Fikieme Isẹri Jihova A Gbe ro Ru Kresimesi Hi?
Eware nọ ahwo a rẹ ta kpahe omai
Ọrue: Isẹri Jihova a re ru Kresimesi hi keme a rọwo Jesu hu.
Uzẹme: Mai yọ Ileleikristi. Ma rọwo nọ ẹkwoma Jesu Kristi ọvo ma sai ro wo esiwo.—Iruẹru Ikọ 4:12.
Ọrue: Wha bi fi ohẹriẹ họ iviuwou ahwo keme wha bi wuhrẹ ahwo inọ a ru Kresimesi hi.
Uzẹme: Ma wo ọdawẹ kẹ iviuwou ahwo gaga, yọ ma be rọ Ebaibol na fiobọhọ kẹ iviuwou re a sai wo okugbe.
Ọrue: Fikinọ wha re ru “Kresimesi” hi, wha be reawere emamọ eware nọ i re no Kresimesi ze he wọhọ ọghoruo, omawere, gbe udhedhẹ kugbe ahwo kpobi.
Uzẹme: Oke kpobi ma re ruọghọ, yọ ma be daoma rria dhedhẹ kugbe ahwo kpobi. (Itẹ 11:25; Ahwo Rom 12:18) Wọhọ oriruo, oghẹrẹ nọ ma re ru iwuhrẹ mai jẹ ta usiuwoma mai o nwane rọwokugbe ẹme Jesu na, inọ: “Ọvọvẹ a kẹ owhai, wha kẹ ọvọvẹ.” (Matiu 10:8) Ofariẹ, ma be ta kẹ ahwo nọ a fi ẹruore rai họ Uvie Ọghẹnẹ keme oye ọvo o te wha udhedhẹ ziọ akpọ na.—Matiu 10:7.
Kọ fikieme whai Isẹri Jihova wha gbe ro ru Kresimesi hi?
Ẹdẹ uwhu riẹ Jesu ọ ta nọ ma kareghẹhọ orọnikọ ẹdẹ-eyẹ riẹ hẹ.—Luk 22:19, 20.
Ikọ Jesu gbe Ileleikristi ikpe-udhusoi ọsosuọ, a ru Kresimesi hi. Obe na New Catholic Encyclopedia o ta nọ, “okenọ ikọ Jesu a whu re no, ẹsiẹe ehaa Kresimesi i ro muhọ evaọ ubrobọ ukpe 243 C.E.”
Imuẹro evuọvo e riẹ hẹ inọ edẹ 25 amara Akpegbivẹ a ro yẹ Jesu; a rẹ tubẹ jọ Ebaibol na ruẹ ẹdẹ nọ a ro yẹ Jesu hu.
Ma riẹ nọ Ọghẹnẹ ọ jẹ ehaa yena rehọ họ keme obọ egedhọ i muhọ no ze.—2 Ahwo Kọrint 6:17.
Fikieme o rọ rọnọ whai ọvo họ ahwo nọ a re ru Kresimesi hi?
Dede nọ ahwo buobu a riẹ nọ ehaa Kresimesi e rrọ Ebaibol ho, yọ obọ egedhọ i muhọ no ze, a gbe bi ru ei ghele. Ahwo otiọye na a sae nọ inọ: Fikieme Ileleikristi a gbe ro ru ehaa Kresimesi hi? Fikieme o rọ rọnọ whai Isẹri Jihova ọvo họ ahwo nọ a re ru Kresimesi hi?
Ebaibol na ọ tuduhọ omai awọ nọ ma rehọ “ẹgba iroro” mai ruiruo ziezi. (Ahwo Rom 12:1, 2) O wuhrẹ omai nọ ma rri uzẹme na ghaghae. (Jọn 4:23, 24) Dede nọ oghẹrẹ nọ ahwo a re rri omai u muẹme, ma rẹ talamu oware nọ Ebaibol ọ ta, o tẹ make rọnọ onana o te lẹliẹ ahwo rri omai oghẹrẹ jọ.
Dede nọ ma re ru Kresimesi hi, ma re gu ahwo nọ a bi ru ei ẹdhọ họ, keme ohwo kpobi o wo uvẹ nọ ọ rẹ rọ salọ oware nọ u je riei. Nọ ahwo a tẹ salọ nọ a bi ru Kresimesi, ma rẹ whaha ae he.