Ẹvẹ Whọ Sae rọ Riẹ Ọghẹnẹ Ziezi?

Uyo nọ Ebaibol na ọ kẹ

Whọ sae riẹ Ọghẹnẹ ziezi nọ whọ tẹ be hai wuhrẹ kpahe iẹe jẹ daoma ru oware nọ o rẹ were iẹe ẹsikpobi. Who te ru ere, Ọghẹnẹ omariẹ o ve ti ‘si kẹle owhẹ’ re. (Jemis 4:8) Ebaibol ọ ta nọ “o thabọ no omai omomọvo ho.”​—Iruẹru Ikọ 17:27.

• Eware jọ nọ ma re ru re ma sae riẹ Ọghẹnẹ ziezi

• Eriwo ọthọthọ kpahe Ọghẹnẹ

Eware jọ nọ ma re ru re ma sae riẹ Ọghẹnẹ ziezi

Hai se Ebaibol na

• Oware nọ Ebaibol na ọ ta: “Ẹkwoma ẹzi Ọghẹnẹ a ro kere Ikereakere na kpobi.”​—2 Timoti 3:16.

• Oware nọ onana u dhesẹ: Ọghẹnẹ họ ọnọ o wo eme nọ e rrọ Ebaibol na. Ọghẹnẹ o fi eme riẹ họ udu ahwo nọ a kere Ebaibol na, kẹsena a te kere ai fihotọ. Fikiere Ebaibol o wo ohẹriẹ no ebe efa kpobi, yọ Ọghẹnẹ ọ jariẹ vuẹ omai oghẹrẹ nọ ọ gwọlọ nọ uzuazọ mai o rẹ jọ. Ọ tẹ jẹ be rehọ iẹe wuhrẹ omai kpahe obọdẹ iruemu riẹ wọhọ uyoyou, uvioziẹ, gbe ohrọ-oriọ.​—Ọnyano 34:6; Iziewariẹ 32:4.

• Oware nọ whọ rẹ sai ru: Hai se Ebaibol na kẹdẹ kẹdẹ. (Joshua 1:8) Romatotọ roro didi kpahe oware nọ who bi se re whọ nọ omara nọ: ‘Eme oware nọ me se na u wuhrẹ omẹ kpahe Ọghẹnẹ?’​—Olezi 77:12.

  Wọhọ oriruo, se obe Jerimaya 29:11 re whọ nọ omara nọ: ‘Oghẹrẹ iroro vẹ Ọghẹnẹ o wo kpahe omẹ, iroro udhedhẹ manikọ okpẹtu? Kọ Ọghẹnẹ ọ be dheva kẹ omẹ manikọ ọ gwọlọ nọ eware i woma kẹ omẹ evaọ obaro?’

Hai rri emama Ọghẹnẹ

• Oware nọ Ebaibol na ọ ta: “Keme dede nọ a rẹ ruẹ Ọghẹnẹ hẹ, no anwọ okenọ ọ rọ ma akpọ na ze ahwo a be sai wo otoriẹ oghẹrẹ nọ ọ rrọ, a be jọ eware nọ ọ ma ruẹ onana.”​—Ahwo Rom 1:20.

• Oware nọ onana u dhesẹ: Eware nọ Ọghẹnẹ ọ ma nọ ma be ruẹ nẹnẹ na i re fiobọhọ kẹ omai riẹ iruemu riẹ. Wọhọ oriruo, whọ tẹ ruẹ oware nọ a drọ nọ o rrọ wowoma, whọ rẹ riẹ nọ ohwo nọ ọ drọ riẹ na ọ riẹ eware ẹdrọ ziezi. Yọ whọ tẹ ruẹ ẹjini nọ o bi ruiruo ziezi, whọ rẹ nwane riẹ nọ ohwo nọ o ku rie na ọ ginẹ riẹ iruo ziezi. Ere emama Ọghẹnẹ e rrọ re. Ọjọ rai họ ẹvori na. Oghẹrẹ nọ Ọghẹnẹ ọ ma ẹvori ohwo-akpọ u dhesẹ nọ o gine wo areghẹ gaga. Yọ ẹgba nọ ọ rrọ ọre gbe isi nọ Ọghẹnẹ ọ ma na i dhesẹ nọ o wo ogaga thesiwa.​—Olezi 104:24; Aizaya 40:26.

• Oware nọ whọ rẹ sai ru: Hai rri emama Ọghẹnẹ jẹ romatotọ wuhrẹ kpahe ae. Hae nọ omara nọ, ‘Eme oghẹrẹ onaa nọ Ọghẹnẹ o ru fihọ emama nana i wuhrẹ omẹ kpahe iẹe?’a Uzẹme riẹ họ, ma tẹ maki rri emama Ọghẹnẹ nẹnẹ rite odẹ, eware buobu e riẹ nọ ma rẹ sae jarae riẹ kpahe Ọghẹnẹ hẹ. Oyejabọ nọ Ọghẹnẹ ọ rọ kẹ omai Ebaibol na re ma sae riẹe ziezi.

Hai se odẹ Ọghẹnẹ

• Oware nọ Ebaibol na ọ ta: “Mẹ te thọe keme ọ riẹ odẹ mẹ. O ti bo se omẹ, yọ me ti yo kẹe.”​—Olezi 91:14, 15.

• Oware nọ onana u dhesẹ: Odẹ Ọghẹnẹ họ Jihova. Jihova ọ rẹ gaviezọ kẹ ahwo nọ a riẹ odẹ riẹ je bi se odẹ na evaọ edhere nọ u fo.b (Olezi 83:18; Malakae 3:16) Jihova ọ gwọlọ nọ ma riẹe ziezi, oyejabọ nọ ọ rọ vuẹ omai odẹ riẹ na. Ọ ta nọ: “Mẹ họ Jihova. Odẹ mẹ oye.”​—Aizaya 42:8.

• Oware nọ whọ rẹ sai ru: Whọ tẹ be ta ẹme kpahe Jihova, hai se odẹ riẹ na.

Hae lẹ se Jihova

• Oware nọ Ebaibol na ọ ta: “Jihova ọ kẹle enọ i bi bo sei kpobi.”​—Olezi 145:18.

• Oware nọ onana u dhesẹ: Jihova o re si kẹle ahwo nọ a be lẹ sei, je wo ẹrọwọ inọ o ti yo elẹ rai. Olẹ yọ edhere jọ nọ ma rẹ rọ gọ Jihova je dhesẹ nọ ma wo adhẹẹ kẹe.

• Oware nọ whọ rẹ sai ru: Hae lẹ se Ọghẹnẹ ẹsikpobi. (1 Ahwo Tẹsalonika 5:17) Ta eva ra kpobi kẹe, jẹ vuẹe epanọ eware e rrọ owhẹ oma.​—Olezi 62:8.c

Fi ẹrọwọ họ Ọghẹnẹ

• Oware nọ Ebaibol na ọ ta: “Ababọ ẹrọwọ ohwo ọ rẹ sai ru Ọghẹnẹ eva were ziezi hi.”​—Ahwo Hibru 11:6.

• Oware nọ onana u dhesẹ: Re ma sai si kẹle Ọghẹnẹ, ma re fi ẹrọwọ họ iẹe. A tẹ jọ Ebaibol ta nọ ohwo o wo ẹrọwọ, orọnikọ ọ rẹ rọwo ọvo nọ Ọghẹnẹ ọ rrọ họ. O gwọlọ nọ o re fievahọ Ọghẹnẹ gbe eyaa kpobi nọ ọ ya kẹ omai inọ i ti rugba. Ọ rẹ jẹ riẹ nọ izi Ọghẹnẹ nọ o re koko ẹsikpobi họ oware nọ o mai woma. Onana u wuzou keme re imava e sae jọ egbẹnyusu ekpekpe, a re fievahọ ohwohwo.

• Oware nọ whọ rẹ sai ru: Re ohwo ọ sai gine wo ẹrọwọ, o gwọlọ nọ ọ rẹ riẹ eware jọ. (Ahwo Rom 10:17) Fikiere, wuhrẹ Ebaibol na, u ti ru nọ who ti ro fievahọ Ọghẹnẹ jẹ rọwo nọ oware kpobi nọ ọ ta nọ who ru oye o mai woma. O te were Isẹri Jihova re a wuhrẹ Ebaibol na kugbe owhẹ.d

Hai ru oware nọ o rẹ were Ọghẹnẹ

• Oware nọ Ebaibol na ọ ta: “Keme enẹ ma re ro dhesẹ nọ ma you Ọghẹnẹ, ma re koko ijaje riẹ.”​—1 Jọn 5:3.

• Oware nọ onana u dhesẹ: Nọ ohwo ọ tẹ be daoma re ọ hai koko izi Jihova, u re dhesẹ nọ o you Jihova, yọ Jihova o re si kẹle ohwo otiọye na.

• Oware nọ whọ rẹ sai ru: Nọ who te bi wuhrẹ Ebaibol na, hai muẹrohọ oware nọ o rẹ were Ọghẹnẹ gbe onọ o rẹ dhae eva. Nọ omara nọ, ‘Eware jọ vẹ mẹ rẹ sai nwene evaọ uzuazọ mẹ re mẹ sai ru eva were Ọghẹnẹ?’​—1 Ahwo Tẹsalonika 4:1.

Ru oware nọ Ọghẹnẹ ọ ta, o ti fiobọhọ kẹ owhẹ

• Oware nọ Ebaibol na ọ ta: “Dawo re whọ ruẹ nọ Jihova o woma.”​—Olezi 34:8.

• Oware nọ onana u dhesẹ: Ọghẹnẹ ọ gwọlọ nọ whọ riẹ epanọ ọyomariẹ o woma te. Nọ whọ tẹ ruẹ epanọ Ọghẹnẹ o you owhẹ te je bi fiobọhọ kẹ owhẹ ẹsikpobi, whọ te gwọlọ nọ who re si kẹle iẹe.

• Oware nọ whọ rẹ sai ru: Nọ who bi wuhrẹ Ebaibol na, hai ru oware nọ Ọghẹnẹ ọ ta. Who te ru ere, irere buobu i ti te owhẹ. (Aizaya 48:17, 18) Hai se kpahe iku ahwo jọ nọ Ọghẹnẹ o fiobọhọ kẹ nwene no evaọ uzuazọ rai, ahwo uviuwou rai a te je nwene yọ eva ọvo e be were ae enẹna.e

Eriwo ọthọthọ kpahe Ọghẹnẹ

Eriwo ọthọthọ: Ma sae riẹ Ọghẹnẹ hẹ.

Uzẹme ẹme na: Ginọ uzẹme inọ o sae jọ bẹbẹ re ma wo otoriẹ eware jọ kpahe Ọghẹnẹ. Wọhọ oriruo, Ọghẹnẹ yọ ẹzi, yọ o rrọ bẹbẹ re ma riẹ oghẹrẹ nọ ẹzi ọ rẹ jọ. O make rrọ ere na, ma rẹ sae riẹ Ọghẹnẹ. Ebaibol ọ tubẹ ta nọ re ma sai wo uzuazọ ebẹdẹ bẹdẹ, ma rẹ riẹ Ọghẹnẹ. (Jọn 17:3) A jọ Ebaibol na vuẹ omai kpahe Ọghẹnẹ, iruemu riẹ, ẹjiroro nọ o wo kẹ ahwo-akpọ, gbe izi riẹ, yọ Ebaibol ọ ta kpahe eware nana evaọ oghẹrẹ nọ ma sai ro wo otoriẹ rai ziezi. (Aizaya 45:​18, 19; 1 Timoti 2:4) Ebaibol na ọ tẹ jẹ vuẹ omai odẹ Ọghẹnẹ wọhọ epanọ ma ta no vẹre na. (Olezi 83:18) Fikiere, ma rẹ sae riẹ Ọghẹnẹ je si kẹle iẹe.​—Jemis 4:8.