Epanọ Ma re ro Dhesẹ nọ Ma bi Rri Ahwo nọ A Raha Uzi Oghẹrẹ nọ Jihova O bi Rri Rai

1. Eme Jihova ọ gwọlọ nọ ahwo kpobi a ru?

JIHOVA ọ ma omai inọ oware kpobi a rẹ hae ta kẹ omai hi, ma rẹ sae rọ udu obọmai ru eware jọ. U wo eware buobu nọ ma be hai ru nọ u dhesẹ nọ ere Jihova ọ ginẹ ma omai. Oware nọ o mae rro nọ ohwo ọ rẹ sae rọ udu obọriẹ ru họ nọ ọ tẹ ta nọ ọ rẹ rọ uzuazọ riẹ kẹ Jihova. Nọ o te ru ere, u dhesẹ nọ ọ gwọlọ jọ uviuwou Jihova, re ọ gọe. Yọ oware nọ Jihova ọ gwọlọ nọ ohwo kpobi o ru oye. Fikieme? Keme o you omai, yọ ọ gwọlọ nọ ma ru oware nọ o mai woma. Ọ gwọlọ nọ ma kẹle iẹe gaga re ma jẹ jọ uzuazọ bẹdẹ bẹdẹ.—Izie. 30:19, 20; Gal. 6:7, 8.

2. Eme Jihova ọ gwọlọ nọ erahaizi nọ a ri kurẹriẹ hẹ a ru? (1 Jọn 2:1)

² Jihova ọ rẹ gba ohwo ọvo họ gọe he. Ohwo kpobi nọ ọ gwọlọ gọe ọye ọ rẹ gọe. Kọ Oleleikristi nọ ọ họ-ame no ọ tẹ raha uzi, eme a re ru? Otẹrọnọ uzi ulogbo ọ raha, yọ ọ be rọwo kurẹriẹ hẹ, a re si ei no ukoko na no. (1 Kọr. 5:13) Rekọ a tẹ maki si ei no ukoko, Jihova o re gbe rẹro nọ ẹdẹ jọ o ti zihe bru ei ze. Yọ o te zihe ze, ọ rẹ rọvrẹ riẹ. Keme yọ oware jọ nọ ọ rọ fiki riẹ vi Ọmọ riẹ ze ti whu kẹ omai, re ọ sae rọvrẹ omai nọ ma te kurẹriẹ. (Se 1 Jọn 2:1.) Ọghẹnẹ mai na o you omai gaga, yọ ọ be lẹ erahaizi inọ a kurẹriẹ.—Zẹk. 1:3; Rom 2:4; Jem. 4:8.

3. Eme ma te ta kpahe evaọ uzoẹme nana?

³ Jihova ọ gwọlọ nọ ma rri uzioraha oghẹrẹ nọ o re rri uzioraha. Ọ tẹ jẹ gwọlọ nọ ma re rri ohwo nọ ọ raha uzi oghẹrẹ nọ o re rri rie. Ma te jọ uzoẹme nana ta kpahe oware yena. Nọ who bi se uzoẹme na, muẹrohọ eware nana: Orọ ọsosuọ, oware nọ a ru nọ ọzae jọ ọ raha uzi ulogbo evaọ ukoko Kọrint. Orọ avọ ivẹ, oware nọ Pọl ukọ na ọ ta nọ a ru nọ ọzae na o kurẹriẹ. Orọ avọ esa, oware nọ iku Ebaibol nana i wuhrẹ omai kpahe oghẹrẹ nọ Jihova o re rri ohwo nọ ọ raha uzi ulogbo.

OWARE NỌ A RU NỌ OHWO JỌ Ọ RAHA UZI ULOGBO EVAỌ OKE ANWAE

4. Eme ọ via oke jọ evaọ ukoko Kọrint? (1 Ahwo Kọrint 5:1, 2)

⁴ Se 1 Ahwo Kọrint 5:1, 2. Okenọ Pọl ọ jọ erẹ usi uwoma avọ esa riẹ, o yo oware jọ nọ o via evaọ ukoko Kọrint nọ o kẹ riẹ uye gaga. Oke yena, u ri kri nọ a rọ ukoko Kọrint mu hu. Usi u do te Pọl oma inọ oniọvo jọ o bi lele aye ọsẹ riẹ wezẹ. A rẹ ruẹ oware nọ u gbo tei hi. Pọl ọ ta nọ “a rẹ tubẹ jọ udevie erẹwho na” ruẹ oghẹrẹ ọfariẹ-ogbe yena ha. Inievo ukoko Kọrint na a jẹ daezọ oware nọ o jẹ via na ha. O wọhọ nọ a jẹ rehọ iẹe ya-oma dede. Ẹsejọhọ ejọ i je roro nọ uvẹ nọ a be kẹ ọzae na a bi ro dhesẹ nọ Ọghẹnẹ ọ rẹ re ohrọ mai gaga keme ọ riẹ nọ ma gba ha. Rekọ Jihova ọ kẹ omai uvẹ inọ ma raha izi riẹ epanọ u je omai hi. Oware uyoma nọ ọzae na o je ru ududu na o rẹ lẹliẹ ahwo la ukoko na eka. Yọ ẹsejọhọ ahwo jọ evaọ ukoko na nọ a je lele iei nya usu a jẹ rọ aro kele iei. Kọ eme Pọl ọ ta kẹ inievo na inọ a ru?

5. Eme Pọl ọ ta kẹ ahwo ukoko Kọrint inọ a ru, kọ eme họ otọ ẹme riẹ na? (1 Ahwo Kọrint 5:13) (Rri uwoho na re.)

⁵ Se 1 Ahwo Kọrint 5:13. Ẹzi Ọghẹnẹ o fiobọhọ kẹ Pọl kere ileta jọ se ukoko yena nọ ọ jọ ta nọ jọ a si ohwo yena nọ ọ be rọwo kurẹriẹ hẹ na no ukoko na no. Kọ nọ a te si ei no ukoko no, eme inievo nọ i kiọkọ a re ru? Pọl ọ ta kẹ ae nọ jọ a “siọ usu ba ẹnya kugbe” ohwo yena. Kọ eme họ otọ ẹme yena? Pọl o te ru ei vẹ inọ jọ a “tube lele ohwo otiọye na re emu hu.” (1 Kọr. 5:11) Ma tẹ keria bi lele ohwo otiọye na re emu, o rẹ whae ze nọ ma rẹ rọ kẹle iẹe gaga. Fikiere ẹme nọ Pọl ọ be ta na họ, joma go kẹle ohwo otiọye na ha, re ọ gbẹ whẹ ekpehre uruemu riẹ họ omai hi. (1 Kọr. 5:5-7) Inievo na a te lele ohrẹ Pọl na o sae jẹ lẹliẹ ohwo na riẹ nọ oware nọ o ru na u gbo gaga. Oma o vẹ te vo ẹe, ọ vẹ daoma kurẹriẹ.

6. Eme inievo obọ Kọrint a ru nọ Pọl o kere ileta se ai no, kọ eme ọzae nọ ọ raha uzi na o ru?

⁶ Nọ Pọl o kere ileta na se ukoko obọ Kọrint no, o te je roro sọ oware nọ o kere se ai na o te rai udu. Nọ oke jọ o vrẹ no, nọ Taitọs o je ti no obei ze, ọ tẹ ta ẹme jọ nọ ọ were riẹ gaga. Ọ vuẹ Pọl nọ inievo na a ru oware nọ o kere se ai na. (2 Kọr. 7:6, 7) A gine si ọzae na no ukoko. Rekọ u kri hi, ọzae na o te kurẹriẹ. Oware uyoma nọ o je ru na, u te mu ei eva họ ẹdha. Ọ tẹ se iẹe ba riẹriẹriẹ. O te mu oware nọ o rẹ were Ọghẹnẹ họ eru. (2 Kọr. 7:8-11) Kọ eme Pọl ọ te ta kẹ ukoko na inọ a ru obọnana?

OWARE NỌ PỌL Ọ TA KẸ INIEVO NA INỌ A RU NỌ ỌZAE NA O KURẸRIẸ NO

7. Nọ a si ọzae nọ o ru oware uyoma na no ukoko no, eme o lẹliẹ ọzae na ru? (2 Ahwo Kọrint 2:5-8)

⁷ Se 2 Ahwo Kọrint 2:5-8. Pọl o muẹrohọ nọ “ọwhọkuo nọ ogbotu a kẹ riẹ na u te kẹ ọzae otiọye na.” Ẹme yena o dhesẹ nọ, nọ a whọku ọzae na no, o kurẹriẹ. Yọ ẹjiroro nọ a rọ fiki riẹ whọku ei ọye, re ọ sai kurẹriẹ.—Hib. 12:11.

8. Eme ọfa Pọl ọ ta kẹ ahwo ukoko Kọrint nọ a ru?

⁸ Nọ Pọl ọ ruẹ nọ ọzae na o kurẹriẹ no, o te kere se ukoko na nọ: “Wha rọvrẹ riẹ jẹ sasa iẹe oma.” Ọ tẹ jẹ vuẹ ae nọ: “Wha dhesẹ kẹe nọ wha you rie.” Who te rri ẹme Pọl na, orọnikọ thakpinọ a kẹe uvẹ re o zihe ziọ ukoko na ọvo ọ ta ha. Rekọ ọ gwọlọ nọ a ta eme nọ i re dhesẹ nọ a rọvrẹ riẹ no, a ve je lele iei yeri oghẹrẹ nọ u re dhesẹ nọ erọvrẹ rai na i no obeva ze. Ọ gwọlọ nọ a ru ọzae na oghẹrẹ nọ ọ rẹ rọ riẹ nọ a you rie. A te ru ere, kọ oye u re gine dhesẹ nọ a gwọlọ nọ o zihe ziọ ukoko na.

9. Eme who roro nọ o te whae ze nọ ahwo jọ a te gbẹ kake rọvrẹ ọzae nọ o kurẹriẹ na ha?

⁹ Kọ okenọ a ta nọ jọ a dede ọzae na rehọ na, ahwo jọ a jọ ukoko Kọrint na nọ o jẹ ruọ oma ha? A ta ẹme otiọye ọvo evaọ iku na ha. Rekọ ẹsejọhọ o sae jọ nọ ahwo otiọye jọ a jariẹ. Ma riẹ nọ oware nọ ọzae na o ru na o raha odẹ ukoko na, yọ ẹsejọhọ o lẹliẹ oma vuọ inievo jọ dede. Ẹsejọhọ ejọ i je roro nọ, ‘Fikieme a jẹ ta nọ a dede ohwo otiọye na rehọ sasasa? Koyehọ mai nọ ma bi koko izi Ọghẹnẹ anwẹdẹ na ma riẹ oware nọ ma bi ru hu.’ (Je rri Luk 15:28-30.) Fikieme u ro fo re inievo nọ e rrọ ukoko Kọrint na a dhesẹ kẹ oniọvo na inọ a you rie?

10-11. Nọ ekpako na a gbẹ rọvrẹ ọzae nọ o kurẹriẹ na ha, eme ọ rẹ via?

¹⁰ Dai roro oware nọ o hae via o hae jọ nọ ekpako ukoko na a rọwo nọ a rẹ rehọ ọzae na zihe ziọ ukoko na ha, hayo nọ a rehọ iẹe ze no, a te bi ru ei wọhọ ẹsenọ eva riẹ e be were ai hi. A te ru ere, “ọkora ọgaga” ọ sae jariẹ oma. O ve ti roro nọ akpọ riẹ kpobi ọ raha no. O sae tubẹ lẹliẹe ta nọ, ‘Eme mẹ gbẹ be nyaze kẹ, mẹ nwane kpairoro vrẹ ukoko na.’

¹¹ Oware nọ u yoma vi oyena dede o sae via. Inievo na a gbẹ rọwo nọ a rẹ rọvrẹ ọzae nọ o kurẹriẹ na ha, o rẹ sae lẹliẹ eva rai dha Jihova. Fikieme o rọ rrọ ere? Keme evega itieye na u re dhesẹ nọ orọnikọ Jihova a be rọ aro kele he rekọ Setan. Ọrahauzi o te kurẹriẹ, Jihova ọ rẹ rọvrẹ riẹ. Setan họ ohwo nọ ọ rrọ eva gaga, nọ ọ rẹ rọvrẹ hẹ. Inievo na a gbẹ rọvrẹ ọzae na ha, yọ a zihe ruọ ahwo nọ Ẹdhọ o bi ti ro ruiruo no, re o ru ọzae na siọ Jihova ba ẹgọ.—2 Kọr. 2:10, 11; Ẹf. 4:27.

12. Eme inievo ukoko na a re ru nọ u re dhesẹ nọ a be rọ aro kele Jihova?

¹² Kọ eme inievo nọ e rrọ ukoko Kọrint na a re ru re a dhesẹ nọ Jihova a be rọ aro kele orọnikọ Setan he? A re ru ọzae na oghẹrẹ nọ Jihova o re ru erahaizi nọ i kurẹriẹ. Ahwo jọ nọ Jihova o ro kere Ebaibol na a dhesẹ oghẹrẹ nọ Jihova ọ rrọ. Devidi ọ ta kẹ Jihova nọ: “Who woma, O Jihova, yọ whọ ruẹrẹ oma kpahe re whọ rọvrẹ.” (Ol. 86:5) Maeka o kere kpahe Jihova nọ: “Ono họ Ọghẹnẹ wọhọ owhẹ, nọ ọ rẹ kpairoro vrẹ iruthọ jẹ rehọ izieraha rọvrẹ?” (Mae. 7:18) Aizaya ọ tẹ jẹ ta nọ: “Jọ orumuomu na ọ nyasiọ edhere omuomu riẹ ba re ohwo oyoma na ọ siọ iroro iyoma riẹ ba; jọ o zihe bru Jihova, ọnọ ọ te re ohrọ riẹ, jọ o zihe bru Ọghẹnẹ mai, keme ọ te rọvrẹ evaọ edhere ologbo.”—Aiz. 55:7.

13. Eme u je fo re a wariẹ rehọ ọzae nọ o kurẹriẹ na ziọ ukoko na? (Rri ẹkpẹti na “Oke Vẹ A rọ Wariẹ Rehọ Ọzae Obọ Kọrint na Ziọ Ukoko Na?”)

¹³ Inievo obọ Kọrint na a tẹ gwọlọ nọ a re ru ọzae na oghẹrẹ nọ Jihova o re ru erahaizi nọ i kurẹriẹ, a re dede iei rehọ, a vẹ ta kẹe nọ a you rie. Inievo na a gine ru oware nọ Pọl ukọ na ọ ta kẹ ae nọ a ru na. A dede ọzae nọ o kurẹriẹ na rehọ. U te dhesẹ nọ a bi “yoẹme evaọ eware kpobi.” (2 Kọr. 2:9) Dede nọ emerae jọ ọvo e vrẹ no nọ a ro si ọzae na no ukoko, oware nọ a ru rie na u fiobọhọ kẹe kurẹriẹ no. Fikiere u du gwọlọ nọ a gbe rri rie tao ho, a rẹ wariẹ rehọ iẹe ze.

JOMA RỌ ARO KELE JIHOVA BRU UVIOZIẸ JẸ RE OHRỌ AHWO

14-15. Eme oware nọ a ru ọzae nọ ọ raha uzi evaọ ukoko Kọrint na u wuhrẹ omai? (2 Pita 3:9) (Rri uwoho na re.)

¹⁴ Oware nọ o via evaọ ukoko Kọrint na o rrọ usu eware nọ a kere fihotọ “re ma wuhrẹ no ai ze.” (Rom 15:4) Iku yena i dhesẹ nọ Jihova ọ rẹ kẹ idibo riẹ uvẹ re a hai mu raha izi riẹ epanọ u je rai hi. Nọ ohwo ọ tẹ raha uzi ulogbo, o gbe kurẹriẹ hẹ, Jihova ọ gwọlọ nọ a kẹe uvẹ re ọ gbẹ jọ ukoko na ha, re ọ gbẹ hai kuomagbe idibo riẹ nọ e be gọe ziezi. Orọnọ a tẹ kẹe uvẹ inọ ọ jọ ukoko na ghele, oye họ ohrọ-oriọ họ. Jihova o wo ohrọ-oriọ, rekọ ọ rẹ kẹ idibo riẹ uvẹ re a mu ru epanọ u je rai hi. Yọ o re nwene izi riẹ re e sai kiehọ ahwo kpobi oma ha. (Jud 4) O te ru ere, yọ o wo ohrọ-oriọ họ. Keme o rẹ lẹliẹ ahwo na kpobi mu ikpehre eware họ eru evaọ ukoko na.—Itẹ 13:20; 1 Kọr. 15:33.

¹⁵ Iku nọ ma jọ obe Kọrint se na i te je wuhrẹ omai nọ, Jihova ọ gwọlọ nọ a raha ohwo ọvo kufiẹ hẹ. Ọ gwọlọ fiobọhọ kẹ ohwo kpobi nọ ọ be daoma gọe re ọ sae zọ. Nọ ohwo o te kurẹriẹ, ọ jẹ be daoma ru oware nọ o rẹ were iẹe, ọ rẹ re iẹe ohrọ. (Izik. 33:11; se 2 Pita 3:9.) Yọ oware yena o wha riẹ ze nọ Jihova ọ rọ rehọ ẹzi riẹ kpọ Pọl inọ o kere se ukoko Kọrint inọ jọ a rọvrẹ ọzae nọ o kurẹriẹ na, je dede iei rehọ.

16. Nọ who te rri oghẹrẹ nọ a ro bruoziẹ ọzae obọ Kọrint na, ẹvẹ o lẹliẹ owhẹ rri Jihova?

¹⁶ Oghẹrẹ nọ a ru ọzae nọ o kurẹriẹ evaọ ukoko Kọrint na, o lẹliẹ omai riẹ nọ Jihova o wou gaga, o kiẹrẹe, yọ ọ rẹ riẹ oziẹ bru. (Ol. 33:5) Kọ o gbẹ lẹliẹ eva Ọghẹnẹ mai na were owhẹ gaga? Mai kpobi erahaizi, ohwo ọvo nọ o re ruthọ họ ọ riẹ hẹ. Yọ oware o tẹ thọ omai obọ, ma rẹ gwọlọ nọ a rọvrẹ omai. Ma yere Ọghẹnẹ gaga inọ o vi Ọmọ riẹ ze ti whu kẹ omai re ọ sae rọ izieraha mai vrẹ omai. A rẹ ruẹ oware nọ u woma tei hi! Eva e were omai gaga inọ Jihova o you ahwo riẹ, yọ ọ gwọlọ fiobọhọ kẹ omai wo uzuazọ.

17. Enọ vẹ ma te kẹ iyo rai evaọ izoẹme efa nọ ma ti wuhrẹ?

¹⁷ Kọ ohwo o te ru oware uyoma nẹnẹ, oghẹrẹ vẹ a re guẹdhọ riẹ? Kọ eme ekpako ukoko a re ru nọ u re dhesẹ nọ a be rọ aro kele Jihova fiobọhọ kẹ ohwo na re o kurẹriẹ? Kọ eme mai kpobi ma re ru nọ ekpako na a te si ohwo jọ no ukoko, hayo rehọ ohwo nọ a si no ukoko zihe ze? Ma te ta ẹme kpahe eware nana evaọ izoẹme nọ i kiọkọ nọ ma ti wuhrẹ na.