UZOẸME UWUHRẸ 10
OLE AVỌ 31 Lele Ọghẹnẹ Nya
Daoma Wo Oghẹrẹ Iroro nọ Jihova avọ Jesu A Wo
“Nọ orọnọ Kristi ọ ruẹ uye evaọ oma uwo na, whai omarai re wha ruẹrẹ oma kpahe re wha wo oghẹrẹ iroro riẹ.”—1 PITA 4:1.
OWARE NỌ A JARIẸ TA KPAHE
Epanọ Pita ukọ na ọ rọ daoma rri eware epanọ Jesu o re rri eware, gbe epanọ ma sai ro ru ere re.
1-2. Eme gbe eme ma re ro you Jihova, kọ eme Jesu o ru nọ u dhesẹ nọ o gine you Jihova ere?
JESU ọ ta nọ: “Whọ rẹ rehọ udu ra kpobi gbe uzuazọ ra kpobi gbe ẹgba ra kpobi gbe iroro ra kpobi ro you Jihova Ọghẹnẹ ra.” (Luk 10:27) Jesu ọ ta nọ oye họ ujaje nọ o mae rro evaọ Uzi Mosis na. Ọ ta nọ udu mai kpobi ma re ro you Jihova. Udu nọ ọ ta na, koyehọ te eware nọ ma gwọlọ gbe enọ i re si omai urru. Ọ tẹ jẹ ta nọ ma rẹ rọ uzuazọ mai kpobi gbe ẹgba mai kpobi ro you Jihova re. Oware ọfa nọ Jesu ọ ta nọ ma re ro you Jihova họ iroro mai. Koyehọ te oghẹrẹ nọ ma bi rri eware. Ma riẹ nọ ma sae nwane riẹ oware kpobi kpahe oghẹrẹ nọ Jihova o re rri eware he. Rekọ ma tẹ daoma wuhrẹ kpahe “iroro Kristi,” ma te riẹ oghẹrẹ nọ Jihova o re rri eware ziezi. Oware nọ o rọ rrọ ere na họ, epanọ Jihova o re rri eware, ere Ọmọ riẹ Jesu o re rri eware re.—1 Kọr. 2:16.
2 Jesu ọ rọ iroro riẹ kpobi you Jihova. Ọ riẹ oware nọ Ọghẹnẹ o vi rie ze ti ru. Ọ riẹ nọ o te ru ei, a te rọ uye bẹe dede nọ o ru oware ovo thọ họ. O make rrọ ere na, ọ gwọlọ nọ o re ru oware nọ Ọsẹ riẹ o vi rie ze ti ru. Jesu ọ gwọlọ nọ oware ovo o rẹ whae ze nọ o gbe ro ru oware nọ Ọsẹ riẹ o vi rie ze ti ru hu hu.
3. Eme Pita ukọ na o wuhrẹ mi Jesu, kọ eme ọ ta kẹ Ileleikristi nọ a ru? (1 Pita 4:1)
3 Pita gbe ikọ nọ i kiọkọ a jẹ hae jọ kugbe Jesu. A jẹ hai muẹrohọ oghẹrẹ nọ o re rri eware. Uvẹ nọ u te rai obọ na o rro kẹhẹ! Evaọ ileta ọsosuọ nọ ẹzi Ọghẹnẹ ọ wọ Pita kere se Ileleikristi, ọ ta kẹ ae nọ jọ a wo oghẹrẹ iroro nọ Jesu Kristi o wo.a (Se 1 Pita 4:1.) Pita ọ ta nọ: “Wha ruẹrẹ oma kpahe re wha wo oghẹrẹ iroro riẹ.” Ẹme nọ Pita o kere na, a jẹ hae rehọ iẹe dhesẹ isoja nọ e ruẹrẹ oma kpahe kẹ ẹmo. Oyena o dhesẹ nọ ma te wo oghẹrẹ iroro nọ Jesu o wo, kiyọ ma wo oware nọ ma ti ro fi kparobọ no evaọ ẹmo na. Ẹmo vẹ ọye? Oye họ ẹmo nọ uzioraha nọ ma reuku riẹ gbe akpọ Ẹdhọ nana o bi fi omai.—2 Kọr. 10:3-5; Ẹf. 6:12.
4. Eme ma te jọ uzoẹme nana wuhrẹ nọ u ti fiobọhọ kẹ omai ru oware nọ Pita ọ ta na?
4 Ma ti wuhrẹ kpahe epanọ Jesu ọ jẹ hai rri eware, gbe epanọ ma sae rọ rehọ aro kele iei. Eware esa ma ti wuhrẹ. Ọrọ ọsosuọ, epanọ ma sai ro rri eware epanọ Jihova o re rri eware, mai kpobi ma ve ti wo iroro evo. Ọrọ avọ ivẹ, epanọ ma re ro wo omaurokpotọ. Ọrọ avọ esa, epanọ olẹ o sai ro fiobọhọ kẹ omai wo iroro nọ e gba.
RRI EWARE EPANỌ JIHOVA O RE RRI EWARE
5. Eme Pita o ru oke jọ nọ u dhesẹ nọ o je rri eware epanọ Jihova o bi rri eware he?
5 Oware nọ Pita o ru oke jọ u dhesẹ nọ oghẹrẹ nọ Jihova o bi rri eware sa, obonọ Pita o bi roro rri sa. Jesu ọ ta kẹ ikọ riẹ nọ o ti kpobọ Jerusalẹm. Ọ vuẹ rai nọ isu egagọ nọ e rrọ obei a te rọ uye bẹe, a ve ti kpei no. (Mat. 16:21) Ẹsejọhọ Pita o je roro nọ, ‘Whaọ Jesu họ Mesaya nọ a ya eyaa riẹ na. Ọye mai ahwo Izrẹl ma rẹroso inọ o ti siwi omai. Kọ ẹvẹ Jihova ọ rẹ kuvẹ re ohwo otiọye na o whu?’ (Mat. 16:16) Pita o te se Jesu họ akotọ. Ọ tẹ ta kẹe nọ: “Whọ rọ uye bẹ omara ha Olori; onana o rẹ via kẹ owhẹ vievie he.” (Mat. 16:22) Pita o je rri eware epanọ Jihova o bi rri eware he. Fikiere obonọ Jesu o bi roro rri sa, obonọ Pita o bi roro rri sa.
6. Eme Jesu o ru nọ u dhesẹ nọ o bi rri eware epanọ Jihova o re rri eware?
6 Nwanọ epanọ Jihova o rri eware na, ere Jesu o je rri eware. Jesu ọ ta kẹ Pita nọ: “Ruọ emu mẹ, Setan! Whẹ yọ utho ezoruẹ kẹ omẹ keme orọnọ iroro Ọghẹnẹ who bi roro na ha, rekọ erọ ahwo-akpọ.” (Mat. 16:23) Ẹsejọhọ emamọ eva Pita ọ rọ ta ẹme na kẹ Jesu na. Rekọ Jesu ọ rehọ ẹme na ha. Fikieme? Orọnikọ Jihova o vi Jesu ze te reakpọ kuoma re o zihe he, rekọ ọ rẹ ruẹ uye je whu. Pita ọ jọ oware nọ o via na wuhrẹ nọ u fo re o rri eware epanọ Ọghẹnẹ o re rri eware.
7. Eme Pita o ru uwhremu na nọ u dhesẹ nọ o bi rri eware epanọ Jihova o bi rri eware? (Rri uwoho nọ o rrọ uke Uwou-Eroro na.)
7 Oware nọ Pita o ru uwhremu na u dhesẹ nọ ọ gwọlọ rri eware epanọ Jihova o bi rri eware. Nọ oke nọ Jihova o fihọ u te, ọ tẹ gwọlọ nọ ahwo nọ a jọ ahwo Ju hu nọ e yawo ho, a rẹ jọ ukoko na. Ọghẹnẹ o te vi Pita re ọ nyae ta usi uwoma kẹ Kọniliọs nọ ọ jọ ohwo Ju hu. Ọ jọ usu ahwo ọsosuọ nọ i kurẹriẹ nọ e yawo ho nọ Pita ọ ta usi uwoma kẹe no. Ahwo Ju a jẹ hai ru eware kugbe ahwo erẹwho efa ha. Fikiere Pita nọ ọ rrọ ohwo Ju na o gbe nwene oghẹrẹ nọ o bi rri eware he, ọ te sae nyae ta usi uwoma kẹ ahwo erẹwho efa ha. Nọ Pita ọ riẹ oghẹrẹ nọ Ọghẹnẹ o bi rri eware no, o gbe je rri ahwo na epanọ o je rri rai vẹre he. Fikiere okenọ a vi ahwo ze ti sei re ọ nyae ta usi uwoma kẹ Kọniliọs, ọ “se he,” ọ tẹ nya. (Iruẹru 10:28, 29) Ọ tẹ ta usi uwoma kẹ Kọniliọs avọ ahwo uwou riẹ. A tẹ họ-ame.—Iruẹru 10:21-23, 34, 35, 44-48.
Pita nọ ọ ruọ eva uwou Kọniliọs (Rri edhe-ẹme avọ 7)
8. Ẹvẹ ma sai ro dhesẹ nọ ma bi rri eware epanọ Jihova o re rri eware? (1 Pita 3:8 gbe ẹme-obotọ)
8 Nọ ikpe buobu e vrẹ no, Pita ọ tẹ vuẹ Ileleikristi inọ “jọ iroro rai e rọwokugbe.” (Se 1 Pita 3:8, gbe ẹme-obotọ.) Mai idibo Jihova kpobi ma te bi rri eware epanọ Jihova o bi rri eware, ma ti wo iroro evo. Ma te bi wuhrẹ Ebaibol, ma rẹ ruẹ oghẹrẹ nọ Jihova o re rri eware. Wọhọ oriruo, Jesu ọ vuẹ ilele riẹ nọ a kake gwọlọ Uvie na. (Mat. 6:33) Ma rehọ iẹe nọ fikinọ oniọvo jọ nọ wha gbẹ rrọ ukoko ọ gwọlọ rọ Uvie na karo, ọ tẹ gwọlọ nọ ọ rẹ jọ iruo odibọgba oke-kpobi. Kọ ma te ta kẹe nọ ọ sai ti ru ei hi, inọ ọ du rọ uye yena bẹ omariẹ hẹ? U fo re ma ru ere he. Ukpoye ma rẹ vuẹe eghale nọ o ti wo noi ze, ma ve je fiobọhọ kẹe.
WO OMAUROKPOTỌ
9-10. Fikinọ Jesu o wo omaurokpotọ gaga, eme o ru nọ u gbe ilele riẹ unu?
9 Evaọ aso urere nọ Jesu ọ rọ jọ kugbe ikọ riẹ, o ru oware jọ nọ o ro wuhrẹ Pita gbe ikọ nọ i kiọkọ inọ o roja re a romakpotọ. Jesu ọ kaki vi Pita gbe Jọn inọ a nyae ruẹrẹ eware họ evaọ oria nọ o ti jo lele ae re emu urere riẹ taure o te ti whu. Nọ a nya na, ẹsejọhọ te odhe nọ a re ku ame họ gbe omokpa eye a ruẹrẹ họ. A vẹ sae wozẹ awọ ahwo nọ a te nyaze re a tẹ te re emu na. Kinọ oke u te, ohwo jọ evaọ usu ikọ na ọ kpama inọ ọ rẹ wozẹ awọ ahwo nọ i kiọkọ?
10 Fikinọ Jesu o wo omaurokpotọ, o te ru oware jọ nọ ohwo ọvo o rẹro riẹ hẹ. Oware nọ odibo o re ru evaọ uwou ọye Jesu o ru. Ọ ba ewu ehru riẹ no, ọ tẹ tọlọ omokpa. Ọ tẹ rehọ iẹe gba eku riẹ. O te ku ame fihọ odhe. Ere o ro mu awọ ikọ na họ ẹwozẹ. (Jọn 13:4, 5) Iruo nọ Jesu o ru na o rẹ rehọ oke keme ahwo ikpegbivẹ soso ọ wozẹ awọ rai na. Judas nọ o bi ti vivie iei na ọ jọ usu rai re. Jesu ọ tẹ ginẹ wozẹ awọ rai kpobi no. Nọ o ti ru kpobi no, ọ tẹ ta kẹ ae nọ: “Kọ wha wo otoriẹ oware nọ me ru kẹ owhai na? Wha bi se omẹ ‘Owuhrẹ,’ gbe ‘Olori,’ yọ wha se gba keme Owuhrẹ gbe Olori mẹ ginẹ rrọ. Fikiere otẹrọnọ mẹ nọ ọ rrọ Olori gbe Owuhrẹ na ọ wozẹ awọ rai, u fo nọ wha rẹ wozẹ awọ ohwohwo re.”—Jọn 13:12-14.
A tẹ ta nọ ohwo o gine wo omaurokpotọ, . . . obọ eva u re no ze
11. Eme Pita o ru uwhremu na nọ u dhesẹ nọ o wo omaurokpotọ? (1 Pita 5:5) (Rri uwoho na re.)
11 Oware nọ Jesu o ru na o lẹliẹ Pita ruẹ nọ u fo re o wo omaurokpotọ. Nọ Jesu o zihe kpobọ odhiwu no, Pita o te ru iruo igbunu jọ. O ru nọ ọzae jọ nọ ọ ko no eva ze o ro muhọ ẹnya. (Iruẹru 1:8, 9; 3:2, 6-8) Etẹe ọ tẹ dhẹ vọ. (Iruẹru 3:11) Kọ Pita ọ nwani mu igabọ họ ẹkpare inọ, ‘Wha riẹ nọ fiki mẹ jabọ ohwo na ọ be sae rọ nya na?’ Ijo. Pita ọ hae sai ru ere keme evaọ oria nọ ọ jọ rro te ohwo, ahwo a jẹ hae gwọlọ nọ a riẹ ae odẹ gaga. Rekọ Pita o ru ere he. Ọ ta nọ Jihova avọ Jesu a re jiri orọnikọ ọyomariẹ hẹ. Ọ ta kẹ ahwo na nọ: “Ẹkwoma odẹ [Jesu], avọ ẹrọwọ nọ ma fihọ odẹ riẹ oye u ru nọ oma ọzae nana nọ wha be ruẹ nọ wha riẹ na o rọ ga.” (Iruẹru 3:12-16) Uwhremu na, Pita o kere ileta se Ileleikristi. Yọ ọ vuẹ rai nọ a daoma wo omaurokpotọ. Ẹme nọ ọ ta o rẹ lẹliẹ omai kareghẹhọ epanọ Jesu ọ rọ rehọ omokpa gba eku riẹ jẹ wozẹ awọ ikọ na.—Se 1 Pita 5:5.
Nọ Pita o ru oware igbunu jọ no, fikinọ o wo omaurokpotọ, ọ ta nọ Jihova avọ Jesu a re jiri. Ma te bi ru eware iwoma kẹ ahwo, yọ orọnikọ ma bi ru ei re ahwo a ruẹ omai hayo re a ru kẹ omai zihe he, kiyọ ma wo omaurokpotọ (Rri edhe-ẹme avọ 11-12)
12. Ẹvẹ ma sai ro dhesẹ nọ ma wo omaurokpotọ epanọ Pita o wo omaurokpotọ na?
12 Ma sai wo omaurokpotọ re epanọ Pita o wo omaurokpotọ na. A tẹ ta nọ ohwo o gine wo omaurokpotọ, orọnikọ ẹme nọ ọ be ta ọvo o re ro dhesẹ iẹe he. Ẹme nọ Pita ọ ta okenọ ọ jẹ ta ẹme kpahe omaurokpotọ na họ “iroro ikpokpotọ.” Ẹme yena u dhesẹ nọ obọ iroro mai na omaurokpotọ u re no ze. Ma te gine wo omaurokpotọ, ma re ru eware kẹ ahwo fikinọ ma you rai, ma te je you Jihova. Orọnikọ ma re ru eware na re a jiri omai hi. Ma tẹ be rọ unevaze ru eware kẹ inievo mai jẹ gbodibo kẹ Jihova, u re dhesẹ nọ ma wo omaurokpotọ. Ma rẹ daezọ họ sọ ahwo a be ruẹ eware nọ ma bi ru hayo a be ruẹ e rai hi.—Mat. 6:1-4.
WO “IRORO NỌ E GBA”
13. A tẹ ta nọ ohwo o wo “iroro nọ e gba,” eme u dhesẹ?
13 A tẹ ta nọ ohwo o wo “iroro nọ e gba,” eme u dhesẹ? (1 Pita 4:7) Oleleikristi nọ o wo iroro nọ e gba ọ rẹ daoma gaga re o ru oware nọ u dhesẹ nọ o bi rri eware epanọ Jihova o re rri eware. Oware ovo evaọ akpọ na nọ o rẹ jariẹ oja te usu riẹ avọ Jihova, o riẹ hẹ. O re rri omariẹ nọ ọ riẹ eware kpobi re no ho. Ọ rẹ romakpotọ lẹ se Jihova ẹsikpobi keme ọye ọ rẹroso.b
14. Eme Pita o ru oke jọ nọ u dhesẹ nọ ọ rẹroso Jihova ha?
14 Evaọ aso nọ a ro mu Jesu na, Jesu ọ ta kẹ ilele riẹ nọ: “Whai kpobi wha ti zoruẹ aso nana fiki oware nọ o te via kẹ omẹ.” Rekọ Pita ọ tẹ ta nọ: “Ahwo nọ a kiọkọ kpobi a tẹ maki zoruẹ fiki oware nọ o te via kẹ owhẹ, me ti zoruẹ vievie he!” Aso ẹdẹ yena ọvona, Jesu ọ ta kẹ ikọ riẹ jọ nọ: “Wha ruabọhọ erou jẹ hae lẹ ẹsikpobi.” (Mat. 26:31, 33, 41) O hae jọ nọ Pita o ru oware nọ Jesu ọ ta na, ẹsejọhọ ọ hae te dhozọ họ. Ọ hae te robọ sudu ta nọ ọyomariẹ yọ olele Jesu. Rekọ ọ sai ru ere he. Ọ vro Jesu Olori riẹ. Oware nọ o ru na o da riẹ gaga.—Mat. 26:69-75.
15. Eme Jesu ọ jẹ hai ru nọ u dhesẹ nọ o wo iroro nọ e gba?
15 Jesu ọ rẹroso Jihova gaga. Jesu ọ jọ gbagba. Rekọ ọ jẹ lẹ oke kpobi. Yọ oye u fiobọhọ kẹe nọ ọ sai ro ru oware nọ Jihova o vi rie ze ti ru. (Mat. 26:39, 42, 44; Jọn 18:4, 5) Pita ọ ruẹ nọ Jesu ọ rọ olẹ zaro vievie he. Oware yena o thọrọ Pita ẹro ho.
16. Eme Pita o ru uwhremu na nọ u dhesẹ nọ o wo iroro nọ e gba? (1 Pita 4:7)
16 Uwhremu na, Pita ọ tẹ jẹ hae lẹ se Jihova ẹsikpobi, ọ gbẹ jẹ rẹroso omobọ riẹ hẹ. Nọ a kpare Jesu ze no, ọ ta kẹ Pita gbe ikọ nọ i kiọkọ inọ ẹzi ọfuafo na o ti te ai obọ. O vẹ te kẹ ae ẹgba nọ a te rọ ta usi uwoma na. Rekọ ọ vuẹ rai nọ a hẹrẹ evaọ Jerusalẹm bẹsenọ ẹzi na o re te ae obọ. (Luk 24:49; Iruẹru 1:4, 5) Kọ eme Pita o ru evaọ oke yena nọ a jẹ rọ hẹrẹ na? Ọye avọ ilele efa a jẹ “ruabọhọ olẹ.” (Iruẹru 1:13, 14) Uwhremu na nọ Pita o je kere ileta se Ileleikristi, ọ ta kẹ ae nọ jọ a wo iroro nọ e gba. Ọ ta re nọ jọ a rẹroso Jihova re a hae lẹ sei. (Se 1 Pita 4:7.) Pita ọ gbẹ jọ epaọ ẹdẹ hẹ. Ukpoye ọ jọ oniọvo nọ ọ rẹroso Jihova ọ tẹ jẹ jọ usu ahwo nọ Ọghẹnẹ ọ jẹ rọ kpọ eware evaọ ukoko na.—Gal. 2:9.
17. Ma tẹ maki wo eriariẹ hayo ma riẹ eware jọ eru gaga, eme ma re gbe ru ghele? (Rri uwoho na re.)
17 Re ma sai wo iroro nọ e gba, ma rẹ hae lẹ se Jihova ẹsikpobi. Ma riẹ nọ ma tẹ maki wo eriariẹ jọ kẹhẹ, hayo ma riẹ eware jọ eru kẹhẹ, ababọ Jihova, ma sai ru oware ovo ho. Fikiere ma rẹ hae lẹ sei ẹsikpobi, maero nọ ma tẹ be jiroro oware jọ nọ u wuzou gaga. Ma rẹ lẹ sei re o fiobọhọ kẹ omai riẹ oware nọ ma re ru keme ma riẹ nọ ọ riẹ oware nọ o mai woma kẹ omai.
Pita ọ daoma re ọ hae lẹ se Jihova re o fiobọhọ kẹe. Ma tẹ be lẹ se Jihova re o fiobọhọ kẹ omai, maero nọ ma tẹ gwọlọ jiroro nọ i wuzou gaga, kiyọ ma wo iroro nọ e gba (Rri edhe-ẹme avọ 17)c
18. Eme ma rẹ hai ru ẹsikpobi re ma rri eware epanọ Jihova o bi rri eware?
18 Ma yere Jihova gaga nọ ọ rọ ma omai evaọ oghẹrẹ nọ ma sae rọ rehọ aro kele iei. (Emu. 1:26) Ma riẹ nọ ma sae nwane rọ aro kele Jihova gbagba ha. (Aiz. 55:9) Rekọ ma sae daoma hai rri eware epanọ o re rri eware. Yọ ere Pita o ru re. Fikiere joma hai ru eware nọ i dhesẹ nọ ma bi rri eware epanọ Jihova o re rri eware. Joma wo omaurokpotọ, re ma je wo iroro nọ e gba.
OLE AVỌ 30 Ọsẹ Mẹ, Ọghẹnẹ Mẹ
a Ẹme na “oghẹrẹ iroro,” nọ a fodẹ evaọ obe 1 Pita 4:1 na, a sae rehọ iẹe dhesẹ epanọ ohwo o re rri eware, hayo oghẹrẹ nọ ohwo o re roro.
b Whọ tẹ gwọlọ gbẹ riẹ kpahe oware nọ u dhesẹ nọ a tẹ ta nọ ohwo o wo iroro nọ e gba, kpohọ jw.org hayo JW Library® re who rri “Eria Ebaibol nọ A Ru Vẹ.” Jariẹ rri uzoẹme nọ o ta nọ “2 Timothy 1:7 Explained—‘God Has Not Given Us a Spirit of Fear.’” Whọ vẹ jariẹ rri uzoẹme osese nọ o ta nọ “Soundness of mind,” ọrọ Oyibo.
c UWOHO NA: Oniọvo-ọmọtẹ na ọ be lẹ họ eva taure a te ti sei nyae kiẹe riwi sọ a sae rehọ iẹe iruo.