Eme Ebaibol na Ọ Ta Kpahe Orọo?
Uyo nọ Ebaibol na ọ kẹ
Nọ Ọghẹnẹ ọ ma ọzae avọ aye ọsosuọ na no, ọ tẹ rehọ aye na kẹ ọzae na re ọ jọ aye riẹ. Ọghẹnẹ họ ọnọ ọ tuọ orọo họ, yọ o ru onana re ọzae-avọ-aye a sae jọ kugbe jẹ rẹrote emọ nọ a ti yẹ.—Emuhọ 1:27, 28; 2:18.
Ọghẹnẹ ọ gwọlọ nọ ahwo nọ a rọo no a rẹ wereva kugbe. (Itẹ 5:18) Ọ jọ Ebaibol na vuẹ omai epanọ ọ gwọlọ nọ orọo ọ rẹ jọ, ọ tẹ jẹ kẹ ọzae-avọ-aye ehrẹ nọ i re fiobọhọ kẹ ae nọ orọo rai ọ sae rọ jọ gaga.
Ma te jọ uzoẹme nana ta kpahe eware nana
Ẹvẹ Ọghẹnẹ ọ gwọlọ nọ orọo ọ rẹ jọ?
No anwọ emuhọ ze, Ọghẹnẹ ọ gwọlọ nọ ọzae o re wo aye ọvo. (Emuhọ 2:24) Ọghẹnẹ ọ kuvẹ hẹ re ọzae o wo vrẹ aye ọvo, re ọzae avọ ọzae hayo aye avọ aye a wezẹ kugbe, hayo re imava nọ e re rọo ho a rria kugbe. (1 Ahwo Tẹsalonika 4:3) Jesu o wuhrẹ ilele riẹ re a lele epanọ Ọghẹnẹ ọ gwọlọ nọ orọo ọ rẹ jọ.—Mak 10:6-8.
Ọghẹnẹ ọ gwọlọ nọ ahwo nọ a rọo no a rẹ rria kugbe ri bọo ẹdẹ uwhu rai. Nọ ọzae avọ aye a tẹ gwọlọ rọo, a rẹ ya eyaa nọ a te talamu ohwohwo, yọ oware ovo o te hẹriẹ ae he bọwo ẹdẹ uwhu rai. Ọghẹnẹ ọ gwọlọ nọ a re ru eyaa rai na gba.—Mak 10:9.
Ẹvẹ Ọghẹnẹ o rri ẹhẹriẹ gbe orọo-ofa?
Evaọ ẹsejọ, eware jọ e sai ru nọ ọzae-avọ-aye a sae rọ jọ ọvuọ oria riẹ. Wọhọ oriruo, ọjọ ọ sae nyae jọ kugbe ahwo uviuwou riẹ re ọ sae rẹrote ẹbẹbẹ jọ nọ ọ rrọ otọ. Rekọ Ebaibol na o mukpahe ọzae-avọ-aye nọ a rẹ hẹriẹ fikinọ a wo ẹbẹbẹ evaọ orọo rai. Ukpenọ a rẹ hẹriẹ, Ebaibol na ọ tuduhọ ae awọ re a daoma ku ẹbẹbẹ rai họ.—1 Ahwo Kọrint 7:10.
Ẹnwae-obro ọvo họ oware nọ Ebaibol na ọ fodẹ nọ a sae rọ fiki riẹ fa orọo. (Matiu 19:9) Fikiere, nọ ọzae-avọ-aye a tẹ jiroro nọ a rẹ hẹriẹ hayo fa orọo rai fiki oware ofa jọ kpobi, Ebaibol na ọ kuvẹ hẹ re aimava na a wariẹ mu usu orọo họ kugbe omọfa hayo rọo omọfa.—Matiu 5:32; 1 Ahwo Kọrint 7:11.
Kọ o gbahọ nọ ahwo nọ a gwọlọ rọo a re kere odẹ hotọ wọhọ epanọ uzi o ta taure Ọghẹnẹ ọ tẹ te jẹ orọo rai rehọ?
Ọghẹnẹ ọ gwọlọ nọ Ileleikristi a re lele izi nọ egọmeti o fihọ kpahe orọo. (Taitọs 3:1) Nọ ọzae-avọ-aye a te kere odẹ hotọ evaọ obọ egọmeti, u re dhesẹ nọ a be rọ adhẹẹ kẹ egọmeti je bi ru lele oghẹrẹ nọ Ọghẹnẹ ọ gwọlọ nọ orọo ọ rẹ jọ, inọ ọzae-avọ-aye a rẹ talamu ohwohwo ri bọo ẹdẹ uwhu rai.a
Iruo vẹ Ebaibol na ọ ta nọ ọzae-avọ-aye a wo evaọ uviuwou?
Iruo nọ aimava na a wo. O gwọlọ nọ ọzae-avọ-aye a re you ohwohwo jẹ rọ adhẹẹ kẹ ohwohwo. (Ahwo Ẹfisọs 5:33) A re ru ẹgwọlọ ohwohwo kẹe evaọ ẹme owezẹ ọzae-avọ-aye, yọ a re wo isiuru kẹ omọfa ha. (1 Ahwo Kọrint 7:3; Ahwo Hibru 13:4) Nọ a te yẹ emọ, aimava na ae a rẹ rẹrote emọ na.—Itẹ 6:20.
Ebaibol na ọ nwane ta kpahe epanọ ọzae-avọ-aye a rẹ rọ kọ okọ je ru iruo uwou rai tere he. Aimava na a rẹ jiroro onọ o te mai kiehọ kẹ ae.
Iruo nọ ọzae o wo. Ebaibol na ọ ta nọ “ọzae họ ọnọ o wuzou aye riẹ.” (Ahwo Ẹfisọs 5:23) Ọye họ ọnọ o wuzou uwou riẹ keme ọye ọ rẹ kpọ eware evaọ uviuwou riẹ jẹ jiroro oware nọ u ti kiehọ kẹ aye gbe emọ riẹ.
Ọ rẹ daoma ruẹ nọ emọ riẹ a wo emu nọ a rẹ re, o re ru eware nọ ahwo uviuwou riẹ a rẹ rọ wereva, yọ o re je fiobọhọ kẹ uviuwou riẹ kruga ziezi evaọ egagọ Jihova. (1 Timoti 5:8) Ọzae o re dhesẹ nọ aye riẹ ọ rrọ ghaghae evaọ aro riẹ nọ aimava na a tẹ be hai ru eware kugbe. Yọ taure ọ tẹ te jiroro jọ kpobi, o re roro kpahe aye riẹ jẹ nọ mi ei tao. (Itẹ 31:11, 28) Ebaibol na ọ ta nọ u fo nọ ọzae ọ rẹ rọ edhere oyoyou ro lele aye riẹ yeri.—Ahwo Kọlọsi 3:19.
Iruo nọ aye o wo. Ebaibol na ọ ta nọ jọ “aye o wo adhẹẹ odidi kẹ ọzae riẹ.” (Ahwo Ẹfisọs 5:33) O rẹ were Ọghẹnẹ nọ ọ tẹ ruẹ nọ aye ọ be rọ adhẹẹ kẹ ọzae riẹ keme ọye Ọghẹnẹ ọ ta nọ o wuzou uwou.
Iruo nọ aye o wo họ, re o fiobọhọ kẹ ọzae riẹ, lele iei jẹ emamọ iroro, jẹ hae thae uke. (Emuhọ 2:18) Ebaibol na ọ ta emamọ ẹme kpahe aye nọ o re ru iruo nọ i te rie evaọ uviuwou.—Itẹ 31:10.
Kọ Ọghẹnẹ ọ gwọlọ nọ ahwo nọ a rọo no kpobi nẹnẹ a re yẹ emọ?
Ijo. Evaọ oke nọ u kpemu, Ọghẹnẹ ọ ta kẹ idibo riẹ jọ re a yẹ emọ. (Emuhọ 1:28; 9:1) Rekọ ẹme yena o kiekpahe Ileleikristi hi. Jesu ọ gba ilele riẹ họ re a yẹ emọ họ. Yọ Ileleikristi ikpe-udhusoi ọsosuọ na a gba ahwo nọ a rọo no họ re yẹ emọ họ. Ọzae-avọ-aye ọvo a rẹ jiroro na kẹ omarai sọ a ti yẹ emọ hayo a ti yẹ hẹ.
Ẹvẹ Ebaibol na ọ sai ro fiobọhọ kẹ omẹ evaọ orọo mẹ?
Ehrẹ Ebaibol na e rẹ sai fiobọhọ kẹ ahwo nọ a rọo obọ wo evawere. Ehrẹ nana i re fiobọhọ kẹ ọzae-avọ-aye nọ a gbe ro wo ebẹbẹ tere he hayo nọ a sae ro thihakọ ebẹbẹ rai.
Ehrẹ Ebaibol na e rẹ sai fiobọhọ kẹ ọzae-avọ-aye . . .
dhesẹ uvi uyoyou.—1 Ahwo Kọrint 13:4-7; Ahwo Kọlọsi 3:14.
ku ẹwhọ họ dhedhẹ.—1 Ahwo Kọrint 10:24.
gaviezọ kẹ ohwohwo.—Jemis 1:19.
ru eware nọ uyoyou nọ a wo kẹ ohwohwo o re ro dhe ẹgẹga.—Ole nọ O Vi Ile 8:7.
a Re whọ riẹ oware nọ Ebaibol na ọ ta kpahe orọo nọ a ru lele uzi ẹwho hayo uruemu ẹwho, se edhe-ẹme avọ 12 evaọ Uwou-Eroro Na, ọrọ Akpegbọvo 1, 2006, ẹwẹ-obe avọ 9.