Ọ Sasa Amọfa Oma Dede nọ Ọ be Mọ

Clodean yọ omọvo Isẹri Jihova nọ ọ be rria South Africa, nọ a jọ ọspito ru obẹrọ ogaga kẹ. O wo oghẹrẹ eyao sa-sa nọ e riẹe oma, yọ a dhesẹ idhere sa-sa kẹe nọ a sai ro siwi ei, fikiere o gwọlọ nọ ọ rẹ salọ ọjọ. Taure a te ti ru obẹrọ na gbe okenọ a ru ei no, oma o jẹ lọhọ iẹe, voho iẹe, yọ o je wo edada. Enwenọ emerae ivẹ gbe ubro nọ o zihe kpo no, ọ jẹ sae keria ha. Yọ fiki okpẹyao COVID-19 na, ahwo a jẹ sai weze bru ei hi.

Ukpenọ ọ rẹ rọ obọ thagba bruenu, Clodean ọ lẹ se Ọghẹnẹ inọ ọ kẹe ẹgba re ọ sae sasa amọfa oma. Fikiere nọ oma na ọ ga te epanọ ọ sae rọ keria no, ọ tẹ rọ ifonu se oniọvo-ọmọtẹ ohwo jọ nọ ọ be rria kẹle iẹe. Isẹri Jihova a je wuhrẹ Ebaibol kugbei okejọ rekọ ọ tẹ seba ewuhrẹ. Clodean ọ tẹ rọ oria Ebaibol jọ tuduhọ aye na awọ, o tẹ lẹliẹe wariẹ muọ Ebaibol họ ewuhrẹ. Clodean ọ tẹ jẹ vuẹe irere nọ o ti wo nọ o te kuomagbe ewuhrẹ Isẹri Jihova, kẹsena o te dhesẹ epanọ ọ sae rọ rehọ ifonu thuru kugbe ewuhrẹ na kẹe. Aye na o te gine thuru kugbe ewuhrẹ jẹ tubẹ kẹ uyo dede evaọ okenọ a je ru abọ nọ a rẹ jọ nọ enọ.

Clodean o te je se oniọvo ọmọtẹ ọmaha aye na, yọ o were e riẹ nọ o re wuhrẹ Ebaibol na re. Ọ tubẹ vuẹ Clodean dede nọ ọ riẹ amọfa nọ a te gwọlọ wuhrẹ Ebaibol na. Eme o no rie ze? Clodean o muọ Ebaibol họ ewuhrẹ kugbe eyae ene efa. Rekọ etẹe iku na i jo kuhọ họ.

Fikinọ Clodean ọ rẹ daezọ amọfa gaga, ọ sai muọ Ebaibol họ ewuhrẹ kugbe eyae ikpe efa. Koyehọ eyae 16 o muọ Ebaibol họ ewuhrẹ kugbe evaọ etoke okpẹyao nana. Ejọ e be rọ ifonu thuru kugbe ewuhrẹ ẹsikpobi. Usi uwoma nọ Clodean ọ be rọ oke riẹ ta na u bi fiobọhọ kẹe nọ o gbe bi ro roro kpahe ẹyao riẹ na ga hrọ họ. Ọ tẹ jẹ ruẹ nọ fikinọ Jihova, “Ọghẹnẹ omosasọ kpobi” na ọ sasa e riẹ oma evaọ oke obẹbẹ riẹ, ọyomariẹ ọ sae sasa amọfa oma no re.—2 Ahwo Kọrint 1:3, 4.

Eme ahwo nọ Clodean o bi wuhrẹ Ebaibol na kugbe a ta kpahe eware nọ a wuhrẹ no? Omọvo rai jọ ọ ta nọ: “Me wo erere no evaọ idhere buobu. Rekọ onọ o maero họ odẹ Ọghẹnẹ nọ mẹ riẹ. Onana u fiobọhọ kẹ omẹ sikẹle Jihova no.” Aye ọsosuọ nọ Clodean ọ ta usi uwoma kẹ na ọ te họ-ame kẹle. Iku nana kpobi e kẹ Clodean evawere gaga no. Yọ oma riẹ o ga ziezi no re.