1922 Ikpe Udhusoi Nọ E Vrẹ

“EMAMỌ ẸME Ọ TA NA”

Inievo na a jẹ ta usi uwoma ziezi, yọ a je fi ebe buobu họ ada. A je printi emagazini evaọ Ebẹtẹle Brooklyn. Rekọ ekọmpene nọ i re printi ebe ae a je printi ebe nọ i wo uke ogaga kẹ ukoko na. Evaọ emerae buobu, ekọmpene na ọ sai printi ebe nọ i re te inievo na wha kpohọ usi uwoma ha. Fikiere Brọda Rutherford ọ tẹ nọ Brọda Robert Martin nọ o wuzou iruo ebe nọ a re printi sọ ukoko na ọvo o sai printi ebe nọ i wo uke ogaga.

Brọda Martin ọ ta nọ: “Emamọ ẹme ọ ta na. Rekọ okolo oware he, keme ẹjini ologbo nọ a re ro printi ebe nọ i wo uke ogaga ma be te dẹ na.” Fikiere inievo na a tẹ haya oria jọ evaọ obọ Brooklyn nọ a re se 18 Concord Street. A tẹ jẹ dẹ ẹjini nọ a re ro printi ebe na.

Orọnikọ ohwo kpobi eva e jẹ were he inọ inievo na a dẹ ẹjini ọkpokpọ. Ọzae jọ nọ o wuzou ekọmpene jọ nọ o jẹ hai printi ebe kẹ omai ọ nyaziọ oria nọ ma dẹ ẹjini na fihọ. Ọ tẹ ta nọ: “Wha be ruẹ emamọ ẹjini ologbo nana nọ wha dẹ nọ wha gwọlọ ro printi ebe na? Emerae ezeza ọvo yọ wha raha e riẹ no keme ohwo ọvo ọ rrọ usu rai nọ ọ riẹ oghẹrẹ nọ a re ru ei hi.”

Brọda Martin ọ ta nọ: “Ginọ uzẹme nọ ma riẹ kpahe ẹjini na tere he wọhọ epanọ ọ ta na. Rekọ ma riẹ nọ Ọghẹnẹ o ti fiobọhọ kẹ omai, yọ o gine fiobọhọ kẹ omai.” U kri hi, a tẹ jẹ rọ ẹjini na printi ebe nọ i bu te idu ivẹ (2,000) okpẹdẹ. Jihova o gine fiobọhọ kẹ ae.

A JẸ RỌ IREDIO TA USI UWOMA KẸ AHWO BUOBU

Inievo na a jẹ rọ ebe nọ a printi ta usi uwoma. Rekọ nọ u te oria jọ no, a tẹ jẹ rọ iredio ta re. Evaọ uvo Ẹdoka nọ o jọ edẹ udhegbezeza Ava ọrọ ukpe 1922, Brọda Rutherford ọ tẹ jọ iredio kẹ ovuẹ jọ. Oyena họ orọ ọsosuọ kpobi. Uzoẹme ovuẹ na họ “Millions Now Living Will Never Die” (Ima Ahwo Nọ E be Rria Enẹna A Ti Whu Vievie He). Iredio KOG evaọ Los Angeles, nọ ọ rrọ California, obọ U.S.A. ọ jọ kẹ ovuẹ na.

Ahwo nọ a bu te oware wọhọ idu udhegbisoi (25,000) ae a gaviezọ kẹ ovuẹ na. Yọ ejọ dede, a kere ileta je ro yere iei rọkẹ ovuẹ na. Ọzae jọ nọ a re se Willard Ashford, nọ ọ be rria Santa Ana, obọ California ọ jọ usu ahwo nọ a kere ileta na. Ọ jọ ileta na yere Brọda Rutherford gaga, anọ ovuẹ na “ọ were gaga yọ o jọ jajaja.” Ọ tẹ jẹ ta nọ: “Imasa soso a jẹ jọ uwou mẹ mọ. Fikiere o hae make jọ nọ oria nọ whọ jọ kẹ ovuẹ na o kẹle omai, ma hae sae nyaze he. Rekọ iredio nọ whọ jọ kẹ ovuẹ na, o soriẹ ze nọ ma ro yo ẹme nọ whọ ta.”

No umuo oke yena vrẹ, a tẹ jẹ hae ta ẹme evaọ iredio. Yọ evaọ obọ ekuhọ ukpe yena, ukoko o ta nọ “ahwo nọ a be gaviezọ kẹ evuẹ na evaọ iredio a bu te idu egba esa (300,000).”

Nọ ukoko o ruẹ nọ ahwo a be gaviezọ kẹ evuẹ iredio na gaga, a tẹ tubẹ ta nọ a rẹ bọ oria iredio obọrai. Yọ a bọ riẹ fihọ oria nọ a re se Staten Island. Oria nana u thabọ no Ebẹtẹle Brooklyn hi. A se oria iredio mai na WBBR. Yọ evaọ ikpe nọ i lele i rie a jẹ rehọ iẹe ta usi uwoma Uvie na gaga.

“ADV”

A jọ Uwou-Eroro Azeza 15, 1922 ta nọ a ti ru okokohọ ologbo jọ evaọ Cedar Point, Ohio. Yọ a ti ru okokohọ nana no edẹ isoi Azie rite edẹ ikpegbesa, orọ 1922. Eva e were inievo na gaga nọ a je kpohọ okokohọ na.

Brọda Rutherford ọ jọ ẹme emuhọ okokohọ na ta nọ: “Inievo, u mu omẹ ẹro nọ Ọghẹnẹ o ti ru nọ ma ti ro ru okokohọ nana gbẹsinẹdẹ. Yọ okokohọ na u ti ru nọ ma te rọ ta usi uwoma na vi epanọ ma jẹ ta vẹre.” Inievo nọ i je ru ẹme evaọ okokohọ na a je si unu no ẹme usi uwoma vievie he.

Evaọ Edisoi-Oka nọ ọ jọ edẹ eree Azie, ahwo nọ a nyaze okokohọ na a bu te idu eree (8,000). Yọ oma o jẹ kpakpa ohwo kpobi re ọ gaviezọ kẹ ovuẹ nọ Brọda Rutherford ọ te kẹ. O jọ ere keme a gwọlọ riẹ oware nọ “ADV” nọ a kere fihọ obe nọ a je ro zizie ahwo kẹ okokohọ na u dikihẹ kẹ. Yọ a riẹ nọ Brọda Rutherford ọ te fa otọ ẹme nana evaọ ẹme riẹ. A kpiri omohọ ologbo jọ fihọ obehru eplatfọmo na, yọ ahwo buobu a muẹrohọ iẹe. Oniọvo-ọmọzae jọ nọ a re se Arthur Claus nọ o no obọ Tulsa, evaọ Oklahoma, obọ U.S.A. ze ọ jọ okokohọ na. Evaọ oke yena emaekrofonu e jariẹ hẹ. Rekọ oria nọ oniọvo nana ọ keria, ọ rẹ jariẹ yo ẹme nọ a bi ru evaọ okokohọ na ziezi.

Re ohwo kpobi ọ sai yo ovuẹ Brọda Rutherford ziezi, ohwo-agbara na o te woro nọ ohwo nọ ọ nyaze taure a te ti muhọ họ, a te kẹe uvẹ rueva Ọgwa na ha nọ Brọda Rutherford ọ te kẹ ovuẹ na. Evaọ ighọjọ izii gbabọ ohiohiẹ, Brọda Rutherford o ro mu ẹme riẹ họ. Yọ ẹme nọ Jesu ọ ta evaọ obe Matiu 4:17 o ro muhọ. O ta nọ: “Wha kurẹriẹ, keme Uvie odhiwu o kẹle no.” Ọ jọ ovuẹ riẹ na ta kpahe oghẹrẹ nọ ahwo a ti ro yo ovuẹ Uvie na. Ọ ta nọ: “Jesu ọvo ọ ta nọ evaọ oke ọzino riẹ, o ti koko ahwo nọ a gwọlọ gọ Ọghẹnẹ họ, re a kurẹriẹ ze.”

Brọda Claus nọ ọ jọ obeva ọgwa na oke yena ọ ta nọ: “Ma jẹ nabe gaviezọ kẹ ẹme kpobi nọ ọ jẹ ta.” Rekọ ẹsiẹvo na, oma o gbẹ jẹ riẹ Brọda Claus ru hu. Ọ tẹ kpama no ọgwa na. Ẹkpama na o jẹ ruẹe oma ha keme ọ riẹ nọ ọ tẹ ruọ otafe no, a te gbẹ kẹe uvẹ zihe ze he.

Nọ omoke jọ o vrẹ no, oma na o tẹ kẹe uvẹ no. O te mu ọgwa na họ ezihe ze. Ẹsiẹvo na o te yo edo abọ nọ a be tehe. Oma o tẹ jẹ kpakpa iẹe re ọ rueva keme o roro nọ a yo emamọ ẹme jọ gbọe no. Fikiere ọ tẹ ta nọ, o tẹ make rọnọ ẹgadiẹ ọ rẹ gadiẹ re ọ sai yo eme nọ i kiọkọ, ọ te gadiẹ kpobọ ehru ọgwa na. Oke yena ọ gbẹ jọ gragragra keme ikpe udhegbesa ọvo ọ jọ. Ọ tẹ gadiẹ kpobọ ehru uwou na. Nọ o te obei, ọ tẹ ruẹ nọ a rovie oria nọ elo o rẹ rọ rueva ọgwa na fihọ. Yọ ọ jẹ jọ etẹe yo ẹme nọ a jẹ ta ziezi.

Orọnọ Brọda Arthur ọvo ọ jọ obọ ehru uwou na ha. Egbẹnyusu riẹ jọ a jọ obei re. Ogbẹnyusu riẹ jọ nọ a re se Frank Johnson ọ tẹ nwane dhẹ bru ei. Ọ tẹ nọe nọ, “Oko who wo amagha ọdada jọ evaọ ẹkpa ra?”

Brọda Arthur o te yo kẹe nọ, “Ee, me wo.”

Brọda Frank ọ tẹ vuẹe nọ, “Ọghẹnẹ ọvo o vi owhẹ ze na! Whọ be ruẹ omohọ ologbo nana nọ a kpiri fihọ etenẹ na? Gaviezọ ziezi. Nọ Obruoziẹ naa ọ tẹ nwane ta nọ, ‘wha whowho, wha whowho,’ whọ vẹ rọ amagha ra na bru ifi ene nana nọ e rrọ etenẹ na no.”

Fikiere Arthur o te kru amagha riẹ họ obọ be hẹrẹ oke nọ ọ te ta ẹme na re o bru ifi na. Nọ Brọda Rutherford o bi ru ẹme riẹ na te obọ ekuhọ no, ọ tẹ ta ẹme jọ avọ ọwhọ. Yọ o wọhọ nọ ọ jẹ ta ẹme na do gaga. Ọ ta nọ: “Wha jọ isẹri ẹrọwọ gbe erọ uzẹme Olori na. Wha nya ruọ ohọre na bẹsenọ abọ Babilọn kpobi ọ rẹ raha no. Wha whowho ovuẹ na thabọ jẹ kẹre. Akpọ na a rẹ riẹ nọ Jihova họ Ọghẹnẹ gbe Jesu Kristi họ Ovie ivie gbe Olori ilori. Ọnana họ ẹdẹ edẹ na. Rri, Ovie na o muhọ esuo no! Whai họ ahwo-ẹro riẹ. Fikiere wha whowho, wha whowho, wha whowho, Ovie na avọ uvie riẹ.”

Brọda Arthur ọ ta nọ ọye avọ egbẹnyusu riẹ nọ a jọ obọ ehru uwou na a bru ifi na oke ovona. O tẹ so ẹe ze nọ omohọ na o rọ nabi ghelie rovie krẹkrẹrẹkrẹ. A kere fihọ omohọ na nọ, “Advertise the King and Kingdom” (koyehọ Wha whowho usi Ovie na avọ uvie riẹ). Yọ oye a rehọ ibieme “ADV” na no ze.

IRUO NỌ I WUZOU GAGA

Okokohọ nọ a ru evaọ Cedar Point na o lẹliẹ inievo na ruẹ nọ iruo usi uwoma ota na i wuzou gaga. Yọ ibuobu rai a jẹ rọ ajọwha ta usi uwoma na. Oniọvo jọ nọ ọ jọ ọgbaẹmo-aro (nọ a bi se ọkobaro enẹna) evaọ Oklahoma, obọ U.S.A. ọ ta nọ: “Ahwo nọ a jọ ẹwho nọ ma jẹ jọ ta usi uwoma, oware jọ nọ a re se ikolu a jẹ hae tọ no otọ ze zẹ kẹ ahwo, yọ a gine yogbe gaga.” Oniọvo na ọ ta nọ, ẹsikpobi nọ ahwo na a te se emagazini Golden Age na, “irui-oviẹ i re su no ai aro ze.” Ọ tẹ jẹ ta nọ, “eva e were omai gaga inọ ma be rọ ẹme Ọghẹnẹ sasa ahwo na oma.”

Inievo na a ruẹ nọ ẹme nọ Jesu ọ jọ obe Luk 10:2 ta kpahe usi uwoma na, u gine wuzou gaga. Ọ ta nọ: “Ivuẹvu na e rrọ ruaro, rekọ iruiruo na e rrọ kakao.” Evaọ obọ ekuhọ ukpe na, inievo na a tẹ jẹ rọ ajọwha ta usi uwoma na evaọ oria kpobi vi epaọ ọsosuọ.