Kọ Isẹri Jihova A Wo Ebaibol Obọrai?
Isẹri Jihova a rọ efafa Ebaibol sa-sa ro ruiruo no. Rekọ Ebaibol Efafa Akpọ Ọkpokpọ ọrọ Ikereakere Efuafo Na o rẹ mae were Isẹri Jihova keme a kere odẹ Ọghẹnẹ fihọ iẹe, a fa riẹ gbagba, yọ eme riẹ e rrọ vevẹ.
A kere odẹ Ọghẹnẹ fihọ iẹe. Efefafa Ebaibol jọ a si odẹ Ọghẹnẹ nọ o wo Ebaibol na no eva riẹ no. Wọhọ oriruo, evaọ efafa Ebaibol jọ, a fodẹ edẹ ahwo nọ a bu vi 70 nọ i fiobọhọ evaọ efafa Ebaibol yena. Ghele na, a si odẹ Jihova Ọghẹnẹ nọ o wo Ebaibol na no eva riẹ!
Rekọ evaọ Ebaibol Efafa Akpọ Ọkpokpọ na, a kere odẹ Ọghẹnẹ fihọ oria kpobi nọ ọ jọ vẹre evaọ iko-ebe ọsosuọ nọ a kere Ebaibol na fihọ, yọ ahwo nọ a fiobọhọ fa Ebaibol na a rọwo nọ a fodẹ edẹ rai hi.
A fa riẹ gbagba. Orọnikọ Ebaibol kpobi a fa gbagba lele epanọ a kaki ro kere eme ọsosuọ Ebaibol na ha. Wọhọ oriruo, enẹ a fa obe Matiu 7:13 evaọ efafa Ebaibol jọ: “Wha rọ unuẹthẹ ohwahwa na ruọ eva, keme unuẹthẹ ehẹle ọ rrọ kẹkẹe, yọ edhere nọ a rẹ rọ nya ruọ ẹe o rrọ lọlọhọ.” Rekọ ẹme nọ a kaki ro kere oria Ebaibol nana họ “ọraha,” orọnikọ “ehẹle” he. O wọhọ nọ efefafa na ọvo a fi ẹme na “ehẹle” họ oria nana keme a rọwo nọ irumuomu na a te to evaọ erae ehẹle bẹdẹ bẹdẹ. Rekọ Ebaibol na ọ rọwokugbe uwuhrẹ yena ha. Oyejabọ nọ a rọ jọ Ebaibol Efafa Akpọ Ọkpokpọ na fae gbagba inọ: “Wha rehọ unuẹthẹ ohwahwa na ruọ eva keme edhere nọ o bi su kpohọ ọraha o riama fihọ, unuẹthẹ na o rrọ kẹkẹe.”
Eme riẹ e rrọ vevẹ. Ebaibol nọ a riẹ fa ọ rẹ jọ gbagba yọ eme riẹ e rẹ jọ vevẹ nọ a rẹ sai wo otoriẹ rai lọlọhọ. Joma ta kpahe oriruo jọ. Evaọ obe Ahwo Rom 12:11, a tẹ fa ẹme nọ Pọl ukọ na ọ ta evaọ oria nana lele epanọ ọ rọ tae, o rẹ jọ “ro se ẹzi na nọ ọ be họrọ.” Fiki oghẹrẹ nọ a be ta ẹme evaọ oke mai na, ahwo a rẹ sai wo otoriẹ ẹme yena ha. Oyejabọ nọ Ebaibol Efafa Akpọ Ọkpokpọ na ọ rọ fa ẹme na evaọ oghẹrẹ nọ ahwo a sai ro wo otoriẹ riẹ lọlọhọ. O ta nọ: “Jọ ẹzi na o fi ọwhọ họ owhai oma.”
A kere odẹ Ọghẹnẹ fihọ Efafa Akpọ Ọkpokpọ na, a fa riẹ gbagba yọ eme riẹ e rrọ vevẹ, rekọ u wo oware ofa jọ nọ o ro wo ohẹriẹ no Ebaibol efa: Ọvọvẹ a be rọ rehọ iẹe kẹ ahwo. Fikiere, ima ahwo buobu a be sai se Ebaibol na evaọ ẹvẹrẹ obọrai, makọ ahwo nọ a hae te sae ruẹ ugho dẹ Ebaibol ho.