ENỌ IZOGE NA
Fikieme Ọsẹgboni Mẹ A gbẹ be Kẹ Omẹ Uvẹ Ru Eware nọ E rẹ Were Omẹ Hẹ?
Egbẹnyusu ra a zizie owhẹ re wha gbe kpohọ epati evaọ Ẹdẹ-Ọmaha. Whọ tẹ nọ ọsẹgboni ra sọ whọ sae nya, rekọ a se thahe thahe. Uyo nọ a kẹ owhẹ na u gbe owhẹ unu hu. Ere ọvona a yo kẹ owhẹ kẹle na nọ whọ nọ ae sọ whọ sai kpohọ epati jọ.
Ma te ta kpahe eware nana
Fikieme ọsẹgboni mẹ a be hae rọ se ẹsikpobi?
O tẹ wọhọ nọ ẹsikpobi nọ whọ tẹ ta nọ whọ gwọlọ ru oware jọ ọsẹgboni ra a rẹ rowo ho, whọ sai roro nọ a gwọlọ nọ who ru eware nọ e rẹ were owhẹ hẹ.
Ere ọmọtẹ jọ nọ a re se Marie o je roro re nọ a kake dẹ ifonu kẹe. Ọ ta nọ: “Ọsẹ mẹ o fi izi buobu họ kẹ omẹ. Ọ fodẹ eware buobu nọ mẹ rẹ danlodu hu, ahwo nọ mẹ rẹ sai lele ta ẹme gbe oke nọ me re lele ai ta ẹme te evaọ owọwọ. Rekọ evaọ oke yena, egbẹnyusu mẹ nọ i wo ifonu a je ru oware kpobi nọ u je rai!”
Roro kpahe enọ nana: Kọ who roro nọ ọsẹ Marie ọ ginẹ gwọlọ whaha iẹe eware nọ e rẹ were iẹe? Eme o sae jọnọ ọsẹ Marie ọ be ruawa kpahe nọ o lẹliẹ e riẹ fi izi na họ kẹe?
Nọ a te fi uzi họ kpahe epanọ ohwo ọ rẹ dhẹ omoto vẹrẹ te, o rẹ wọhọ ẹsenọ a rọ ifi gbae, rekọ onana o rẹ thọ ohwo na; epọvo na izi nọ ọsẹgboni a fihọ evaọ uwou e rẹ thọ ohwo re
Dawo onana: Ru wọhọ ẹsenọ whọ rrọ ọsẹ hayo oni, yọ who wo ọmọ nọ ọ rrọ uzoge nọ whọ dẹ ifonu kẹ obọ. Eware jọ vẹ whọ te ruawa kpahe? Izi vẹ who ti fihọ kẹe re whọ sae thọe no obọ ahwo oyoma? Eme whọ te ta otẹrọnọ ọmọ ra na ọ ta nọ whọ gwọlọ nọ o ru eware nọ eva e rẹ rọ were iẹe he?
“Ẹsikpobi ọsẹ mẹ ọ rẹ ta nọ, ‘Dae rehọ iẹe nọ whẹ họ omẹ re whọ ruẹ epanọ o rẹ jọ.’ Nọ me te gine fi omamẹ họ ẹta ọsẹ mẹ, mẹ rẹ ruẹ nọ ọ gwọlọ ewoma mẹ, oyejabọ o ro fi izi na họ kẹ omẹ. Me te wo emọ, mẹ te gwọlọ nọ a re koko izi nọ me fihọ kẹ ae wọhọ epanọ ọsẹ mẹ ọ gwọlọ nọ me re koko izi nọ o fihọ kẹ omẹ na.”—Tanya.
Eme me re ru re ọsẹgboni mẹ a sae kẹ omẹ uvẹ ru eware nọ e rẹ were omẹ?
“Whọ tẹ maki do dede, emamọ oware ovo u re noi ze he, yọ o te wha evawere se owhẹ avọ ọsẹgboni ra ha. Who te lele ọsẹgboni ra si ikẹ, a ti rri owhẹ nọ who ri wo areghẹ hẹ yọ who ri te ohwo nọ a rẹ kuvẹ re o ru oware nọ ọ gwọlọ họ.”—Richard.
“Fikinọ ọsẹgboni mẹ a gwọlọ ewoma mẹ a re ro fi uzi họ kẹ omẹ. Orọnikọ a gwọlọ rọ ifi gba omẹ hẹ. Rekọ a gwọlọ nọ mẹ wereva evaọ uzuazọ ababọ eware nọ e rẹ wha ẹbẹbẹ hayo uye se omẹ nọ me re ru.”—Ivy.
Ohrẹ Ebaibol: “Ohwo ogheghẹ o re dhesẹ evedha riẹ kpobi via, rekọ ohwo owareghẹ ọ rẹ nyẹ omariẹ.”—Itẹ 29:11.
“Mẹ jẹ lẹlẹ rọ ifonu mẹ ru eware nọ ọsẹ mẹ ọ ta nọ me ru hu. Me je vi uwou se egbẹnyusu mẹ evaọ udevie aso yọ mẹ jẹ danlodu eware nọ ọsẹ mẹ ọ ta nọ mẹ danlodu hu. Rekọ uwhremu na ọ rẹ riẹ, o ve ru izi na ga keme o gbe fievahọ omẹ hẹ. Fikiere ohwo ọ tẹ be lẹlẹ ru oware nọ a ta kẹe nọ o ru hu, emamọ oware u re noi ze he.”—Marie.
“Wo odiri. O sae rehọ oke re ọsẹgboni ra a te ti nwene uzi nọ a fihọ kẹ owhẹ. Rekọ a tẹ ruẹ nọ who bi koko izi nọ a fihọ, a sai ru izi na lọhọ omojọ.”—Melinda.
Ohrẹ Ebaibol: “Wha yoẹme kẹ esẹgbini rai evaọ oware kpobi.”—Ahwo Kọlọsi 3:20.
“Who te bi si ikẹ nọ who re ru oware nọ whọ gwọlọ na, onana u re ru eware lọhọ họ hayo ru nọ ọsẹgboni ra a rẹ rọ kẹ owhẹ uvẹ ru oware nọ whọ gwọlọ họ.”—Natalie.
“Ọsẹgboni a rẹ gwọlọ ruẹ sọ whẹ yọ ohwo nọ o re roro oware te re o te ti ru ei. Fikiere nọ me te bi lele ọsẹgboni mẹ ta ẹme, mẹ rẹ vuẹ ae oware nọ mẹ rọ gwọlọ ru oware jọ ukpenọ mẹ rẹ ta nọ oware na o were omẹ ọvo. Me te ru ere, ẹsibuobu a rẹ kẹ omẹ uvẹ ru oware nọ mẹ gwọlọ ru na.”—Joseph.
Ohrẹ Ebaibol: “Rọ ọghọ kẹ ọsẹ ra avọ oni ra.”—Ahwo Ẹfisọs 6:2.