Kọ Isẹri Jihova A rẹ Gba Ahwo Họ re A No Egagọ nọ A Rrọ?
Ijo, ma re ru ere he. Ma jọ emagazini Uwou-Eroro Na ta nọ: “Re a gba ahwo họ no egagọ rai o thọ.”a Fiki eware nọ ma be te ta kpahe na, ma rẹ gba ahwo họ họ:
Jesu ọ gba ahwo họ ẹdẹvo ho re a jẹ iwuhrẹ riẹ rehọ. Ọ riẹ nọ umutho ahwo jọ ọvo a ti ru lele iwuhrẹ riẹ. (Matiu 7:13, 14) Okenọ ilele riẹ jọ a zoruẹ fiki ẹme jọ nọ ọ ta, ọ whaha e rai hi nọ a jiroro nọ a re gbe lele iei hi.—Jọn 6:60-62, 66-68.
Jesu o wuhrẹ ilele riẹ re a gba ahwo họ hayo nwene eware nọ a rọwo ho. Ukpenọ a rẹ gba ahwo họ re a jẹ usi uwoma Uvie na rehọ, a rẹ daoma gwọlọ ahwo nọ a ginẹ gwọlọ gaviezọ.—Matiu 10:7, 11-14.
Nọ a tẹ gba ohwo họ kurẹriẹ, ekurẹriẹ yena o wiruo ho keme egagọ nọ o no ohwo eva ze Ọghẹnẹ ọ rẹ jẹrehọ.—Iziewariẹ 6:4, 5; Matiu 22:37, 38.
Kọ iruo nọ a re ro ku amọfa rẹriẹ no egagọ rai ma bi ru?
Ma be ginẹ ta usi uwoma “rite oria nọ o mai thabọ evaọ otọakpọ na,” yọ wọhọ epanọ Ebaibol na ọ ta, ma bi ru ere “evaọ ẹgbede je no uwou ruọ uwou.” (Iruẹru Ikọ 1:8; 10:42; 20:20) Yọ wọhọ epanọ a je ru Ileleikristi ikpe-udhusoi ọsosuọ na, ẹsejọ ahwo a rẹ bọwo omai ota inọ ma bi ku ahwo rẹriẹ evaọ edhere nọ o wọso uzi egọmeti. (Iruẹru Ikọ 18:12, 13) Rekọ ota gheghe a be bọwo omai. Ma rẹ gba ahwo họ họ re a rọwo eware nọ ma rọwo. Ukpoye, ma rẹ kẹ ohwo kpobi uvẹ re o wuhrẹ kpahe Ọghẹnẹ, kẹsena ọye ọvo ọ vẹ jiroro oware nọ o re ru.
Ma rẹ gba ahwo họ họ re a no egagọ nọ a rrọ, yọ ma re dhomahọ isuẹsu no ma vẹ rọ egagọ foma ha. Yọ ma rẹ kẹ ahwo eware hayo ru ai fe re a kurẹriẹ ziọ egagọ mai hi. Eware nana ahwo jọ nọ a se omarai Ileleikristi a bi ru, yọ a be rọ ere wha afuẹwẹ se odẹ Ọghẹnẹ.b
Kọ ohwo o wo udu nọ o re ro no egagọ riẹ kpohọ egagọ ọfa?
Abraham o no egagọ nọ imoni riẹ a jọ
Ee, keme Ebaibol na o dhesẹ nọ ahwo a wo udu nọ a sai ro no egagọ rai kpohọ egagọ ọfa. A gbiku ahwo buobu fihọ Ebaibol na nọ a no egagọ nọ imoni rai a jọ gbe enọ e jiroro nọ a rẹ gọ Ọghẹnẹ uzẹme na. Abraham, Rut, ahwo jọ evaọ obọ Athẹns, gbe Pọl ukọ na yọ umutho jọ evaọ usu ahwo nọ a ru ere. (Joshua 24:2; Rut 1:14-16; Iruẹru Ikọ 17:22, 30-34; Ahwo Galesha 1:14, 23) Ofariẹ, Ebaibol na o dhesẹ nọ ohwo kpobi o wo udu nọ ọ sae rọ jiroro nọ ọ be siọ Ọghẹnẹ ba ẹgọ, dede nọ onana o rrọ oware areghẹ hẹ.—1 Jọn 2:19.
A jọ obe na, Universal Declaration of Human Rights dhesẹ nọ ohwo o wo udu nọ ọ sai ro nwene egagọ riẹ, yọ ukoko United Nations o se obe nana “oria nọ a rehọ izi ufuoma iroro-ejẹ evaọ akpọ na soso no ze.” A jọ obe na ta nọ ohwo kpobi o wo “ufuoma nọ o re ro nwene egagọ riẹ hayo eware nọ ọ rọwo” jẹ “kiẹ, gwọlọ, jẹ rọwo nọ a wuhrẹ iẹe hayo wuhrẹ amọfa eware,” enọ i kugbe iwuhrẹ egagọ.c O make rrọ ere na, ohwo kpobi ọ rẹ rọ adhẹẹ kẹ amọfa keme a wo udu nọ a rẹ rọ rọwo eware nọ u je rai, hayo siọ eware nọ a rọwo ho.
Nọ ohwo o te no egagọ nọ ọ jọ kpohọ ọfa, kọ onana u dhesẹ nọ ọ be rọ adhẹẹ kẹ ahwo uviuwou riẹ hẹ?
Orọnikọ o rrọ ere he. Ebaibol na ọ ta nọ ma rọ adhẹẹ kẹ ahwo kpobi, makọ egagọ nọ a rrọ kẹhẹ. (1 Pita 2:17) Ofariẹ, Isẹri Jihova a re ru lele ujaje Ebaibol nọ o ta nọ ma rọ adhẹẹ kẹ esẹgbini mai, o tẹ make rọnọ a rrọ egagọ efa.—Ahwo Ẹfisọs 6:2, 3.
Ghele na, orọnikọ ohwo kpobi ọ rọwo oware nọ Ebaibol na ọ ta ha. Aye jọ nọ a yọrọ evao obọ Zambia ọ ta nọ: “Evaọ ẹwho nọ me no ze, nọ ohwo o te no egagọ riẹ, . . . a re rri rie wọhọ ohwo nọ ọ be romakpotọ họ, ọ tẹ jẹ rrọ ohwo nọ ọ wha omovuọ se ahwo uviuwou gbe ahwo ẹwho riẹ.” Oware nana o via kẹ aye na evaọ okenọ ọ jọ uzoge. Nọ Isẹri Jihova a je wuhrẹ Ebaibol na kugbei, ọ jiroro nọ o re no egagọ nọ ọ rrọ. Ọ ta nọ: “Ọsẹgboni mẹ a jẹ hae vuẹ omẹ ẹsikpobi nọ oware nọ me ru na o were rai vievie he, yọ mẹ be wha omovuọ se ai. Ẹme nana o kẹ omẹ uye gaga keme mẹ gwọlọ nọ oware kpobi nọ me bi ru o rẹ were ọsẹgboni mẹ. . . . Orọnikọ me bi si ọghọ no ahwo uviuwou mẹ oma ha fikinọ mẹ jiroro nọ mẹ be gọ Jihova viukpenọ me re ru lele uruemu egagọ ahwo uviuwou mẹ nọ u notọ ze.”d
a Rri uvitha Uwou-Eroro Na, ọrọ Ọvo 1, 2002, ẹwẹ-obe avọ 12, edhe-ẹme avọ 15.
b Wọhọ oriruo, oware wọhọ ukpe 785 C.E., ovie nọ a re se Charlemagne o fi uzi họ re a bruoziẹ uwhu kpe ahwo ẹwho Saxony fikinọ a rọwo nọ a rẹ họ-ame re a zihe ruọ Ileleikristi hi. Ofariẹ, evaọ ukpe 1555 C.E., itu sa-sa nọ i je fi ẹmo evaọ otọ esuo Holy Roman Empire a kere obe re a ru udhedhẹ kugbe ohwohwo, yọ a se obe na Peace of Augsburg. A jọ obe na ta nọ isu kpobi nọ e rrọ ẹkwotọ na a rẹ jọ egagọ Roman Catholic hayo Lutheran, yọ ohwo kpobi nọ ọ rrọ otọ esuo riẹ ọ rẹ jọ egagọ nọ osu ẹkwotọ na ọ rrọ re. Ohwo kpobi nọ ọ rọwo nọ ọ rẹ jọ egagọ nọ osu na ọ rrọ họ, o re no ẹkwotọ na.
c A jọ ebe ọtamuo nana ta nọ ohwo kpobi o wo udu otiọye na re; African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, ASEAN (Association of Southeast Asian Nations) Human Rights Declaration, European Convention on Human Rights, gbe International Covenant on Civil and Political Rights. Ghele na, makọ erẹwho nọ e ta nọ ohwo kpobi o wo udu nọ ọ rẹ rọ jiroro kẹ omariẹ, orọnikọ epọvo na aikpobi a bi ro ru lele uzi na ha.
d Ebaibol na o dhesẹ nọ Jihova họ odẹ Ọghẹnẹ.