Hai Roro Kpahe Ẹruore nọ Who Wo Ẹsikpobi

1. Obọdẹ ẹruore vẹ ma wo?

JIHOVA o ru nọ ma ro wo ẹruore inọ ma te rria bẹdẹ bẹdẹ evaọ obaro. Ahwo jọ a te rria bẹdẹ bẹdẹ evaọ obọ odhiwu. Yọ a ti wo oma ẹzi nọ u re whu hu. (1 Kọr. 15:50, 53) Rekọ mai ahwo buobu ma te rria bẹdẹ bẹdẹ evaọ otọakpọ na. Eva e te were omai, yọ ma te jọ gbagba. (Evia. 21:3, 4) Te obọ odhiwu ma te rria hayo obọ otọakpọ obonẹ ma te jọ, ẹruore nọ ma wo na ọ were omai wo umuo ho.

2. Eme o lẹliẹ omai wo ẹruore, kọ fikieme u ro mu omai ẹro nọ eware nọ ma bi rẹro rai na e te via?

² A tẹ jọ Ebaibol fodẹ “ẹruore,” otọ riẹ họ “epanọ ohwo o re rẹro emamọ eware.” Ma riẹ nọ eware nọ ma bi rẹro rai na e te via keme Jihova ọye ọ ta nọ o ti ru ai. (Rom 15:13) Yọ ma riẹ nọ ọ tẹ ya eyaa, o re ru ei gba. (Ik. 23:19) Oye ọvo gbe he, ma tẹ jẹ riẹ nọ Jihova ọ gwọlọ ru eware na yọ o wo ogaga nọ o re ro ru ai. Eware nọ ma bi rẹro rai na yọ eware ewezẹ hẹ; u wo oware nọ o lẹliẹ omai riẹ nọ e te ginẹ via.

3. Eme ma te ta kpahe evaọ uzoẹme nana? (Olezi 27:14)

³ Jihova Ọsẹ obọ odhiwu mai na o you omai wo umuo ho, yọ ọ gwọlọ nọ ma fievahọ iẹe. (Se Olezi 27:14.) U te mu omai ẹro nọ Jihova o ti ru eyaa riẹ gba, ma te sai thihakọ ebẹbẹ enẹna. Yọ odawọ kpobi nọ u te omai evaọ obaro, ozọ u ti mu omai hi, eva e te jẹ were omai. Ma te jọ uzoẹme nana ta kpahe oghẹrẹ nọ ẹruore mai o bi ro fiobọhọ kẹ omai. Ma te ta kpahe epanọ ẹruore mai ọ rọ wọhọ umuokọ gbe etu-ọgaga. Ma vẹ te jẹ ta kpahe eware nọ ma re ru re iroro mai i gbe no ẹruore nọ ma wo na ha.

ẸRUORE MAI Ọ WỌHỌ UMUOKỌ

4. Ẹvẹ ẹruore ọ rọ wọhọ umuokọ? (Ahwo Hibru 6:19)

⁴ Evaọ ileta nọ Pọl ukọ na o kere se ahwo Hibru, ọ ta nọ ẹruore mai ọ wọhọ umuokọ. (Se Ahwo Hibru 6:19.) Pọl ọ jẹ hae ruọ okọ kpohọ erẹ gaga. Fikiere ọ riẹ nọ umuokọ a re ro kru okọ daji oria ovo re ame o gbe su ei vrẹ no ho. Ẹdẹ jọ nọ o je kpohọ erẹ, ofou ọgaga o te je fou. Enọ i je bi okọ na a te gbolo imuokọ fihọ ame re ofou o gbe fou okọ na nyai kpomahọ itho ho. (Iruẹru 27:29, 39-41) Wọhọ epanọ umuokọ o rẹ lẹliẹ okọ daji oria ovo na, ere ẹruore mai o re fiobọhọ kẹ omai talamu Jihova nọ ebẹbẹ akpọ i te bi fi omai kpenẹ avọ enẹ. Fikinọ ma wo ẹruore, ma rẹ ruawa ga hrọ họ keme ma riẹ nọ eware i ti woma ẹdẹ jọ. Jesu ọ vuẹ omai no vẹre inọ a ti kpokpo omai. (Jọn 15:20) Rekọ ma te bi roro kpahe emamọ eware nọ Jihova o ti ru kẹ omai, ma te gọe vrẹ ghele.

5. Ẹvẹ ẹruore nọ Jesu o wo o ro fiobọhọ kẹe dede nọ ọ riẹ nọ a ti kpei no?

⁵ Joma ta kpahe epanọ ẹruore nọ Jesu o wo o ro fiobọhọ kẹe dede nọ ọ riẹ nọ o ti whu uwhu oja. Evaọ ẹdẹ Pẹntikọst 33 C.E., Pita ukọ na ọ ta ẹme te eruẹaruẹ jọ nọ e rrọ obe Ilezi nọ i dhesẹ epanọ udu o te jọ Jesu awọ te. Eruẹaruẹ na e ta nọ: “Mẹ te rria avọ ẹruore; keme whọ te siọ omẹ ba Uki hi, yọ whọ te kuvẹ re ọnọ ọ talamu owhẹ na o gbo ho. . . . Who ti ru omẹ wo oghọghọ ulogbo evaọ aro ra.” (Iruẹru 2:25-28; Ol. 16:8-11) Dede nọ Jesu ọ riẹ nọ a ti kpei no, o wo ẹruore. Ọ riẹ nọ Jihova Ọghẹnẹ ọ te kpare iẹe ze, ọ vẹ te wariẹ jọ kugbe Ọsẹ riẹ evaọ obọ odhiwu.—Hib. 12:2, 3.

6. Eme oniọvo jọ ọ ta kpahe ẹruore?

⁶ Ẹruore nọ ma wo na o fiobọhọ kẹ inievo mai buobu thihakọ ebẹbẹ no. Joma ta kpahe oniọvo-ọmọzae jọ nọ a re se Leonard Chinn nọ ọ jẹ rria obọ England. Nọ a je fi Ẹmo Akpọ Ọsosuọ, a fi rie họ uwou-odi fikinọ ọ rọwo nọ ọ rẹ jọ isoja ha. Evaọ emerae ivẹ soso ọye ọvo ọ jọ uwou-odi riẹ sa. Kẹsena a tẹ jẹ kẹe iruo egaga. O kere uwhremu na nọ: “Oware nọ o via kẹ omẹ na o lẹliẹ omẹ ruẹ nọ ẹruore mai na o sae lẹliẹ omai thihakọ ẹbẹbẹ kpobi. Ma te bi roro kpahe oriruo Jesu, ikọ na, gbe eruẹaro na, jẹ be kareghẹhọ eyaa Ọghẹnẹ nọ e rrọ Ebaibol na, ma rẹ sai thihakọ. Yọ ma riẹ nọ ma te thihakọ, ma ti wo eghale buobu evaọ obaro.” Ẹruore ọ rẹ sae jọ wọhọ umuokọ kẹ omai wọhọ epanọ ọ jọ kẹ Brọda Leonard na.

7. Ẹvẹ edawọ e rẹ rọ lẹliẹ ẹruore mai mu omai ẹro vi epaọ anwẹdẹ? (Ahwo Rom 5:3-5; Jemis 1:12)

⁷ Ma te bi thihakọ ebẹbẹ o rẹ lẹliẹ eva mai were Jihova, yọ o rẹ lẹliẹ ẹruore mai mu omai ẹro vi epaọ ọsosuọ. (Se Ahwo Rom 5:3-5; Jemis 1:12.) Ẹruore mai ọ rẹ ga vi epanọ ọ jọ oke nọ ma mu Ebaibol họ ewuhrẹ obọ. Uzẹme riẹ họ Setan ọ gwọlọ nọ ebẹbẹ mai i reghe omai no re ma gbẹ sae gọ Jihova ha. Rekọ Jihova o ti fiobọhọ kẹ omai.

ẸRUORE MAI Ọ WỌHỌ ETU-ỌGAGA

8. Ẹvẹ ẹruore mai ọ rọ wọhọ etu-ọgaga? (1 Ahwo Tẹsalonika 5:8)

⁸ Oware ofa nọ Ebaibol ọ rọ ẹruore mai dhesẹ họ etu-ọgaga. (Se 1 Ahwo Tẹsalonika 5:8.) Osoja o re ku etu-ọgaga họ re egbọlọ nọ ewegrẹ riẹ a be sa i gbe tei uzou ho. Ere ọvona re, Setan nọ o bi fi omai ẹmo na o bi ru epa kpobi nọ ma re ro wo oghẹrẹ iroro nọ ahwo nọ a wo ẹruore he a wo. Wọhọ epanọ etu-ọgaga ọ rẹ thọ osoja na, ere ẹruore mai o re ru nọ ma gbe wo oghẹrẹ iroro itieye na ha. Ma ve ru oware nọ o rẹ were Jihova.

9. Ẹvẹ ohwo nọ o wo ẹruore he o re yeri uzuazọ riẹ?

⁹ Ẹruore uzuazọ ebẹdẹ bẹdẹ nọ ma wo na u re ru nọ ma rẹ rọ rehọ areghẹ gbe orimuo yeri akpọ mai. U gbe mu omai ẹro nọ eware nọ ma bi rẹro rai na i ti rugba ha, ma sai wo isiuru akpọ na. Ma gbẹ te daoma epanọ ma re ro wo uzuazọ ebẹdẹ bẹdẹ hẹ. Oware utioye na o via kẹ Ileleikristi jọ evaọ obọ Kọrint. A jẹ vro inọ ẹkparomatha ọ rrọ họ. Whaọ Ọghẹnẹ ọ ya eyaa inọ ọ te kpare ahwo nọ a whu no ze. Onana yọ obọdẹ eyaa jọ nọ ọ ya. (1 Kọr. 15:12) Pọl ọ ta nọ ahwo nọ a wo ẹruore he, epanọ a rẹ rọ reakpọ kuoma ọvo o rẹ jarae oja. (1 Kọr. 15:32) Nwanọ oware nọ ahwo nọ a wo ẹruore he a bi ru nẹnẹ oye. Epanọ a rẹ rọ reakpọ kuoma je fe ọvo a be gwọlọ. Rekọ ma rrọ ere he keme ma wo ẹruore. Eruore mai na ọ wọhọ etu-ọgaga. O bi ru nọ ma gbẹ be rọ dhogbo epanọ ma rẹ rọ reakpọ kuoma ha keme ma te bi yeri oghẹrẹ akpọ otiọye, o rẹ raha usu mai avọ Jihova.—1 Kọr. 15:33, 34.

10. Ikpehre iroro vẹ ẹruore ọ rẹ sai fiobọhọ kẹ omai whaha?

¹⁰ Ẹruore mai nọ ọ wọhọ etu-ọgaga na o re fiobọhọ kẹ omai nọ ma gbe roro nọ Jihova nọ ma be gọ na yọ oke oraha kufiẹ hẹ. Ahwo jọ a rẹ sai roro nọ: ‘Me kiẹrẹe te ohwo nọ o ti wo uzuazọ ebẹdẹ bẹdẹ hẹ. Me roro nọ mẹ te sai koko izi Ọghẹnẹ hẹ.’ Ẹlifaz nọ ọ jọ usu egbẹnyusu esa nọ a nyaze te sasa Job oma na ọ ta ọkpọ ẹme otiọye na. Ọ ta nọ: “Ono họ ohwo-akpọ gheghe nọ ọ rẹ rọ jọ fuafo?” Ọ tẹ jẹ ta kpahe Ọghẹnẹ nọ: “O fievahọ erẹri riẹ hẹ, makọ odhiwu na dede ọ fo evaọ aro riẹ hẹ.” (Job 15:14, 15) Nọ ọrue koikoi! Kareghẹhọ nọ Setan họ ọnọ ọ gwọlọ nọ ma roro ere. Ọ riẹ nọ ma te bi roro ere, ẹruore mai o re gbe mu omai ẹro tere he. Fikiere joma roro iroro itieye na ha. Ukpọ ere, jọ eyaa Jihova i mu omai ẹro. Jọ u mu owhẹ ẹro nọ Jihova ọ gwọlọ nọ who wo uzuazọ ebẹdẹ bẹdẹ, yọ o ti fiobọhọ kẹ owhẹ woi.—1 Tim. 2:3, 4.

HAI RU EWARE NỌ E RẸ LẸLIẸ OWHẸ RORO KPAHE ẸRUORE NỌ WHO WO

11. Fikieme ma jẹ hẹrẹ Jihova bẹsenọ o re ru eyaa riẹ gba?

¹¹ Ẹsejọ ebẹbẹ mai e rẹ sae lẹliẹ omai si iroro no ẹruore nọ ma wo. O sae jọ nọ ma bi rẹro Uvie Ọghẹnẹ anwẹdẹ. Rekọ ma hẹrẹ bẹ no. U fo nọ ma rẹ kareghẹhọ nọ Jihova yọ Ọghẹnẹ nọ ọ be rria no ebẹdẹ rite ebẹdẹ. Yọ oghẹrẹ nọ ma re rri oke, ere o re rri rie he. (2 Pita 3:8, 9) Nọ Jihova ọ tẹ gwọlọ ru oware, oghẹrẹ nọ ọ mai woma o re ro ru ei. Ẹsejọ oke nọ ma roro nọ o ti ro ru ei, o re ro ru ei hi. Eme o ti fiobọhọ kẹ omai hẹrẹ Jihova bẹsenọ o re ru eyaa riẹ kpobi gba?—Jem. 5:7, 8.

12. Wọhọ epanọ o rrọ Ahwo Hibru 11:1, 6, eme o rẹ lẹliẹ eyaa Ọghẹnẹ mu omai ẹro?

¹² Jihova họ ọnọ o ti ru eware nọ ma bi rẹro rai na. Fikiere nọ ma gbe bi no abotọ riẹ hẹ, o te lẹliẹ omai roro kpahe ẹruore mai ẹsikpobi. Ebaibol ọ vuẹ omai nọ re ma sai wo ẹruore ma rẹ rọwo nọ Jihova ọ rrọ, gbe nọ “ọ rẹ hwosa kẹ enọ e be rọ ọwhọ gwọlọ iẹe.” (Se Ahwo Hibru 11:1, 6.) U te gine mu omai ẹro nọ Jihova ọ rrọ, ma ti fi eva mai kpobi họ iẹe inọ o ti ru eyaa riẹ kpobi gba. Obọnana joma ta kpahe eware jọ nọ e rẹ lẹliẹ omai kẹle Jihova ziezi je ru nọ ẹruore mai na o ti ro mu omai ẹro ziezi.

13. Ẹvẹ ma sae rọ kẹle Ọghẹnẹ ziezi?

¹³ Hae lẹ se Jihova je se Ebaibol na. Dede nọ ma rẹ sae ruẹ Jihova ha, ma rẹ sae kẹle iẹe ghele. Nọ ma tẹ be lẹ sei, jọ u mu omai ẹro nọ o bi yo elẹ mai. (Jeri. 29:11, 12) Nọ ma te bi se Ebaibol na je roro didi kpahe oware nọ ma se, yọ Ọghẹnẹ ọ be ta ẹme kẹ omai na. Ma tẹ be hai se kpahe epanọ Jihova ọ rọ rẹrote idibo riẹ evaọ oke anwae, ẹruore mai o re dhe ẹkpẹkpokpọ. Eware kpobi nọ a kere fihọ Ebaibol na “a kere ai re ma wuhrẹ no ai ze, re ma rọ ẹkwoma ithihakọ mai gbe omosasọ nọ u re no Ikereakere na ze wo ẹruore.”—Rom 15:4.

14. Fikieme u ro fo re ma hai roro kpahe eyaa Ọghẹnẹ nọ i rugba no?

¹⁴ Hai roro kpahe eyaa Jihova nọ i rugba no. Joma ta kpahe oware nọ Ọghẹnẹ o ru kẹ Abraham avọ Sera. Dede nọ aimava a who vrẹ ahwo nọ a re yẹ ọmọ no, Ọghẹnẹ ọ ya eyaa kẹ ae nọ a ti yẹ ọmọ. Yọ, nọ oke na u te, a gine yẹ ọmọ. (Emu. 18:10) Kọ oke nọ Ọghẹnẹ ọ rọ ya eyaa na, Abraham ọ rọwo? Ebaibol ọ ta nọ o “wo ẹrọwọ inọ ọ te sae jọ ọsẹ erẹwho buobu.” (Rom 4:18) Who te rri eyaa nọ Ọghẹnẹ ọ ya kẹ Abraham na, who re roro nọ oware utioye o rẹ sae via ha. Rekọ Abraham ọ rọwo nọ Ọghẹnẹ o ti ru eyaa riẹ na gba, yọ ere o ginẹ via. (Rom 4:19-21) Iku itieye na e rẹ lẹliẹ omai fievahọ Jihova inọ o ti ru eyaa riẹ kpobi gba keme oware ovo o rẹ bẹe eruo ho.

15. Fikieme u ro fo re ma roro kpahe eware nọ Ọghẹnẹ o ru kẹ omai no?

¹⁵ Hae kareghẹhọ eware nọ Jihova o ru kẹ owhẹ no. Hai roro kpahe irere nọ who wo no fiki eyaa Ọghẹnẹ jọ nọ i rugba. Eyaa itieye jọ họ, onọ Jesu ọ ta inọ Ọsẹ riẹ ọ te rẹrote owhẹ. (Mat. 6:32, 33) Jesu ọ tẹ jẹ ta nọ ma tẹ lẹ se Ọghẹnẹ inọ ọ kẹ omai ẹzi ọfuafo, ọ te kẹ omai. (Luk 11:13) Jihova o bi gine ru eware nana kẹ omai. Ẹsejọhọ who te roro ziezi whọ te kareghẹhọ eware efa nọ Jihova ọ ya eyaa rai nọ o ru kẹ owhẹ no. Wọhọ oriruo, ọ ta nọ ọ te rọvrẹ owhẹ, ọ te sasa owhẹ oma, yọ o ti wuhrẹ owhẹ. (Mat. 6:14; 24:45; 2 Kọr. 1:3) Whọ tẹ be hai roro kpahe eware nọ Ọghẹnẹ o ru kẹ owhẹ no, u ti mu owhẹ ẹro ziezi inọ o ti ru eware efa nọ ọ ya eyaa rai na gba.

HAE GHỌGHỌ FIKI ẸRUORE NỌ WHO WO

16. Fikieme ma gbẹ rọ rehọ ẹruore mai zaharo vievie he?

¹⁶ Ẹruore uzuazọ ebẹdẹ bẹdẹ nọ ma wo na yọ obọdẹ oware jọ nọ Ọghẹnẹ ọ kẹ omai. Ma riẹ nọ eware i ti woma gaga evaọ obaro. Avro ọvo ọ rrọ omai udu hu. Ẹruore mai nọ ọ wọhọ umuokọ na o re fiobọhọ kẹ omai thihakọ ebẹbẹ gbe ukpokpoma. O rẹ lẹliẹ omai kru ẹrọwọ mai nọ a tẹ make ta nọ a re kpe omai no. U te no ere no, ẹruore mai na ọ wọhọ etu-ọgaga. O re fiobọhọ kẹ omai siọ ekpehre iroro ba, o vẹ whae ze nọ ma gbe ru ekpehre oware he. Ma vẹ hai ru emamọ oware ọvo. Ẹruore mai ọ rẹ lẹliẹ omai go kẹle Ọghẹnẹ keme eware nọ ọ ta nọ o ti ru na i dhesẹ nọ o you omai gaga. Eghale buobu i re te omai nọ ma te bi ru eware nọ e rẹ lẹliẹ omai fievahọ Jihova ẹsikpobi.

17. Fikieme ẹruore nọ ma wo o be rọ lẹliẹ eva were omai?

¹⁷ Evaọ ileta nọ Pọl ukọ na o kere se inievo obọ Rom, ọ ta nọ: “Wha ghọghọ evaọ ẹruore na.” (Rom 12:12) Pọl ọ jẹ ghọghọ keme ọ riẹ nọ o te thihakọ te urere, o ti wo uzuazọ ebẹdẹ bẹdẹ evaọ obọ odhiwu. Eva e be were omai re keme ma riẹ nọ Jihova o ti ru eyaa riẹ kpobi gba. Ọso-ilezi na o kere nọ: “Jọ eva e were ohwo nọ . . . o fi ẹruore riẹ họ Jihova Ọghẹnẹ . . . Ọnọ a rẹ sai fievahọ ẹsikpobi na.”—Ol. 146:5, 6.