Ẹvẹ Mẹ Sae rọ Whaha Arozaha Ọtọtọ?
Uyo nọ Ebaibol na ọ kẹ
Joma ta kpahe eware jọ nọ whọ rẹ sai ru, gbe ehrẹ Ebaibol nọ e rẹ sai fiobọhọ kẹ owhẹ:
Tẹrovi iruo ra. Jọ wowou kugbe ibe iruiruo ra je wo adhẹẹ kẹ ae, rekọ whaha usu okpekpe kpobi nọ o rẹ sae lẹliẹ ae roro nọ whọ te rọwo kẹ ae nọ a tẹ gwọlọ lele owhẹ wezẹ.—Matiu 10:16; Ahwo Kọlọsi 4:6.
Gọ ẹgọ nọ ọ rrọ kpatiẹ. Whọ tẹ be hai ku iwu nọ i re kpe oma ra họ hayo ku iwu nọ e rrọ kpẹkpẹe họ, o rẹ lẹliẹ ahwo roro nọ whọ gwọlọ oware jọ. Ebaibol na ọ hrẹ omai nọ ma hae gọ ẹgọ nọ “ọ rrọ owowa je dhesẹ nọ [ma] wo iroro nọ e gba.”—1 Timoti 2:9.
Salọ emamọ egbẹnyusu. Whọ tẹ be hai lele ahwo nọ a rẹ rọ oma lẹliẹ amọfa nyusu hayo nyusu kugbe ahwo nọ a re dhesẹ uruemu obẹlẹ, a ti ru eware nana kẹ owhẹ re.—Itẹ 13:20.
Kẹnoma kẹ ahwo nọ a rẹ ta eme etọtọ. Kpama nyavrẹ nọ whọ tẹ ruẹ nọ ahwo nọ wha gbẹ be ta ẹme a be ta eme “omovuọ hayo eme igheghẹ,” hayo ta “eme oworu nọ a rẹ ta rọ hwehwẹ.”—Ahwo Ẹfisọs.
Whaha uyero kpobi nọ o rẹ sai fi owhẹ họ ẹbẹbẹ. Wọhọ oriruo, yọroma gaga nọ ibe iruiruo ra a tẹ vuẹ owhẹ nọ whọ hẹrẹ nọ iruo i te kuhọ no, ababọ emamọ oware ovo nọ a vuẹ owhẹ nọ a ti ru.—Itẹ 22:3.
Ta oware nọ whọ gwọlọ via vevẹ. Otẹrọnọ ohwo jọ ọ zaha arozaha ọtọtọ kẹ owhẹ, vuẹe vevẹ nọ oware nọ o ru na o were owhẹ vievie he. (1 Ahwo Kọrint 14:9) Wọhọ oriruo, whọ sae ta nọ: “Oghẹrẹ nọ whọ be rọ rehọ oma te omẹ anwẹsiẹ na o be were omẹ vievie he. Mẹ gwọlọ nọ whọ se iẹe ba.” Whọ sai kere ileta se ohwo nọ ọ be zaha arozaha ọtọtọ kẹ owhẹ na. Jọ ileta na ta kpahe oware nọ o via na, oghẹrẹ nọ oware na o jọ owhẹ oma, gbe epanọ whọ gwọlọ nọ o re ru oke ofa. Vuẹe vẹvẹ inọ fiki eware nọ whọ rọwo gbe eware nọ who bi wuhrẹ, oyejabọ nọ oware nọ o ru na o gbẹ rọ were owhẹ hẹ.—1 Ahwo Tẹsalonika 4:3-5.
Ta kẹ amọfa re a fiobọhọ kẹ owhẹ. Otẹrọnọ ohwo na ọ gbẹ be zaha arozaha ọtọtọ na kẹ owhẹ ghele, ta kẹ ogbẹnyusu ra jọ nọ who fievahọ, ohwo uviuwou ra jọ, ibe oruiruo ra, hayo ohwo jọ nọ whọ riẹ nọ o re fiobọhọ kẹ ahwo nọ eware itieye e be via kẹ. (Itẹ 27:9) Olẹ u fiobọhọ kẹ ahwo buobu nọ oware utionana o via kẹ no. Yọ o tẹ make rọnọ whọ re lẹ ẹdẹvo ho, who rri olẹ vo ho keme Jihova nọ ọ rrọ “Ọghẹnẹ omosasọ kpobi” na ọ sai fiobọhọ kẹ owhẹ.—2 Ahwo Kọrint 1:3.
Uzuazọ o rrọ bẹbẹ kẹ ahwo buobu fiki arozaha ọtọtọ nọ a be rẹriẹ ovao dhe evaọ oria iruo rai, rekọ Ebaibol na ọ sai fiobọhọ kẹ owhẹ.