Wuhrẹ Emọ Ra re A Dhesẹ Edẹro

Ekiẹriwo sa-sa i dhesẹ via no inọ ahwo nọ a re yere amọfa gaga a rẹ mai wo evawere gbe omokpokpọ. Ae a rẹ mai thihakọ ebẹbẹ, jẹ mai wo emamọ usu kugbe amọfa. Ohwo jọ nọ ọ rẹ kiẹ kpahe eware nọ a re se Robert A. Emmons ọ ta nọ, ohwo o te wo uruemu edẹro, “o rẹ thọe no ikpehre iruemu nọ e rẹ sae raha ohwo, iruemu wọhọ ihri-eriọ, egrẹ-ọjẹ, uvou-uthethei, gbe ofu-omuo.”a

Didi irere i re te emọ nọ a te wo edẹro hayo be hai yere amọfa? Nọ a muẹrohọ izoge jọ nọ i bu te egba ihrẹ (700) evaọ ikpe ene, a ruẹ nọ izoge nọ i wo edẹro họ enọ e mae whaha ekpehre iruemu wọhọ, eritho nọ a re rri tho evaọ ẹdawọ, imu egaga nọ a rẹ rehọ, gbe iruemu efa nọ e sae wha ebẹbẹ se ai hayo amọfa.

• O rẹ jọ bẹbẹ re ohwo o wo edẹro nọ o te bi roro nọ amọfa a reosa riẹ. Emọ buobu a re roro nọ emamọ eware nọ a be hai ru kẹ ae na yọ enọ o gba ahwo na họ nọ a re ru kẹ ae. Yọ ohwo o te bi rri okẹ nọ a kẹ riẹ wọhọ osa nọ a re riẹ nọ u fo nọ a rẹ hwa kẹe, o sai ru ei bẹbẹ re o yere ohwo nọ o ru oware na kẹe na.

  Ahwo buobu a wo ọkpọ uruemu yena nẹnẹ. Oni jọ nọ a re se Katherine o muẹrohọ nọ, “Nẹnẹ, a bi wuhrẹ ahwo nọ u fo nọ a re wo eware kpobi nọ a gwọlọ. A rẹ jọ etẹlẹvishọno, itanẹte, gbe ebe dhesẹ iwoho eware buobu jẹ vuẹ omai nọ u fo nọ ma rẹ jọ ahwo ọsosuọ nọ a re wo eware yena.”

• Emọ a rẹ sai wuhrẹ uruemu edẹro no emaha ze. Oni jọ nọ a re se Kaye o muẹrohọ nọ: “Emọ e rẹ kaki wuhrẹ oware gaga. Wọhọ epanọ ọlẹ ọ rẹ dhẹ liọ nọ a tẹ kẹe ubioja evaọ okenọ ọ be dhẹ ze obọ na, ere ọvona ọmọ o re wo emamọ iruemu nọ a te wuhrẹ iẹe no emaha ze.”

Epanọ whọ sai ro wuhrẹ emọ re a wo edẹro

• Wuhrẹ ae epanọ a rẹ ta ẹme na. Makọ emọ nọ e gbẹ maha gaga dede a sai wuhrẹ epanọ a rẹ ta nọ ‘mẹrigwẹ’ hayo ‘whẹ kobiruo’ nọ ohwo jọ ọ tẹ kẹ ae oware hayo ru oware kẹ ae. Nọ a be rro je wo areghẹ na, a vẹ te hai yere amọfa ziezi nọ a te ru ai ọghọ.

  

  Ohrẹ Ebaibol: “Wha hai dhesẹ nọ wha wo edẹro.”—Ahwo Kọlọsi 3:15.

  “Ẹsikpobi ọmọ-oruọmọ ikpe esa mai nọ ọ rrọ ọmọzae ọ rẹ ta nọ ‘whẹ kobiruo,’ yọ oke kpobi nọ ọ tẹ be yare oware, ọ rẹ ta nọ ‘ivie.’ Ọsẹgboni riẹ o wuhrẹ onana mi. Fikinọ ae omarai a rẹ rọ ẹmeunu gbe uruemu rai dhesẹ edẹro ẹsikpobi, u bi fiobọhọ kẹ ọmọ rai wuhrẹ edẹro re.”—Jeffrey.

• Wuhrẹ ae eware nọ a rẹ sai ru. Oke ofa kpobi nọ ohwo jọ ọ tẹ kẹ emọ ra oware, whọ sae vuẹ ae re a kere ẹmẹme fihọ obe hayo ekade kẹ ohwo na ro yere iei. Yọ whọ tẹ be hae kẹ emọ ra iruo ru evaọ uwou na, u re fiobọhọ kẹ ae ruẹ nọ kpakọ okolo iruo a re ro ru eware jọ wowoma evaọ uwou ho.

  

  Ohrẹ Ebaibol: “Ẹkẹ evawere e mae rrọ vi emio.”—Iruẹru Ikọ 20:35.

  “Emọ ivẹ mai nọ e rrọ izoge a re roro kpahe oghẹrẹ emu nọ ma ti there, fiobọhọ there emu na, je ru eware efa evaọ uwou na. Onana u bi fiobọhọ kẹ ae ruẹ epanọ mai ọsẹgboni rai ma be daoma te, yọ a re rri oware ovo nọ ma bi ru vo ho.”—Beverly.

• Wuhrẹ ae uruemu nọ u re fiobọhọ kẹ ae wo edẹro. Wọhọ epanọ okakọ o rẹ dhẹ ziezi nọ a tẹ kọe fihọ emamọ otọ na, ere ohwo o re wo edẹro ziezi nọ o te wo omaurokpotọ. Ahwo nọ a wo omaurokpotọ a re vuhumu nọ ae ọvo a rẹ sai ru oware kpobi hi, a gwọlọ obufihọ amọfa, fikiere o rẹ da ae ẹro fia nọ ohwo jọ o te gine fiobọhọ kẹ ae.

  

  Ohrẹ Ebaibol: “Avọ omaurokpotọ wha rri amọfa inọ a rro vi owhai, wha gwọlọ ewoma obọrai ọvo ho, rekọ ewoma amọfa re.”—Ahwo Filipai 2:3, 4.

  “Ẹsejọ nọ ma tẹ be re emu evaọ owọwọ, ma rẹ zaha aroza jọ. Omomọvo o re gbiku oware jọ nọ o da riẹ ẹro gaga. Onana u re fiobọhọ kẹ omai kpobi roro kpahe emamọ eware nọ e da omai ẹro, jẹ whaha ekpehre iroro hayo iroro oriobọ.”—Tamara.

Oware jọ nọ u re fiobọhọ: Dhesẹ emamọ oriruo. Nọ emọ ra a tẹ ruẹ nọ whọ be hai yere amọfa gbe ae omarai ẹsikpobi, o te mae lọhọ kẹ ae re a wuhrẹ epanọ a re wo edẹro.