Oware nọ Whọ rẹ Sai Se Kpahe

Epanọ Whọ Sae rọ Ruẹ Oghẹrẹ nọ Ma Riẹ Otọ Eware jọ Evaọ Ebaibol Enẹna nọ Ukoko U Nwene No

Nẹnẹ na, Jihova ọ be rọ ẹmẹrera fiobọhọ kẹ omai riẹ otọ ẹme riẹ ziezi vi epaọ ọsosuọ. Yọ o be lẹliẹ eva were omai gaga. (Dan. 12:4) Ukoko na u nwene oghẹrẹ nọ ma riẹ otọ eware jọ evaọ Ebaibol na no. Ẹsejọ o rẹ lọhọ tere he re whọ ruẹ izoẹme nọ a jọ ta kpahe eware nana. Kọ diẹse whọ sae jọ ruẹ e rai?

• Who te rovie Watch Tower Publications Index, who je kpohọ uzoẹme nọ o ta nọ “Beliefs Clarified,” whọ te ruẹ izoẹme nọ a jọ ta kpahe eware na kpobi lele ukpe nọ a ro kere ae, no enọ a kake ta ẹme te rite enọ a ta ẹme te kẹle na. Whọ tẹ gwọlọ rọ uzoẹme gwọlọ iẹe, kere “understanding clarified” fihọ oria nọ a re kere ẹme nọ whọ be gwọlọ fihọ na evaọ Watchtower Library hayo Watchtower ONLINE LIBRARY^™.

• A jọ Obe Ekiakiẹ Rọkẹ Isẹri Jihova ta ẹme kpahe eware itieye na jọ. Jariẹ rri oria “Isẹri Jihova,” whọ te jọ otọ riẹ ruẹ “Eware nọ Ma Rọwo.” Who je rri kpobọ otọ omojọ, whọ vẹ te ruẹ “Eruvẹ Eware nọ Ma Rọwo.”

Whọ sai roro kpahe oghẹrẹ nọ ma riẹ otọ oware jọ enẹna evaọ Ebaibol na. Whọ vẹ jọ ebe ukoko na kiẹ kpahe iẹe re whọ ruẹ eware nọ a kiẹ ku evaọ Ebaibol nọ o lẹliẹ ukoko na nwene oghẹrẹ nọ ma riẹ otọ oware yena.