Otọ U Nuhu Raha Eware Gaga je Kpe Ahwo Evaọ Turkey gbe Syria—Eme Ebaibol na Ọ Ta?

Evaọ ẹdẹ avọ 6 Ava, 2023 nọ o jọ Ẹdọvo-Oka, otọ u nuhu raha eware gaga je kpe ahwo evaọ Turkey gbe Syria.

• “Evaọ Ẹdọvo-Oka, otọ u nuhu gaga evaọ abọjọ Turkey gbe ofẹ obọze ukiediwo-ọre Syria, yọ u kpe ahwo nọ a bu vi idu esa gbe egba ihrẹ (3,700). Onana o via evaọ okenọ ekpahe e jọ gaga, onọ u ru rie mae bẹ kẹ idu ahwo nọ e nwoma hayo nọ iwou rai e raha. U te je ru ei bẹbẹ re a gwọlọ ahwo nọ a zọ.”—Reuters, Ava 6, 2023.

O rẹ da omai gaga nọ ma te yo ekpehre usi utiona. Evaọ oke utiona, ma sae rẹroso Jihova nọ ọ rrọ “Ọghẹnẹ omosasọ kpobi” na inọ o ti fiobọhọ kẹ omai. (2 Ahwo Kọrint 1:3) Ọ rẹ kẹ omai “omosasọ nọ u re no Ikereakere na ze [re ma ruẹsi] wo ẹruore.”—Ahwo Rom 15:4.

Ma sae jọ Ebaibol na wuhrẹ kpahe:

• Oware nọ a ruẹaro riẹ kpahe etọ nọ i ti nuhu.

• Epanọ ma sai ro wo omosasọ gbe ẹruore.

• Epanọ Ọghẹnẹ o ti ro si uye-oruẹ kpobi no.

Re whọ sae riẹ oware nọ Ebaibol na ọ ta kpahe izoẹme yena, se izoẹme nana:

• “Eme Ebaibol na Ọ Ta Kpahe Etọ nọ I ti Nuhu Gaga?”

• “Ẹvẹ Mẹ Sai ro Wo Ẹruore?”

• “Ọghẹnẹ O ti Si Uye-Oruẹ Kpobi No Otọ Kẹle”