Oware Uwoma gbe Uyoma: Ma rẹ Jiroro Oware nọ Ma re Ru

Whọ tẹ gwọlọ kpohọ erẹ yọ who ri te oria na ẹdẹvo ho, eme who re ru?

1. 1. Kọ whọ rẹ rọ ovao rri edhere kpobi nọ u je owhẹ?

2. 2. Hayo lele ahwo, bi roro nọ a riẹ edhere?

3. 3. Manikọ whọ te gwọlọ oware nọ o rẹ kpọ owhẹ, wọhọ GPS, emapo, hayo nọ ogbẹnyusu ra jọ nọ ọ riẹ oria na re o dhesẹ edhere kẹ owhẹ?

Whọ tẹ salọ orọ ọsosuọ hayo orọ avọ ivẹ na, ẹsejọhọ who ti te oria jọ rekọ o te jọ bẹbẹ re who te obonọ whọ be nya. Whọ tẹ salọ orọ avọ esa na, who ti te oria nọ whọ be nya.

Mai kpobi ma wọhọ ohwo nọ o bi kpohọ erẹ. Wọhọ epanọ ohwo nọ o bi kpohọ erẹ ọ rẹ gwọlọ nọ o re te oria nọ ọ be nya na, ere ọvona ma gwọlọ nọ ma re wo evawere evaọ uzuazọ. Rekọ re ma sai wo evawere, ma gwọlọ oware nọ u re fiobọhọ kẹ omai jẹ emamọ iroro.

Evaọ uzuazọ, ma rẹ jiroro eware jọ nọ i wuzou tere he gbe enọ i wuzou gaga. Oware nọ ma ru u re dhesẹ oghẹrẹ eware nọ ma rri nọ i woma hayo i yoma. Yọ onana o sae wha erere hayo uye se omai avọ ahwo uviuwou mai. Eware jọ nọ ma rẹ sae jiroro rai họ:

• Owezẹ ọzae-avọ-aye gbe orọo

• Uruemu oruọzewọ, iruo, gbe ugho

• Epanọ a rẹ yọrọ emọ

• Epanọ a re yerikugbe amọfa

Ẹvẹ whọ sae rọ riẹ sọ iroro nọ whọ jẹ evaọ eware nana o te wha evawere se owhẹ avọ ahwo uviuwou ra?

Onọ nọ u fo nọ mai kpobi ma rẹ nọ omamai họ: Eme o rẹ sai fiobọhọ kẹ omẹ jẹ emamọ iroro?

Ma te jọ emagazini nana ta kpahe oware nọ ma sai ro fievahọ Ebaibol na re ọ kpọ omai, gbe epanọ ehrẹ riẹ e sai ro fiobọhọ kẹ omai.