Eme U Dhesẹ re Ohwo Ọ Riẹ Ọghẹnẹ? Kọ Mẹ Sae Riẹ Ọghẹnẹ Ababọ Egagọ Jọ nọ Me re Kuomagbe?

Uyo nọ Ebaibol na ọ kẹ

Wọhọ epanọ Ebaibol na o dhesẹ, ohwo nọ ọ riẹ Ọghẹnẹ o re ru eware nọ e rẹ were iẹe je rri eware epanọ Ọghẹnẹ o bi rri rai. Ohwo otiọye na o re koko izi Ọghẹnẹ evaọ uzuazọ riẹ, yọ ọ rẹ kuvẹ re ẹzi ọfuafo Ọghẹnẹ ọ kpọe.a—Ahwo Rom 8:5; Ahwo Ẹfisọs 5:1.

Ẹsibuobu nọ a tẹ be jọ Ebaibol na dhesẹ ohwo nọ ọ riẹ Ọghẹnẹ, a rẹ gwọlọ rehọ iẹe wawo ohwo gheghe nọ ọ riẹ Ọghẹnẹ hẹ. Wọhọ oriruo, “ohwo nọ ọ romakẹ isiuru ohwo-akpọ ọ rẹ jẹ eware ẹzi Ọghẹnẹ rehọ họ,” koyehọ o re ru oware nọ Ọghẹnẹ ọ ta ha. (1 Ahwo Kọrint 2:14-16) Oghẹrẹ ahwo nana a re wo eriwo ohwo-akpọ je dhesẹ uruemu “ihri-eriọ gbe ẹwhọ,” ukpenọ a rẹ rria dhedhẹ kugbe ahwo je fiobọhọ kẹ amọfa. (1 Ahwo Kọrint 3:1-3) Yọ ahwo nọ a rẹ ta amọfa raha jẹ wha ohẹriẹ fihọ udevie egbẹnyusu ekpekpe, a se rai “ezae nọ e wọhọ erao nọ i wo ẹzi Ọghẹnẹ hẹ.”—Jud 19; Itẹ 16:28.b

Ma te jọ uzoẹme nana ta kpahe eware nana

• Fikieme ma rẹ rọ gwọlọ riẹ Ọghẹnẹ?

• Fikieme u ro wuzou re ma riẹ Ọghẹnẹ?

• Ẹvẹ mẹ sae rọ riẹ Ọghẹnẹ?

• Kọ o gwọlọ nọ me re kuomagbe egagọ jọ taure mẹ tẹ te riẹ Ọghẹnẹ?

• Iroro ethọthọ nọ ahwo jọ a re wo kpahe oware nọ u dhesẹ re ohwo ọ riẹ Ọghẹnẹ

• Eria Ebaibol nọ a jọ ta kpahe oware nọ u dhesẹ re ohwo ọ riẹ Ọghẹnẹ

Fikieme ma rẹ rọ gwọlọ riẹ Ọghẹnẹ?

Fikinọ Ọghẹnẹ ọ ma omai evaọ uwoho riẹ, onana u re ru nọ ma rẹ rọ gwọlọ riẹ ẹe. (Emuhọ 1:27) Fikiere u re gbe omai unu hu inọ ahwo jọ a rẹ gwọlọ riẹ kpahe eware nọ a rẹ ruẹ hẹ nọ e rrọ obọ idhiwu na.

Jihovac Ọghẹnẹ ọ ma omai evaọ oghẹrẹ nọ ma sai ro dhesẹ ohrọ-oriọ, rria dhedhẹ kugbe amọfa, jẹ whaha ọriẹwẹ wọhọ ọyomariẹ. (Jemis 3:17) Ofariẹ, Ọghẹnẹ ọ rẹ rọ ẹzi riẹ fiobọhọ kẹ ahwo nọ a be daoma koko izi riẹ.—Iruẹru Ikọ 5:32.

Fikieme u ro wuzou re ma riẹ Ọghẹnẹ?

Nọ ma tẹ riẹ Ọghẹnẹ, o rẹ wha “uzuazọ gbe udhedhẹ ze.” (Ahwo Rom 8:6) Eware nana yọ okẹ Ọghẹnẹ nọ a sae rọ wawo oware ovo ho.

• Uzuazọ: Ọghẹnẹ ọ ya eyaa nọ ọ te kẹ ahwo kpobi nọ a riẹ e riẹ uzuazọ ebẹdẹ bẹdẹ.—Jọn 17:3; Ahwo Galesha 6:8.

• Udhedhẹ: Nọ udhedhẹ nọ ohwo o re wo kugbe Ọghẹnẹ. Ahwo nọ a rẹ tẹrovi isiuru uwo ọvo a rẹ jọ ewegrẹ Ọghẹnẹ. (Ahwo Rom 8:7) Ofariẹ, ahwo kpobi nọ a be daoma re a riẹ Ọghẹnẹ, a re wo “udhedhẹ Ọghẹnẹ nọ u vi otoriẹ kpobi.” (Ahwo Filipai 4:6, 7) Udhedhẹ yena u re fiobọhọ kẹ ae wereva evaọ uzuazọ.—Matiu 5:3.

Ẹvẹ mẹ sae rọ riẹ Ọghẹnẹ?

• Wuhrẹ kpahe Ọghẹnẹ je koko izi riẹ. Whọ sai ru onana nọ who te bi se Ebaibol na. Ebaibol na yọ Ẹme Ọghẹnẹ keme ọ rehọ “ẹzi ọfuafo” riẹ kpọ ahwo nọ a kere i rie. (2 Pita 1:21) Eware nọ who ti wuhrẹ evaọ Ebaibol na i ti fiobọhọ kẹ owhẹ rọ “ẹzi gbe uzẹme” gọ Ọghẹnẹ, koyehọ ẹzi Ọghẹnẹ ọ te kpọ owhẹ re who ru oreva riẹ.—Jọn 4:24.

• Lẹ se Ọghẹnẹ re o fiobọhọ kẹ owhẹ. (Luk 11:13) Ọghẹnẹ o ti fiobọhọ kẹ owhẹ wo emamọ uruemu nọ a re ro vuhu ahwo nọ a ginẹ riẹ Ọghẹnẹ. (Ahwo Galesha 5:22, 23) Ọ te jẹ kẹ owhẹ areghẹ nọ whọ sai ro thihakọ ebẹbẹ nọ i bi te owhẹ evaọ uzuazọ.—Jemis 1:5.

• Hai kuomagbe ahwo nọ a riẹ Ọghẹnẹ. Ahwo nana a te tuduhọ owhẹ awọ re whọ hai ru eware nọ e rẹ were Ọghẹnẹ. (Ahwo Rom 1:11, 12) Rekọ who te mu usu kugbe ahwo nọ a bi koko izi Ọghẹnẹ hẹ, a sae raha usu ra kugbe Ọghẹnẹ.—Jemis 4:4.

Kọ o gwọlọ nọ me re kuomagbe egagọ jọ taure mẹ tẹ te riẹ Ọghẹnẹ?

Orọnikọ ohwo ọ tẹ rrọ egagọ jọ no, oyena o vẹ nwani dhesẹ nọ ọ riẹ Ọghẹnẹ hẹ. Ebaibol na ọ ta nọ: “Otẹrọnọ ohwo jọ o te bi roro nọ ọ be gọ Ọghẹnẹ, rekọ ọ rẹ kpọ ẹrọo riẹ hẹ, ọ be viẹ udu obọriẹ họ, egagọ riẹ e tẹ jẹ rrọ ofofe.”—Jemis 1:26.

Ebaibol na o dhesẹ nọ ahwo nọ a riẹ Ọghẹnẹ a rẹ gọe evaọ edhere nọ ọ jẹrehọ. A rẹ rọwo nọ “ẹzi ọvo” ọ riẹ, yọ ẹzi yena họ ẹzi ọfuafo Ọghẹnẹ. Ẹzi nana o re fiobọhọ kẹ ae gọ Ọghẹnẹ wọhọ “ugboma ọvo,” koyehọ evaọ utu ovona nọ o rẹ ‘yọrọ okugbe ọvo nọ ẹzi na ọ be wha ze evaọ udhedhẹ nọ o be gba ae kugbe.’—Ahwo Ẹfisọs 4:1-4.

Iroro ethọthọ nọ ahwo jọ a re wo kpahe oware nọ u dhesẹ re ohwo ọ riẹ Ọghẹnẹ

Iroro ethọthọ: Emama kpobi a riẹ Ọghẹnẹ keme ere a ma rai.

Uzẹme ẹme na: Eware kpobi nọ Ọghẹnẹ ọ ma e rẹ wha orro sei. (Olezi 145:10; Ahwo Rom 1:20) Rekọ ikọ-odhiwu gbe ahwo-akpọ ọvo họ enọ e rẹ sae riẹ Ọghẹnẹ. Rekọ erao a rẹ sae riẹ Ọghẹnẹ hẹ keme a re ru onọ o sa rai. Epanọ a rẹ rọ re emu je yẹ emọ ọvo họ oware nọ u wuzou kẹ ae. (2 Pita 2:12) Fikiere Ebaibol na o dhesẹ enọ e riẹ Ọghẹnẹ hẹ wọhọ enọ i wo uruemu erao.—Jemis 3:15; Jud 19.