Iruo Jihova nọ Me Ru No E Were Omẹ Oma

AHWO UWOU MAI KPOBI A JỌ EGAGỌ ỌVONA HA

A yẹ omẹ evaọ 1934. Ọsẹgboni mẹ yọ ahwo Switzerland. A kwa ze te rria ẹwho nọ a re se Timmins, evaọ obonọ a re se Ontario evaọ Canada. A rẹ jọ ẹwho na tọ eware eghaghae no otọ ze. Evaọ oware wọhọ 1939, Uwou-Eroro Na o tẹ jẹ hai te oni mẹ obọ nọ o re se. O te ti mu ewuhrẹ họ ẹnya, yọ ọ jẹ hae wha omẹ avọ inievo ezeza mẹ lele oma. U kri hi, o te ti kurẹriẹ ruọ ukoko Isẹri Jihova.

Eva e dha ọsẹ mẹ inọ oni mẹ o zihe ruọ Osẹri Jihova keleme. Rekọ ukoko Jihova o were oni mẹ gaga yọ ọ gwọlọ noi hi. Nọ ukpe 1940 o vrẹ no, a tẹ jọ Canada ta nọ a gbẹ gwọlọ Isẹri Jihova ha. Rekọ oni mẹ ọ siọ Jihova ba ẹgọ ghele he. Ọsẹ mẹ ọ jẹ hae ta ikpehre eme kẹ oni mẹ. Rekọ oni mẹ ọ jẹ hae rọ unu kpotọ ta ẹme kẹe avọ adhẹẹ. Emamọ uruemu oni mẹ u ru nọ mẹ avọ inievo mẹ ma rọ ta nọ ma rẹ jọ ukoko na. Oware Ọghẹnẹ na, nọ u te oria jọ no, ọsẹ mẹ ọ gbẹ jẹ wọso oni mẹ tere he. Ọ tẹ jẹ riẹ omai ru.

ME MU IRUO ODIBỌGBA OKE-KPOBI HỌ

Evaọ ukpe 1950, me te kpohọ okokohọ evaọ obọ New York City. Uzoẹme riẹ họ Theocracy’s Increase. Mẹ ruẹ inievo buobu nọ i no eria avọ eria akpọ na ze. A kiẹ inievo nọ i no Isukulu Giliad nwrotọ no riwi. Iku rai e were wo umuo ho. Enana kpobi e tẹ lẹliẹ omẹ ta nọ mẹ rẹ daoma viere evaọ ukoko na. O tẹ jọ omẹ oja gaga inọ me re mu ọkobaro oke-kpobi họ. Nọ mẹ nwani no okokohọ na te uwou, me te fi obe họ inọ mẹ rẹ jọ ọkobaro oke-kpobi. A te kere ileta no obọ uwou ogha Canada se omẹ inọ jọ mẹ họ-ame tao, re mẹ tẹ te sae jọ ọkobaro. Mẹ tẹ họ-ame evaọ ẹdẹ ọsosuọ Akpe 1950. Nọ amara ọvo ọ jẹ vrẹ no, me te mu ọkobaro oke-kpobi họ. Oria ọsosuọ nọ a vi omẹ kpohọ họ ẹwho nọ a re se Kapuskasing. Ẹwho na o thabọ gaga no ẹwho nọ ma jẹ rria.

Evaọ ukpe 1951, uwou ogha o tẹ ta nọ jọ inievo nọ e riẹ ẹvẹrẹ French ẹta a rri sọ a sae kwa kpohọ ofẹ Canada nọ a re se Quebec. French a rẹ jọ ofẹ yena ta. Ahwo a vọ riẹ nọ a rẹ ta usi uwoma kẹ evaọ obei. Te Oyibo te French mẹ ta no emaha mẹ ze. Fikiere mẹ tẹ ta nọ mẹ rẹ nya. A te vi omẹ kpobọ Rouyn. Whaọ mẹ jọ obei riẹ ohwo ọvo ho. Adrẹse oria na ọvo a kẹ omẹ wọhọ epanọ mẹ ta evaọ obọ emuhọ na. Rekọ Ọghẹnẹ ọ ghale onya mẹ na. Mẹ avọ Brọda Marcel nọ mẹ fodẹ ẹsiẹ na ma tẹ te kẹle ohwohwo gaga. Ikpe ene soso mẹ jọ obọ Quebec. A tẹ te rọ omẹ mu ọkobaro obọdẹ uwhremu na.

ME KPOHỌ ISUKULU GILIAD, YỌ U KRI RE EWARE JỌ I TE TI TE OMẸ OBỌ

Nọ mẹ jọ Quebec, ukoko u te kere ze inọ a gwọlọ nọ me kpohọ Isukulu Giliad evaọ obọ South Lansing, evaọ New York. Yọ oye o te jọ eklase avọ udhegbezeza. Eva e were omẹ gaga. Mẹ tẹ nya. Me te nwrotọ no isukulu na evaọ edẹ ikpegbivẹ Ava 1956. A tẹ ta nọ a ti vi omẹ kpohọ orẹwho nọ a bi se Ghanab enẹna evaọ West Africa. Rekọ a vuẹ omẹ nọ me zihe kpobọ Canada tao, re mẹ jọ obei evaọ eka jọ bẹsenọ a rẹ nya onya ebe-udu nọ me re ro kpobọ Ghana no.

Oware nọ me je roro nọ eka jọ ọvo na, u kri te emerae ihrẹ soso. Obọ Toronto mẹ jọ oke yena jẹ hẹrẹ. Uwou Brọda Cripps mẹ jẹ rria. Ọye avọ aye riẹ gbe emọ riẹ a daoma kẹ omẹ gaga. Etẹe mẹ rọ riẹ ọmọtẹ rai jọ nọ a re se Sheila. Mẹ avọ iẹe ma tẹ te were ohwohwo gaga. Nọ u te epanọ mẹ te rọ vuẹe nọ mẹ gwọlọ rehọ iẹe, obe-udu nọ me re ro kpobọ Ghana o tẹ nwani kpozi. Mẹ avọ Sheila ma tẹ lẹ kpahe oware na. Ma tẹ ta nọ jọ me kpohọ obonọ ukoko u vi omẹ nya na tao. Ma ta nọ ma te hai kere ileta se ohwohwo, ma vẹ te riẹ sọ ma sae rehọ ohwohwo, ma ve fi ẹdẹ họ. Iroro yena nọ ma jẹ na o lọhọ tere he, rekọ me te rri epanọ eware e nya uwhremu na, mẹ ruẹ nọ emamọ iroro ma jẹ na.

Mẹ tẹ ruọ edhere. Mẹ ruọ itreni, me te no etẹe ruọ okọ-oyibo, kẹsena mẹ tẹ ruọ arupre. Me te te Accra, evaọ obọ Ghana. Amara ọvo onya mẹ na kpobi o rehọ. A tẹ rọ omẹ mu ọsẹro ubrotọ nọ me te obei. Mẹ tẹ jẹ hai kpohọ eria avọ eria evaọ Ghana, Ivory Coast nọ a bi se Côte d’Ivoire enẹna, gbe Togoland nọ a bi se Togo enẹna. Omoto nọ uwou ogha o kẹ omẹ, mẹ jẹ hae dhẹ. Yọ ẹsibuobu mẹ ọvo usu. Oma ọvo o jẹ were omẹ oke yena.

Evaọ Ẹdẹ-Ọmaha gbe Ẹdoka, me re ru ẹme evaọ ikokohọ okogho. Oke yena Egwa Okokohọ e jariẹ hẹ. Nọ okokohọ o te bi te no, inievo na a rẹ rọ ikpoko tehe eria nọ ahwo a rẹ keria, a vẹ rọ eya iriẹ hwa ehru rai re uvo u gbe kpe ahwo ho. Ma wo ifriji nọ a re fi emu nọ a there no họ họ. Fikiere a jẹ hai thuru erao jọ fihọ oria nọ a bi jo ru okokohọ na nọ a re kpe ro there emu kẹ ahwo nọ a nyaze.

Who te yo iku eware jọ nọ e via oke yena, whọ rẹ hwẹ oma sa no. Ẹdẹ jọ, Brọda Herb Jenningsc nọ ọ jọ imishọnare re, o te je ru ẹme evaọ okokohọ jọ. Ere imẹlu jọ ọ rọ vabọ no obonọ a re fi erao họ na. Ọ tẹ dhẹ oria nọ o rrọ udevie eplatfọmo gbe oria nọ ahwo a rẹ keria na vrẹ. Brọda Herb o te fibo tao. Imẹlu na omariẹ ọ gbẹ riẹ onọ o re ru hu. Inievo-emezae ene jọ nọ e goma gaga a tẹ zaza abọ mu ei, a te mu ei zihe fihọ oria nọ ọ rẹ jọ. Inievo na kpobi a tẹ koyẹ kẹ ae.

Nọ ma te ru okokohọ jọ no, edẹ nọ i kiọkọ taure ma te ti ru ọfa, me re dhesẹ ividio The New World Society in Action kẹ ahwo iwhre nọ e kẹle oyena. Me re thuru omohọ ọfuafo jọ fihọ udevie ekpọ ivẹ hayo ire ivẹ. Nọ me je ti kporo ividio na, a vẹ be ruẹ e riẹ evaọ omohọ na. Ividio na e jẹ hae were ahwo na gaga. Ibuobu rai a ri rri ifimu ẹdẹvo ho. Nọ a tẹ be jọ ividio na dhesẹ ahwo nọ a be họ-ame, ae omarai a vẹ be tehe abọ ọvo. Ividio na o lẹliẹ ahwo ruẹ nọ mai Isẹri Jihova nọ e rrọ akpọ na soso, ọvo ma rrọ.

Nọ mẹ rria unuakpọ Africa te enwenọ ikpe ivẹ no, me te kpohọ okokohọ akpọ-soso nọ a ru evaọ New York City evaọ 1958. Mẹ tẹ wariẹ ruẹ Sheila nọ o no obọ Quebec ze. Yọ ọkobaro obọdẹ ọ rrọ evaọ obei. Enẹ ọvo eva e jẹ were omẹ di. Mẹ avọ iẹe ma bi kere ileta se ohwohwo anwẹdẹ. Nọ ma jẹ te wariẹ ruẹ ohwohwo, mẹ tẹ vuẹe nọ mẹ gwọlọ rehọ iẹe. Ọ tẹ rọwo. Me te kere ileta se Brọda Knorrd re mẹ nọe sọ a sai zizie Sheila kpohọ Isukulu Giliad, ọ vẹ nyaze ti kuomagbe omẹ evaọ obọ Africa. Ọ tẹ rọwo. Sheila ọ tẹ ziọ obọ Ghana. Ma tẹ ruọ orọo evaọ Accra, evaọ edẹ esa Akpe 1959. Ma ruẹ nọ Jihova ọ ginẹ ghale omai fikinọ iruo riẹ ma rọ karo.

A VI OMẸ AVỌ AYE MẸ KPOBỌ CAMEROON

Evaọ ukpe 1961, a te vi omẹ avọ aye mẹ kpobọ Cameroon. A tẹ vuẹ omẹ inọ mẹ nya onya epanọ a rẹ rọ bọ uwou ogha họ obei. Okolo iruo ho. A tẹ rọ omẹ mu odibo uwou ogha na. Yọ mẹ riẹ kpahe iruo na tere he, fikiere eware buobu e riẹ nọ me je wuhrẹ. Rekọ evaọ 1965, aye mẹ o te dihọ. Uzẹme riẹ họ, u je gbe omai unu gaga inọ ọsẹgboni ohwo jọ ma be te ginẹ jọ na. Ẹmẹrera na, u gbe je gbe omai unu hu. Eva i te ti mu omai họ ẹwere inọ ma bi ti yẹ ọmọ. Ma tẹ jẹ ma omaa epanọ ma ti ro zihe kpobọ Canada. Oke yena oware okpẹtu jọ o tẹ via.

Eva i no aye mẹ. Edọktọ ọ vuẹ omai nọ ọmọzae o je ti yẹ vẹre na. O vrẹ ikpe udhuvẹ-gbikpe no nọ oware na o rọ via, rekọ u je no omai ẹro ho. O da omai gaga. Rekọ ma gbe zihe kpo ho. Ma gbe je ru iruo Uvie na evaọ obonọ ma jọ na. Yọ iruo na e ginẹ were omai.

Ẹsibuobu a jẹ hai kpokpo inievo nọ e rrọ Cameroon fikinọ a be rọwo dhomahọ ẹme isuẹsu hu. Ẹsenọ a te bi votu re a riẹ ohwo nọ o re su orẹwho na, ẹsiẹe a rẹ mai kpokpo inievo na. Evaọ edẹ ikpegbesa Asoi 1970, oware jọ nọ ma jẹ lẹ nọ o du via ha o tẹ via. Egọmeti orẹwho na o ta nọ a gbẹ gwọlọ Isẹri Jihova ha. Egọmeti o te mi omai uwou ogha uwowoma mai na no. Oke yena emerae isoi ọvo e vrẹ no nọ a rọ bọ uwou ogha na. U tube te oka ọvo ho, a te le omẹ avọ aye mẹ gbe imishọnare efa kpobi no orẹwho na no. Ma you inievo obọ Cameroon na gaga. Fikiere o jẹ da omai nọ a je le omai vrẹ se ae ba. Yọ ma jẹ ruawa inievo na keme ma riẹ epanọ eware e be te jọ kẹ ae he.

Ma te kpohọ uwou ogha France, yọ emerae ezeza ma jọ obei. Mẹ tẹ jọ obei jẹ dao utho nọ mẹ sae dao re me fiobọhọ kẹ inievo obọ Cameroon. Evaọ Akpegbivẹ ukpe yena, ukoko u te vi omai kpohọ uwou ogha Nigeria. Kọ etẹe ukoko o jẹ jọ rẹrote iruo Uvie na evaọ obọ Cameroon. Inievo nọ e rrọ Nigeria a whẹtiẹ omai họ oma. Ma tẹ jọ etẹe ru iruo evaọ ikpe buobu. Yọ eva e ginẹ were omai.

IRORO JỌ E BẸ OMAI ẸJẸ

Evaọ 1973, oware jọ o via nọ u ru nọ iroro e rọ bẹ omai ẹjẹ gaga. Anwọ oke jọ ze, oma o be riẹ aye mẹ ru vievie he. Ọ be duọ oma họ ru iruo na. Nọ ma kpohọ okokohọ ologbo evaọ New York, oma na o tẹ jẹ kẹe uye gaga. Ọ tẹ ta kẹ omẹ nọ: “Me gbe wo ẹgba nọ mẹ te sai gbe ro ru iruo nọ ma bi ru na ha. Ẹmẹmọ ọvo mẹ be mọ.” O vrẹ ikpe ikpegbene no nọ o bi ro lele omẹ ru iruo Uvie na evaọ obọ West Africa. Eva riẹ e were omẹ gaga keme ọ ginẹ rọ udu dhe iruo na. Rekọ ma ruẹ nọ ma rẹ jiroro jọ. Ma lẹ kpahe iẹe gaga. Ma tẹ ta nọ ma re dhugbe zihe kpobọ Canada re a sae jọ obei siwi iei ziezi. Ere ma ro gine no iruo imishọnare, ma gbẹ jọ iruo odibọgba oke-kpobi hi. O da omai gaga. O bẹ omai gaga re ma jiroro inọ ma re no iruo na. Iroro e re bẹ omai ẹjẹ tere ẹdẹvo ho.

Nọ ma te obọ Canada no, oniọvo jọ nọ mẹ avọ iẹe ma riẹ oma kri no ọ tẹ rehọ omẹ iruo. Ọ rẹ zẹ imoto evaọ ẹwho nọ ọ rrọ ẹkpẹlobọ ovatha-ọre Toronto. Ma tẹ haya uwou, ma tẹ dẹ egbara gbe emeware anwae jọ fihọ uwou na. Yọ ma yere Ọghẹnẹ inọ ma momo ugho rọ dẹ oware ovo ho nọ ma kwa nya na. Ma gwọlọ yeri uzuazọ okpohwo ho keme ma jẹ gwọlọ nọ ma rẹ wariẹ jọ iruo odibọgba oke-kpobi na ẹdẹfa. U kri hi, ma tẹ ginẹ wariẹ mu iruo odibọgba oke-kpobi họ. U gbe omai unu dede.

A jẹ bọ Ọgwa Okokohọ fihọ Norval evaọ Ontario. Mẹ tẹ jẹ hai kpohọ etẹe nyai ru iruo evaọ Ẹdẹ-Ọmaha. Nọ u te oria jọ, a tẹ vuẹ omẹ nọ mẹ jọ ọsẹro Ọgwa Okokohọ na. Yọ oma aye mẹ Sheila o muhọ ekpo no. Ma ruẹ nọ ọ te sai lele omẹ ru iruo na. Fikiere ma tẹ kwa kpohọ obeva Ọgwa Okokohọ na evaọ Azeza 1974. Eva e were omai gaga inọ ma wariẹ mu iruo odibọgba oke-kpobi họ no.

Oware nọ Ọghẹnẹ o re ru na, oma aye mẹ o tẹ jẹ kẹe uvẹ gaga. Ikpe ivẹ nọ i lele i rie, a tẹ rọ omẹ mu ọsẹro okogho. Okogho nọ ma je rri ọ jọ ubrotọ Canada nọ a re se Manitoba. Ekpahe e rẹ jọ gaga evaọ obei nọ u te te ezi ekpahe no. Rekọ oma o jẹ were omai gaga nọ ma tẹ rrọ kugbe inievo obei. Ma ruẹ nọ orọnikọ oria nọ ma rrọ họ ẹme na ha. Oware nọ o mae roja họ, re ma gbe ru iruo kẹ Jihova evaọ oria kpobi nọ ma rrọ.

ME WUHRẸ OWARE JỌ NỌ U WUZOU GAGA

Nọ mẹ jọ ọsẹro okogho te ikpe buobu no, evaọ ukpe 1978, ukoko o tẹ ta nọ joma mu iruo họ eru evaọ uwou ogha Canada. U kri hi, oware jọ o tẹ via, yọ me wuhrẹ oware jọ nọ u wuzou gaga noi ze, o make rọnọ o lọhọ tere he. A kẹ omẹ ẹme nọ a re ru auwa ọvo gbe iminiti ọgba evaọ ewuhrẹ obọdẹ jọ nọ a ru evaọ Montreal. Ẹvẹrẹ French me ro ru ẹme na. Rekọ ẹme mẹ na o sae daruọ ahwo oma ha. Oniọvo jọ nọ o bi ru iruo evaọ Ẹko-Iruo Ẹruorote Iruẹru Ikoko ọ tẹ kẹ omẹ ohrẹ fiki ẹme na. Anwọ oke yena ze, mẹ rọ riẹ nọ mẹ nwani wo onaa ẹme tere he. Rekọ oke yena mẹ jẹ kaki roro nọ me re ru ẹme gaga. Ohrẹ nọ oniọvo na ọ kẹ omẹ na o were omẹ tere he. Eva e dha omẹ. Me je rri oniọvo na nọ iruthọ mẹ ọvo ọ be gwọlọ, inọ o tube jiri omẹ vievie he. Oghẹrẹ nọ me rri oniọvo na gbe oghẹrẹ nọ ọ rọ kẹ omẹ ohrẹ na ọvo me roro kpahe. Me gine rri oware na thọ.

Nọ emedẹ jọ e vrẹ no, oniọvo jọ nọ ọ rrọ Ogbẹgwae Uwou Ogha na o te se omẹ ta ẹme kẹ fiki ẹme na. Mẹ tẹ ta nọ oware nọ me ru na u gine woma ha. Me te wounu kẹ oniọvo nọ ọ kẹ omẹ ohrẹ na. Ọyomariẹ ọ tẹ ginẹ kpairoro vrẹ. Mẹ jọ oware nọ o via na wuhrẹ oware jọ nọ o rẹ thọrọ omẹ ẹro ho. Me wuhrẹ nọ o roja gaga re mẹ romakpotọ. (Itẹ 16:18) Mẹ lẹ se Jihova gaga kpahe oware nana no. Yọ mẹ jọ udu mẹ gbaemu nọ ẹdẹfa kpobi nọ a tẹ kẹ omẹ ohrẹ, me re gbe ru oware nọ me ru na ha.

O vrẹ ikpe udhuvẹ no nọ me bi ro ru iruo evaọ Ebẹtẹle Canada. Yọ anwọ ukpe 1985 ze, mẹ rọ rrọ Ogbẹgwae Uwou Ogha na. Evaọ Ava 2021, aye oyoyou mẹ na, Sheila o te whu. O bi no omẹ ẹro ho. Yọ mẹ omamẹ avọ ẹyao nọ ọ be lahiẹ omẹ. Rekọ iruo Jihova nọ me bi ru ẹsikpobi u bi ru eva were omẹ, fikiere mẹ be “kaki muẹrohọ epanọ edẹ uzuazọ [mẹ] e be dhẹ vẹrẹ te he.” (Ọtausi. 5:20) Dede nọ ebẹbẹ jọ i te omẹ no, eghale nọ i te omẹ no i bu vi ebẹbẹ na kpekufiẹ. Eva e be were omẹ gaga fikinọ iruo Jihova mẹ rọ karo evaọ uzuazọ mẹ. Anwọ ikpe udhosa-gbikpe ena nọ mẹ rọ rrọ iruo odibọgba oke-kpobi na. Ajọ izoge nọ e rrọ ukoko na a gbẹ daoma rọ iruo Jihova karo evaọ uzuazọ rai. Mẹ ta ere keme mẹ riẹ vevẹ nọ a te ru ere, a ti wo eghale buobu re, yọ eva e te were ae. Yọ ohwo nọ o ru iruo Jihova ọvo, ọye ọ rẹ sai yeri emamọ akpọ otiọye na.