹ ruẹ nọ Jihova gbe inievo ukoko na a se omẹ gb’ohwo.”

NỌ ẸBẸBẸ OLOGBO O TE TE OMAI

8. Nọ oghẹrẹ ebẹbẹ jọ i te zere omai, ẹvẹ o rẹ jọ?

⁸ Ma riẹ nọ ebẹbẹ e te siọ omai ba ete he keme oke urere na ma rrọ na. (2 Tim. 3:1) Ghele na, ẹsejọ nọ ẹbẹbẹ o te te omai, u re gbe omai unu keme ma rẹro oghẹrẹ ẹbẹbẹ otiọye na ha hayo ma riẹ nọ o ti te omai oke yena ha. Wọhọ oriruo, okọ mai o sae raha ku omai, ma sai kie oghẹrẹ ẹyao ọgaga jọ, hayo ohwo mai jọ ọ sai whu. Ẹsejọ dede, ebẹbẹ na, ọjọ ọ be nwani notọ no yọ ọfa ọ be nyaze. Hayo o sae jọ nọ ebẹbẹ buobu i zere omai ẹsiẹvo. Eware e tẹ rrọ enẹ, eva e rẹ gbẹ were omai hi, uzou u ve bi dhe omai. O make rrọ ere na, joma kareghẹhọ nọ Jihova ọ be ruẹ ebẹbẹ kpobi nọ i bi te omai, yọ o ti fiobọhọ kẹ omai thihakọ.

9. Gbiku eware nọ e via kẹ Job ze.

⁹ Joma ta kpahe Job gbe oghẹrẹ nọ Jihova o ro fiobọhọ kẹe. Ebẹbẹ buobu i zere i rie, evaọ enwene oke ọvona. Evaọ ẹdẹ ọvuọvo, a tho erao riẹ buobu, yọ a kpe ejọ, a te je kpe idibo riẹ. Mai tube yoma na, emọ riẹ nọ o you gaga na kpobi, a te je whu. (Job 1:13-19) Eware nọ e via kẹ Job na e lẹliẹ ọkora jariẹ oma gaga. Rekọ u ri kri hi na, ere okpẹyao jọ o ro kie iei nọ u ru oma riẹ fihọ tọtọtọ. (Job 2:7) Oware na o ga te epanọ Job ọ rọ ta nọ: “Uzuazọ mẹ o vẹso omẹ no; mẹ gwọlọ gbẹ jọ uzuazọ họ.”—Job 7:16.

10. Ẹvẹ Jihova o ro fiobọhọ kẹ Job re ọ sai thihakọ ebẹbẹ nọ i te rie? (Rri uwoho nọ o rrọ uke emagazini na.)

¹⁰ Jihova ọ jẹ ruẹ eware nọ e jẹ via kẹ Job na kpobi. Jihova o you rie gaga, fikiere o te ru eware nọ e rẹ lẹliẹ Job thihakọ ebẹbẹ nọ i te rie na. O lele Job ta ẹme, yọ ọ kareghẹhọ iẹe epanọ ọyomariẹ o wo areghẹ te gbe nọ ọ be rẹrote ahwo-akpọ gbe eware kpobi nọ ọ ma. (Job 38:1, 2; 39:9, 13, 19, 27; 40:15; 41:1, 2) Jihova o te je ru nọ ọmoha jọ nọ a re se Elaihu ọ rọ tuduhọ Job awọ jẹ ta ẹme nọ ọ sasa e riẹ oma. Elaihu ọ ta kẹ Job nọ Jihova ọ rẹ ghale idibo riẹ kpobi nọ i thihakọ te urere. Rekọ ere ọvo ho. Jihova ọ rọ Elaihu kẹ Job ohrẹ jọ. Elaihu o fiobọhọ kẹ Job re o gbe roro kpahe eware nọ e be kẹe uye na ọvo ho, rekọ o ve roro kpahe epanọ Jihova Ọghẹnẹ nọ ọ ma odhiwu gbe akpọ na ọ rro te. (Job 37:14) Jihova ọ tẹ jẹ ta kẹ Job nọ o ru oware jọ, inọ ọ lẹ kẹ egbẹnyusu esa riẹ na fiki eme iyoma nọ a ta. (Job 42:8-10) Kọ omai? Eme Jihova o re ru ro fiobọhọ kẹ omai nọ ebẹbẹ i te bi te omai?

11. Eme vẹ Ebaibol ọ ta nọ e rẹ sai fiobọhọ kẹ omai thihakọ ebẹbẹ?

¹¹ Orọnikọ epanọ Jihova ọ rọ ta ẹme kẹe na ere ọ be rọ ta ẹme kẹ omai nẹnẹ hẹ. Ebaibol ọ be rọ ta ẹme kẹ omai. (Rom 15:4) Jihova o ru nọ ma ro wo obọdẹ ẹruore inọ eware i ti woma, yọ ọ be rọ ere sasa omai oma. Joma ta kpahe eme jọ nọ Ebaibol ọ ta nọ o rẹ sae lẹliẹ udu te omai otọ nọ ebẹbẹ i te te omai. Wọhọ oriruo, Jihova ọ jọ Ebaibol vuẹ omai nọ, u wo oghẹrẹ nọ ẹbẹbẹ na ọ rẹ ga te he, oware ovo “o rẹ sae hẹriẹ omai no uyoyou [riẹ] hẹ.” (Rom 8:38, 39) Ọ tẹ jẹ ta nọ “ọ kẹle enọ i bi bo sei kpobi.” (Ol. 145:18) Jihova ọ ta nọ ma tẹ rẹroso ẹe, edawọ e tẹ maki te omai, ma te sai thihakọ yọ eva e be were omai ghele. (1 Kọr. 10:13; Jem. 1:2, 12) Ebaibol ọ tẹ jẹ ta nọ ebẹbẹ nọ i bi te omai nẹnẹ na, ubroke ọvo, rekọ eghale nọ i ti te omai evaọ obaro e te jọ bẹdẹ bẹdẹ. (2 Kọr. 4:16-18) Jihova ọ tẹ jẹ ta nọ ọ te raha Setan nọ ọ be wha ebẹbẹ na kpobi ze na no gbe ahwo omuomu kpobi. (Ol. 37:10) Kọ whọ riẹ eria Ebaibol jọ fihọ uzou no nọ i ti fiobọhọ kẹ owhẹ thihakọ nọ ebẹbẹ i te te owhẹ?

12. Eme Jihova ọ gwọlọ nọ ma hai ru re ma sai wo erere no Ebaibol na ze?

¹² Jihova ọ gwọlọ nọ ma hai ru uvẹ fihọ nọ ma re ro se Ebaibol kẹdẹ kẹdẹ, ma vẹ jẹ romatotọ roro kpahe eware nọ ma se. Nọ ma je bi ru eware nọ ma wuhrẹ evaọ Ebaibol na, ẹrọwọ mai o re dhe ẹgẹga, usu mai avọ Ọsẹ obọ odhiwu mai na o vẹ jẹ kpekpe ga. Nọ ebẹbẹ i je te omai, ma vẹ sai thihakọ. Jihova ọ rẹ rọ ẹzi ọfuafo riẹ fiobọhọ kẹ omai nọ ma tẹ be hai se Ebaibol. Ẹzi ọfuafo na ọ rẹ sae lẹliẹ omai wo “ogaga nọ u vi ogaga,” yọ onana u re fiobọhọ kẹ omai thihakọ ẹbẹbẹ kpobi nọ o te omai.—2 Kọr. 4:7-10.

13. Ẹvẹ eware nọ “ọrigbo nọ a re fievahọ nọ o wo areghẹ na” o bi wuhrẹ omai e sai ro fiobọhọ kẹ omai evaọ oke ebẹbẹ?

¹³ Jihova o bi ru nọ “ọrigbo nọ a re fievahọ nọ o wo areghẹ na” a bi ro kere izoẹme buobu, ru ividio gbe ile nọ i re ru ẹrọwọ mai ga. Yọ i re fiobọhọ kẹ omai dikihẹ ga nọ ebẹbẹ i te te omai. (Mat. 24:45) U fo nọ ma rẹ hai se ebe ukoko na, rri ividio jẹ gaviezọ kẹ ile na. Oniọvo-ọmọtẹ jọ nọ ọ rrọ obọ United States ọ ta epanọ eware nana i bi fiobọhọ kẹe te. Ọ ta nọ: “Anwọ ikpe udhuvẹ na nọ mẹ be rọ gọ Jihova na, yọ ebẹbẹ buobu i te omẹ no.” Edawọ ilogbo i te oniọvo nana. Ohwo jọ nọ ọ da idi no ọ jamu ọsẹ-ologbo riẹ kpe, oghẹrẹ ẹyao ọgaga jọ o kpe ọsẹgboni riẹ, yọ isiava soso ọyomariẹ ọ mọ ẹyao ekansa no. Kọ eme o fiobọhọ kẹe thihakọ? Ọ ta nọ: “Jihova ọ nyasiọ omẹ ba ha, yọ eware nọ ọ be rọ ọrigbo nọ a re fievahọ nọ o wo areghẹ na wuhrẹ omai i fiobọhọ kẹ omẹ thihakọ. Fikiere mẹ sae ta ọkpọ ẹme Job na inọ: ‘Bẹsenọ me re whu, me re siobọno ẹgbakiete mẹ hẹ!’”—Job 27:5.

14. Eme Jihova ọ rẹ rọ inievo ukoko na ru kẹ omai nọ ebẹbẹ i te te omai? (1 Ahwo Tẹsalonika 4:9)

¹⁴ Jihova o wuhrẹ omai nọ ma you ohwohwo je dikihẹ kẹ ohwohwo nọ ẹbẹbẹ o te te oniọvo jọ. (2 Kọr. 1:3, 4; se 1 Ahwo Tẹsalonika 4:9.) Wọhọ epanọ Elaihu ọ tuduhọ Job awọ na, inievo ukoko na a rẹ tuduhọ omai awọ je fiobọhọ kẹ omai nọ ebẹbẹ i te te omai. (Iruẹru 14:22) Joma ta kpahe oniọvo jọ nọ a re se Diane nọ ẹyao ọgaga jọ o kie ọzae riẹ. Evaọ oke yena, inievo ukoko na a jẹ tuduhọ ae awọ je fiobọhọ kẹ ae re a kru ẹrọwọ rai. Diane ọ ta nọ: “Ọmọziọ uye o bẹ omẹ hẹ. Rekọ Jihova ọ rọ inievo ukoko na dhogbo bru omai ze. Inievo na a jẹ hae nyabru omai ze, a jẹ hae rọ ifonu se omai jẹ gbalọ omai. Eware nana kpobi i je fiobọhọ kẹ omai thihakọ. Fikinọ mẹ riẹ omoto ẹdhẹ hẹ, inievo na a jẹ hae wọ omẹ kpohọ ewuhrẹ. Yọ mẹ tẹ gwọlọ kpohọ usi uwoma, a rẹ wọ omẹ nya re.” Kọ oghale riẹ o gbẹ rro nọ ma ro wo emamọ inievo itienana?

EVA E WERE OMAI INỌ JIHOVA Ọ BE SẸRO MAI

15. Ẹvẹ ma rọ riẹ nọ ma te sai thihakọ nọ ebẹbẹ i te te omai?

¹⁵ Mai kpobi na, ohwo ọvo nọ ẹbẹbẹ o ti te ẹdẹ jọ họ ọ riẹ hẹ. Rekọ jọ ozọ u mu omai hi keme wọhọ epanọ ma wuhrẹ no na, Jihova Ọsẹ oyoyou mai na ọ be ruẹ oware kpobi nọ o be via kẹ omai. Ọ rrọ kugbe omai, o ti yo elẹ nọ ma be lẹ sei, yọ o ti fiobọhọ kẹ omai. (Aiz. 43:2) Ma riẹ nọ ma te sai thihakọ je kru ẹrọwọ mai ghelọ oghẹrẹ ẹbẹbẹ kpobi nọ o te omai kẹhẹ. Ma riẹ ere keme Jihova o ru eware buobu fihọ nọ e rẹ sai fiobọhọ kẹ omai thihakọ. Ọ kẹ omai uvẹ nọ ma rẹ rọ lẹ sei, ọ kẹ omai Ebaibol, ọ be rọ ukoko na wuhrẹ omai, o te je ru nọ ma ro wo inievo buobu.

16. Eme ma re ru re Jihova ọ sẹro mai bẹdẹ bẹdẹ?

¹⁶ Eva e were omai gaga inọ Ọsẹ obọ odhiwu mai na ọ be sẹro mai. “Udu mai o be ghọghọ fiki riẹ.” (Ol. 33:21) Joma hai se Ebaibol, lẹ se Jihova, ta eva kẹ inievo na je ru eware efa nọ ma wuhrẹ na. Ma te bi ru ere, u dhesẹ nọ eware nana nọ Jihova o ru kẹ omai na e da omai ẹro. U te no ere no, u fo re ma daoma kẹnoma kẹ eware nọ e rẹ lẹliẹ omai kie no ukoko Jihova. Ma te bi ru oware nọ o rẹ were Jihova, ọ te sẹro mai bẹdẹ bẹdẹ.—1 Pita 3:12.