Kọ Arozaha Olympic na Ọ Sae Ginẹ Wha Okugbe Ze?—Eme Ebaibol na Ọ Ta?

Evaọ 2024 nọ a te zaha arozaha Olympic na, ahwo nọ a bu te oware wọhọ ima-idu isoi a ti rri ughe arozaha na. Ahwo nọ a te zaha arozaha na a ti no erẹwho nọ i bu te egba ivẹ gbe ezeza (206) ze. Ọzae jọ nọ a re se Thomas Bach, nọ ọ rrọ prẹsidẹnte International Olympic Committee ọ ta nọ: “Ma bi ru eware nọ e rẹ sae wha udhedhẹ gbe okugbe ze evaọ akpọ na.” Ọ tẹ jẹ ta nọ: “Oware jọ nọ ma be rọ zaha arozaha Olympic họ re ahwo kpobi a rria kugbe dhedhẹ. Fikiere joma rọ evawere zaha arozaha na dede nọ ma no ọvuọ orẹwho riẹ ze.”

Kọ arozaha Olympic na ọ sae ginẹ wha udhedhẹ gbe okugbe ze? Kọ ma wo ẹruore nọ ahwo-akpọ a te rria kugbe dhedhẹ ẹdẹ jọ?

Kọ arozaha Olympic ọ sae ginẹ wha udhedhẹ gbe okugbe ze?

Arozaha Olympic enukpe nana o be lẹliẹ ahwo roro kpahe eware efa nọ e be via. A be jọ arozaha na dhesẹ eware nọ i wobọ kugbe isuẹsu gbe eware nọ ahwo a bi ro sikẹ, yọ eware nana e rẹ wha ohẹriẹ ze. Eware nana jọ họ, udu nọ ohwo o wo, omagbẹre fiki ovioma hayo egagọ, gbe okienyẹ.

Arozaha Olympic na gbe oghẹrẹ erozaha itienana efa i re ru oma sasa ahwo. Rekọ ahwo a rẹ jọ oghẹrẹ erozaha nana ru eware nọ e rẹ wha ohẹriẹ ze, yọ eware nana e rẹ wha udhedhẹ gbe okugbe ze he.

A jọ Ebaibol na ruẹaro kpahe uruemu nọ ahwo a ti dhesẹ, nọ u ti ru ei bẹbẹ re ahwo a rria kugbe dhedhẹ. (2 Timoti 3:1-5) Re who gbe wuhrẹ kpahe eruẹaruẹ Ebaibol nana, se uzoẹme na “Kọ A Jọ Ebaibol Ruẹaro Kpahe Iruemu Iyoma nọ Ahwo A Wo Nẹnẹ Na?”

Ma wo ẹruore nọ ahwo-akpọ kpobi a te rria kugbe dhedhẹ

Ebaibol na o dhesẹ nọ ahwo-akpọ kpobi a te rria kugbe dhedhẹ. Ebaibol na ọ ta nọ ahwo kpobi a te jọ otọ esuo egọmeti nọ o ti su no obọ odhiwu ze. A se egọmeti na “Uvie Ọghẹnẹ.”—Luk 4:43; Matiu 6:10.

Jesu Kristi nọ ọ rrọ Ovie Uvie na, o ti ru nọ udhedhẹ o te rọ jọ akpọ na soso. Ebaibol na ọ ta nọ:

• “Ikiẹrẹe na e te gbọ bọbọbọ, yọ udhedhẹ o te dafia.”—Olezi 72:7.

• “O ti siwi oyogbe nọ o bi bo kẹ obufihọ na. . . O ti siwi ai no okienyẹ gbe ozighi.”—Olezi 72:12, 14.

Makọ enẹna dede, eware nọ Jesu ọ ta evaọ Ebaibol na i bi fiobọhọ kẹ ima ahwo buobu rria dhedhẹ kugbe ohwowho. Ahwo nana a be rria erẹwho nọ i bu te egba ivẹ gbe ọgbagbizii (239). Eware nọ ma wuhrẹ no Ebaibol na ze i bi fiobọhọ kẹ omai Isẹri Jihova rria dhedhẹ kugbe ohwo kpobi evaọ akpọ na. Re whọ riẹ epanọ onana o sae rọ lọhọ, se Uwou-Eroro nọ uzoẹme riẹ o ta nọ “Epanọ Ma Sae rọ Whaha Omukpahọ.”