Kọ Isẹri Jihova a rrọ usu ahwo nọ a gwọlọ nọ ahwo Ju a wo isuẹsu obọrai?

Ijo, a rrọ usu rai hi. Isẹri Jihova yọ Ileleikristi, yọ Ebaibol a rehọ eware nọ a rọwo no ze. Utu egagọ jọ a re wuhrẹ nọ eruẹaruẹ Ebaibol jọ o ta nọ ahwo Ju kpobi a ti kokohọ obọ Palẹstain, rekọ Isẹri Jihova a rri rie ere he. A rọwo ho inọ eruẹaruẹ Ebaibol jọ o ta gbiae inọ ahwo Ju kpobi a ti kokohọ oria ovo re a su omarai. Evaọ uzẹme, Ebaibol na ọ ta ha inọ egọmeti ohwo-akpọ jọ o kpehru vi ọfa hayo nọ ahwo orẹwho jọ a woma vi ahwo erẹwho efa. Uwou-Eroro Na, emagazini nọ Isẹri Jihova a be hai kere o ta vevẹ nọ: “Ebaibol na ọ jọ oria ovo ta ha inọ ahwo Ju kpobi a ti kokohọ oria jọ re a su omarai.”

Obe na, Encyclopædia Britannica o ta nọ utu nọ o be gwọlọ koko ahwo Ju họ na yọ “utu ahwo Ju jọ nọ o be họre re a rọ isuẹsu ahwo Ju mu evaọ orẹwho Palẹstain.” Oware nọ o be lẹliẹ ae jẹ owọ yena họ, re a wo isuẹsu gbe egagọ obọrai. Isẹri Jihova a rrọ usu ahwo nọ a gwọlọ nọ ahwo Ju a wo isuẹsu gbe egagọ obọrai hi, yọ a be tha ae uke gbe he.

Ukoko Isẹri Jihova yọ egagọ, a whomahọ isuẹsu vievie he, makọ enọ ahwo Ju a be họre kẹ dede. A riẹ Isẹri Jihova ziezi inọ a re dhomahọ isuẹsu hu, yọ whọ rẹ sae jọ ebe buobu se ku onana. U te no ere no, a jọ erẹwho jọ gboja kẹ Isẹri Jihova gaga no fikinọ a rọwo dhomahọ isuẹsu hu. Ma riẹ nọ Uvie Ọghẹnẹ nọ u ti su no obọ odhiwu ze ọvo o te sae wha uvi udhedhẹ ziọ akpọ na, orọnikọ isuẹsu ohwo-akpọ hayo utu jọ họ.

Makọ oria kpobi nọ Isẹri Jihova a be rria kẹhẹ, a re ru lele izi nọ egọmeti o fihọ keme ere Ebaibol na o wuhrẹ. A rẹ wọso egọmeti hi, yọ a re fi ẹmo gbe he.