Fiobọhọ kẹ Emọ Ra re Ekpehre Usi O Siọ Udu Rai Ba Ekpokpo

Kẹdẹ kẹdẹ ma be jọ etẹlẹvisiọno, ifonu, etablẹte, gbe ekọmputa yo ikpehre usi nọ e rẹ lẹliẹ ekpahe kpe ohwo. Yọ ẹsibuobu a re dhesẹ ividio eware na dẹẹ.

Emọboba a be gaviezọ kẹ usi eware nana re.

Ẹvẹ whọ sai ro fiobọhọ kẹ emọ ra re ikpehre usi itienana e siọ udu rai ba ekpokpo?

• Ẹvẹ o rẹ jọ emaha oma nọ a te yo ekpehre usi?

• Ẹvẹ whọ sai ro fiobọhọ kẹ emọ ra re a siọ awa ba ẹruọ kpahe ekpehre usi?

• Ẹvẹ whọ sai ro fiobọhọ kẹ ọmọ ra nọ ọ jọ oria nọ oware okpẹtu o jọ via?

Ẹvẹ o rẹ jọ emaha oma nọ a te yo ekpehre usi?

• O rẹ kẹ emọ buobu uye nọ a te yo usi eware iyoma nọ e via. Emọ jọ a rẹ sae ta epanọ o kẹ rai uye te he, rekọ ekpehre usi o rẹ kẹ ae uye gaga.a Nọ esẹgbini rai a tẹ be ruawa gaga kpahe oware nọ o via na, o rẹ jẹ kẹ emọ na uye ga.

• Emaha a rẹ sae riẹ oware nọ o be via na ziezi hi. Wọhọ oriruo, ejọ i re roro nọ oware nọ a ruẹ na o te via evaọ uviuwou rai. Yọ emọ nọ i bi rri oware okpẹtu utioye na nọ a bi dhesẹ unuẹse buobu a re roro nọ oware uyoma na u bi dhe ẹviẹvia.

• Emaha buobu a riẹ hẹ inọ ahwo nọ a bi whowho usi na a re bru okpa họ oware nọ o via na. Ẹsejọhọ a riẹ vievie he inọ ahwo nọ a bi whowho usi na a re ru onaa họ iẹe re ahwo buobu a sae gaviezọ kẹe. Rekọ oware nọ ahwo na a bi ru na oye re okọ rai o ruẹse nyaharo ziezi. A re fi uwhei gbe emagi họ iku na ẹsejọ re ahwo a ruẹsi dhe ai errierri.

Ẹvẹ whọ sai ro fiobọhọ kẹ emọ ra re a siọ awa ba ẹruọ kpahe ekpehre usi?

• Whọ kuvẹ re a hai rri usi utioye na kẹse kẹse he. Orọnikọ o thọ họ re emọ ra a riẹ oware nọ o be via evaọ akpọ. O make rrọ ere na, kọ who roro nọ u ti kiehọ ae oma re a hai rri ekpehre usi nọ a bi dhe ẹwẹwariẹ?

  “Ẹsejọ ma rẹ robọ kotọ gbiku oware nọ o via. Ma rẹ riẹ hẹ inọ o be kẹ emọ mai nọ i bi yo iku na uye gaga.”—Maria.

  Ehri-uzi Ebaibol: “Awaọruọ ọ rẹ rọ ohwo gbotọ.”—Itẹ 12:25, Ebaibol Ẹri Na.

• Gaviezọ kẹ ae ziezi, re whọ ta ẹme nọ ọ rẹ lẹliẹ udu te ai otọ. Otẹrọnọ ọmọ ra ọ be sae ta epanọ oware na o kẹ riẹ uye te he, vuẹe nọ ọ dhugbẹ drọ riẹ fihọ obe kẹ owhẹ. Nọ who bi ti lele iei ta ẹme na, ta eme nọ o re wo otoriẹ rai. Rekọ whọ ta kpahe oware nọ o via na ga hrọ họ.

  “Ma tẹ gaviezọ kẹ ọmọtẹ mai ziezi no, udu u re tei otọ. Rekọ oware nọ u re kiehọ iẹe oma ha họ, nọ ma tẹ vuẹe nọ, ‘Ere akpọ na ọ rrọ enẹna, ma rẹ daoma re ọ reria omai oma.’”—Sarahi.

  Ehri-uzi Ebaibol: “Jọ ọnọ ọ rẹ kake gaviezọ, ọnọ ọ rẹ rọ okpakpa ta ẹme he.”—Jemis 1:19.

• Fiobọhọ kẹ ọmọ ra riẹ nọ o te yo usi jọ, u dhesẹ nọ oware na o be via kẹdẹ kẹdẹ evaọ oria kpobi hi. Wọhọ oriruo, a te whowho usi ohwo nọ a mu rehọ, ma re roro nọ oware nọ a be ta na o te via evaọ oria mai. Rekọ o nwane rrọ ere he. Vuẹ emọ ra oware nọ who bi ru re eware itieye na e siọ ae ba ẹvia kẹ. Whọ vẹ jẹ kareghẹhọ nọ re a te ti whowho usi, yọ oware nọ o rẹ kake via ha. Orọnikọ oware nọ o rẹ via kẹdẹ kẹdẹ hẹ.

  “Fiobọhọ kẹ emọ ra siọ awa ba ẹruọ ga hrọ. Ẹsibuobu, oware nọ ohwo o bi roro oye o rẹ lẹliẹe ruawa. Fikiere, who te fiobọhọ kẹ emọ ra roro kpahe emamọ eware, a gbẹ te nwane ruawa tere he.”—Lourdes.

  Ehri-uzi Ebaibol: “Udu ohwo nọ o wo areghẹ o rẹ lẹliẹ unu riẹ ta ẹme avọ otoriẹ udidi yọ o rẹ lẹliẹe ta ẹme ruọ ohwo oma.”—Itẹ 16:23.