ENỌ IZOGE NA
Eme Me re Ru nọ Oware O tẹ Thọ Omẹ Obọ?
Eme whọ hai ti ru?
Se oware nọ o via kẹ Karina, jẹ rehọ iẹe nọ o be via kẹ owhẹ. Otẹrọnọ owhẹ o via kẹ, eme whọ hai ti ru?
Karina: “Mẹ jẹ dhẹ omoto kpohọ isukulu, iporisi jọ o te kru omẹ fikinọ mẹ jẹ dhẹ ga hrọ. Eva e dha omẹ gaga! Mẹ tẹ vuẹ oni mẹ, ọ tẹ ta kẹ omẹ nọ mẹ vuẹ ọsẹ mẹ. Yọ mẹ gwọlọ vuẹe he.”
Eme who hai ti ru?
Salọ ọjọ, 1: Who du vuẹ ọsẹ ra ha keme whọ gbẹ vuẹe he ọ te riẹ hẹ.
Salọ ọjọ, 2: Vuẹ ọsẹ ra oware kpobi nọ o via.
Ẹsejọhọ o rẹ jọ owhẹ oma nọ orọ 1 na omai woma, keme oni ra o ti roro nọ whọ vuẹ ọsẹ ra no. Rekọ u woma re whọ wezẹ abọ ra fo—te iporisi i kru owhẹ hayo oghẹrẹ oware kpobi nọ who ruthọ kẹhẹ.
Eware esa nọ whọ jẹ rọwo ethobọ ra
1. Keme oware nọ u fo eruo oye. Ebaibol o dhesẹ oghẹrẹ ahwo nọ u fo nọ ma rẹ jọ, ọ ta nọ: “Ru eware kpobi avọ oruọzewọ.”—Ahwo Hibru 13:18.
“Mẹ daoma gaga no re mẹ sae jọ ohwo oruọzewọ, jẹ daoma kpọ ethobọ mẹ vi. Mẹ te rọwo nọ oware na o thọ omẹ obọ ababọ ikẹ nọ me re si.”—Alexis.
2. Keme a re kpe ohwo kpe ivie-olẹ hẹ. Ebaibol na ọ ta nọ: “Ọnọ ọ kuọ oruthọ riẹ dhere ọ rẹ nyahọ aro ho, rekọ ọnọ ọ ta iruthọ riẹ via, nọ o je sioma no ai o re wo ohrọ-oriọ.”—Itẹ 28:13.
“O rẹ jọ bẹbẹ re ohwo ọ ta nọ me ruthọ, rekọ whọ tẹ be rọwo nọ who ruthọ ahwo a sai ro fievahọ owhẹ. A rẹ riẹ nọ whọ rẹ ta uzẹme. Whọ tẹ rọwo iruthọ ra, whọ rẹ sae rẹriẹ oware uyoma ruọ uwoma.”—Richard.
3. Oware nọ u je woma kpaobọ họ, o rẹ were Jihova. Ebaibol ọ ta nọ: “Ohwo nọ o re ru umuomu o re tu ỌNOWO na oma, rekọ o fievahọ enọ edhere rai okiẹrẹe.”—Itẹ 3:32.
“Nọ oware ulogbo jọ o thọ omẹ obọ no, mẹ tẹ ruẹ nọ mẹ rẹ tae via. Mẹ riẹ nọ Jihova ọ rẹ sae ghale omẹ hẹ otẹrọnọ me bi lele izi riẹ hẹ.”—Rachel.
Kọ ẹvẹ Karina o ru kpahe oware nọ o ruthọ na? Ọ jẹ gwọlọ ko obe nọ iporisi e kẹ riẹ na dhere ọsẹ riẹ. Rekọ ọ sae ko iẹe dhere bẹdẹ hẹ. “Epaọ ukpe ovo o vrẹ no,” Karina ọ ta nọ, “nọ ọsẹ mẹ ọ jẹ kiẹ ebe igho mai riwi, ọ tẹ ruẹ obe nọ iporisi a ro kru omẹ nọ odẹ mẹ o rrọ. Me bo nọ kọ ono o vi omẹ—makọ oni dede o je do ku omẹ fikinọ mẹ rọwo vuẹ ọsẹ mẹ hẹ!”
Oware nọ o wuhrẹ noi ze: Karina ọ ta nọ: “Whọ tẹ ko oware nọ who ruthọ dhere o mai yoma. Who re kpo owọ họ iẹe evaọ obaro ghele!”
Epanọ who re ro wuhrẹ no ethobọ ra ze
Ohwo nọ ọ gba re ọ riẹ hẹ. (Ahwo Rom 3:23; 1 Jọn 1:8) Wọhọ epanọ ma ruẹ no na, whọ tẹ ta via je ru ere ẹsiẹsiẹ, u dhesẹ nọ who wo areghẹ gbe omaurokpotọ.
Oware ofa họ, wuhrẹ no ethobọ ra ze. Rekọ u yoma kẹhẹ inọ izoge jọ a re wuhrẹ no oware ze he! O rẹ jọ rai oma wọhọ Priscilla nọ ọ ta nọ: “Ethobọ mẹ e jẹ lẹliẹ udu brukpe omẹ gaga. Mẹ jẹ hae roro nọ me fioka ha, o tẹ wọhọ ẹkpa isimeti nọ a wọ fihọ omẹ uzou. Mẹ jẹ hae jọ ọkọkora te epanọ me ro roro nọ omẹ u re no.”
Kọ o be hae jọ owhẹ oma ere ẹsejọ? O tẹ rọ ere, kareghẹhọ onana: Whọ gbẹ be kpairoro vrẹ eware nọ e thọ owhẹ obọ họ, o wọhọ ohwo nọ ọ be dhẹ omoto nọ ọ t’ovao rri ughẹgbe obemu. Whọ tẹ be hai roro kpahe ai ẹsikpobi, who ti gbe wo ẹgba nọ whọ te rọ whaha ethobọ họ, keme who ti rri omara nọ whẹ ohwo omuomu.
Ukpoye, daoma rri omara nọ whọ gba ha yọ whọ sai nwene.
“Roro kpahe oware nọ o wha ethobọ ze, re who wuhrẹ no ai ze. Rekọ who roro ai te epanọ e rẹ rọ wha uye ze he.”—Elliot.
“Me re rri ethobọ wọhọ oware nọ o rẹ kẹ ohwo areghẹ evaọ uzuazọ, me ve wuhrẹ oware jọ noi ze nọ o rẹ lẹliẹ omẹ jọ emamọ ohwo jẹ riẹ oware nọ me re ru ẹdẹfa nọ o tẹ via. Oware nọ u fo eruo oye keme u ti fiobọhọ kẹ owhẹ wo areghẹ ẹdẹfa.”—Vera.