ENỌ IZOGE NA

Eme Me re Ru Otẹrọnọ Ọsẹgboni Mẹ A be Fa Orọo?

Oware jọ nọ o rẹ kẹ uzoge uye gaga họ, nọ ọsẹgboni riẹ a tẹ fa orọo. Ẹvẹ whọ sai ro thihakọ edada riẹ?

Ma te ta kpahe eware nana

Eware esa nọ who re ru hu

1. Whọ fuọ omara ha

“U wo ẹdẹ jọ nọ oni mẹ ọ vuẹ omẹ nọ, nọ a nwani yẹ omẹ no, ẹsiẹe ẹbẹbẹ riẹ avọ ọsẹ mẹ u ro muhọ. Fikiere mẹ tẹ rehọ iẹe nọ fiki mẹ orọo ọsẹgboni mẹ o rọ fa.”—Diana.

Kareghẹhọ onana: Orọnọ fiki ra ọsẹgboni ra a rọ fa orọo rai hi. Ẹwhọ rai aimava oye o wha orọo ofa na ze. Whẹ họ ọnọ ọ wha ẹbẹbẹ na ze he, yọ whọ sai ku ẹbẹbẹ na họ gbe he. Aimava na o rrọ obọ.

“Ohwo kpobi ọ te wọ ọvuọ owha riẹ.”—Ahwo Galesha 6:5.

2. Who fi ẹgo họ eva ha

“Eva ọsẹ mẹ e be dha omẹ gaga inọ o lele aye ọfa siọ oni mẹ ba. O te jọ bẹbẹ gaga re mẹ wariẹ fievahọ iẹe.”—Rianna.

Kareghẹhọ onana: Ẹsejọhọ orọo ọsẹgboni ra nọ o fa na oye o be lẹliẹ eva dha owhẹ na. Yọ whọ tẹ dha eva, whọ dha eva thọ họ. Rekọ ẹgo nọ who re fihọ eva u woma kẹ owhẹ hẹ. O sae lẹliẹ owhẹ mọ je kpo kuẹkuẹkuẹ. Oyejabọ nọ ahwo a rẹ rọ ta nọ ohwo nọ o fi ẹgo họ eva ọ wọhọ ohwo nọ ọ da enua, ọ tẹ be hẹrẹ re omọfa o kie ẹyao.a

“Nyasiọ evedha ba re whọ siọ ofu-omuo ba.”—Olezi 37:8.

3. Who roro ho inọ whẹ omara whọ te sai wo evawere evaọ orọo ra ha

“Ozọ u bi mu omẹ gaga inọ me ti ru epanọ ọsẹ mẹ o ru na. Ozọ o bi mu omẹ inọ me te wo ọzae je yẹ emọ no, me ti ru oware nọ o lẹliẹ orọo ọsẹgboni mẹ fa na.”—Jessica.

Kareghẹhọ onana: Fikinọ orọo ọsẹgboni ra o fa, oyena o nwani dhesẹ hẹ inọ orọo ra o te fa re. Whọ sai tube wuhrẹ emamọ eware jọ no oware nọ o via kẹ ọsẹgboni ra na ze. Wọhọ oriruo, o sai ru owhẹ rri otọ mu ziezi nọ whọ tẹ gwọlọ wo ọzae hayo aye. U te no ere no, orọo ọsẹgboni ra nọ o fa na o rẹ sai ru owhẹ wo emamọ iruemu jọ nọ e te lẹliẹ owhẹ jọ emamọ ọzae hayo aye nọ whọ tẹ rọo no.

“Jọ omomọvo ọ kiẹ iruẹru obọriẹ riwi.”—Ahwo Galesha 6:4.

Ọmọzae nọ a gba owọ riẹ ọ keria agbara yọ elaptọpo ọ rrọ iẹe awọ. — Orọo ọsẹgboni ra nọ o fa na o sae da gaga wọhọ owọ nọ u wiri. Rekọ nọ oke o be nyaharo na, eware i ve ti muhọ ewoma

Eware esa nọ whọ rẹ sai ru

1. Ta oware nọ o be kẹ owhẹ uye via. Ahwo nọ a rẹ kake ta oware nọ o be kẹ ae uye via ha, a rẹ sai ru eware jọ nọ e rẹ wha uye se ai, eware wọhọ udi nọ a rẹ da thomawa hayo imu egaga nọ a rẹ rehọ. Who ru ere vievie he. Ukpoye, ru eware nọ ma be te fodẹ na:

Lele ọsẹgboni ra ta ẹme. Otẹrọnọ ọsẹ ra hayo oni ra ọ gwọlọ nọ whọ jọ abọ riẹ evaọ ẹbẹbẹ orọo rai, rọ unu kpotọ vuẹe nọ oware nọ o bi ru na o be kẹ owhẹ uye. Otẹrọnọ o rrọ bẹbẹ kẹ owhẹ re who lele ai ta ẹme, whọ sai kere ileta se omọvo rai jọ hayo aimava na.

Lele ogbẹnyusu nọ who fievahọ ta ẹme. Whọ tẹ ta eva kẹ ohwo jọ nọ ọ romatotọ gaviezọ kẹ owhẹ, o rẹ sai ru udu te owhẹ otọ. Ebaibol na ọ ta nọ “emamọ ogbẹnyusu o re dhesẹ uyoyou ẹsikpobi ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17.

Lẹ se Ọghẹnẹ. Jihova Ọghẹnẹ họ “Ọnọ o re yo olẹ.” Whọ tẹ ta oware nọ o be kẹ owhẹ uye kẹe, ọ rẹ gaviezọ ẹsikpobi. (Olezi 65:2) Ebaibol na ọ ta nọ whọ sai ‘gbolo awaọruọ ra kpobi kẹe, keme ọ be daezọ ra.’—1 Pita 5:7.

Ono evaọ usu ọsẹ hayo oni ra whọ rẹ sae rọ unu kpotọ lele ta ẹme?
Ogbẹnyusu vẹ who fievahọ (nọ ọ rrọ ọhwa ra hayo nọ ọ kpako vi owhẹ) nọ ọ rẹ sai fiobọhọ kẹ owhẹ?
Eware jọ vẹ whọ rẹ sae lẹ kpahe?

2. Rehọ eware oghẹrẹ nọ e rrọ enẹna

Fikinọ ọsẹgboni ra a fa orọo, ẹsejọhọ onana u ru nọ wha rọ kwa kpohọ uwou ọfa, who te mu isukulu ọfa họ, u ru nọ eware e rọ dina ga kẹ owhai omojọ, hayo nọ who ro tube mu egbẹnyusu ekpokpọ. Ma riẹ nọ onana o sae kẹ owhẹ uye gaga, o vẹ lẹliẹ owhẹ roro nọ akpọ ra ọ tahaku no. Eme ọ rẹ sai ru inwene nana lọhọ kẹ owhẹ omojọ? Daoma tẹrovi epanọ whọ sae rọ rehọ eware oghẹrẹ nọ e rrọ enẹna.

Eme ọ mae rro nọ o nwene evaọ uzuazọ ra fiki orọo ọsẹgboni ra nọ o fa na?
Eme ọ rẹ sai fiobọhọ kẹ owhẹ rehọ eware oghẹrẹ nọ e rrọ enẹna?

“Me wuhrẹ epanọ me re ro wo edẹro no ghelọ uyero kpobi nọ mẹ rrọ kẹhẹ.”—Ahwo Filipai 4:11.

3. Daoma ruẹ emamọ uruemu nọ who wo

Dede nọ orọo ọsẹgboni ra nọ o fa na o sae lẹliẹ owhẹ jọ awawa, o sai je fiobọhọ kẹ owhẹ ruẹ emamọ uruemu nọ who wo. O sai je tube ru nọ whọ rẹ rọ riẹ eware jọ nọ u fo nọ whọ rẹ gbẹ daoma fihọ. Jeremy nọ ọsẹgboni riẹ a fa orọo evaọ oke nọ ọ rọ jọ ikpe ikpegbesa ọ ta nọ: “Orọo ọsẹgboni mẹ nọ o fa na o lẹliẹ omẹ wo areghẹ ọkpako asohẹrioke. Mẹ họ ọmọ ọkpako, fikiere mẹ tẹ ruẹ nọ me re fiobọhọ kẹ oni mẹ gbe oniọvo mẹ ọrọ ọmọzae nọ a yẹ tu omẹ.”

Ọmọtẹ nọ o bi lele oniọvo riẹ ọmaha ru ihomwhọko riẹ yọ oni riẹ ọ rrọ obọ ikichini there emu. — Orọo ọsẹgboni ra nọ o fa na o sae lẹliẹ owhẹ wo emamọ uruemu

Fiki ẹbẹbẹ nọ ọsẹgboni ra a wo na, emamọ iruemu vẹ onana u ru owhẹ muẹrohọ evaọ omara?
Iruemu efa vẹ whọ gwọlọ daoma wo?

“Ẹkwoma ẹzi Ọghẹnẹ a ro kere Ikereakere na kpobi, yọ e rẹ kẹ erere nọ a tẹ be rehọ ai . . . kpọ eware vi.”—2 Timoti 3:16.

a Re who gbe se kpahe ẹme nana, rri uzoẹme na “Ẹvẹ Mẹ Sae rọ Nyẹ Ofu Mẹ?”

Ẹme nọ ehwa ra a ta

“Anwẹnọ ọsẹgboni mẹ a rọ fa orọo na, u ri kri hi nọ mẹ rọ ta kẹ omamẹ nọ mẹ rẹ tubẹ rehọ eware oghẹrẹ nọ e rrọ. Evaọ oke ọsosuọ, mẹ tubẹ riẹ otọ oware nọ o jẹ via na ha. Kẹsena nọ mẹ kpako te oware wọhọ ikpe ikpegbesa no, me te je mu ofu kẹ ọsẹgboni mẹ gaga. Obọnana nọ mẹ kpako te ikpe ikpegberee no na, me te rri nọ mẹ rẹ tubẹ rehọ eware epanọ e rrọ re me yeri akpọ mẹ vrẹ.”—Elena.

“Ọsẹgboni mẹ a fa orọo oke nọ mẹ jọ ikpe ihrẹ. Nọ mẹ jọ ikpe udhegbọvo, mẹ avọ ọsẹ mẹ ma tẹ keria, mẹ tẹ vuẹe nọ mẹ gwọlọ nọ mẹ avọ iẹe ma ta kpahe eware kpobi nọ e via na. Oware wọhọ euwa ivẹ ma ta ẹme kpahe oware nọ o wha orọo ofa na ze gbe epanọ o kẹ omẹ uye te. Orọo nọ a fa na o dha omẹ eva gaga, rekọ me you ọsẹ mẹ, mẹ tẹ jẹ riẹ oware nọ o lẹliẹ e riẹ ru oware nọ o ru na. U ru nọ mẹ rọ kpairoro vrẹ eware nọ e via, yọ onana u ru udu te omẹ otọ.”—Katelyn.