Kọ A Rẹ Sae Se Ẹba Omọfa Nọ A Wọ Họ Unu Nọ Owezẹ?

Wọhọ epanọ U.S. Centers for Disease Control and Prevention o niyẹrẹ, enwenọ abọvo evaọ usu ahwo nọ a kiẹriwi nọ e rrọ ikpe 15 rite 19 a wọ ẹba omọfa họ unu no. “Nọ whọ tẹ nọ emọ ikpekpogbọ kpahe iẹe [ẹba omọfa nọ a rẹ wọ họ unu] a rẹ vuẹ owhẹ nọ yọ okpoware ovo ho,” ere Sharlene Azam ọ ta evaọ obe riẹ Oral Sex Is the New Goodnight Kiss. “Evaọ uzẹme, a be rehọ iẹe wọhọ owezẹ hẹ.”

• Ẹvẹ who roro?

• Imuẹro vẹ i dhesẹ ere?

• Fikieme u je muẹme?

Ẹvẹ who roro?

Salọ ee hayo ijo evaọ enọ nọ e rrọ obotọ na.

1. Kọ ẹba omọfa nọ a rẹ wọ họ unu o sae lẹliẹ ọmọtẹ dihọ?

   1. Ee

   2. Ijo

2. Kọ ẹba omọfa nọ a rẹ wọ họ unu o sae wha ẹyao họ ohwo oma?

   1. Ee

   2. Ijo

3. Kọ ẹba omọfa nọ a rẹ wọ họ unu ginọ yọ owezẹ ozae avọ aye?

   1. Ee

   2. Ijo

Imuẹro vẹ i dhesẹ ere?

Rehọ iyo ra wawo iyo nọ e rrọ obotọ na.

1. Kọ ẹba omọfa nọ a rẹ wọ họ unu o sae lẹliẹ ọmọtẹ dihọ?

   Uyo: Ijo. Oye o soriẹ ze nọ ahwo buobu a be rọ ta nọ—enwoma evuevo e rrọ ẹba omọfa nọ a rẹ wọ họ unu hu na.

2. Kọ ẹba omọfa nọ a rẹ wọ họ unu o sae wha ẹyao jọ họ ohwo oma?

   Uyo: Ee. Ohwo nọ ọ rẹ wọ ẹba amọfa họ unu ọ sae wo ẹyao-irue (hepatitis A or B), eware nọ i re mu ẹba ohwo, ugbere, ẹyao herpes, HIV, gbe ẹyao ọge (syphilis).

3. Kọ a rẹ sae se ẹba omọfa nọ a wọ họ unu nọ owezẹ?

   Uyo: Ee. Uruemu kpobi nọ a jẹ be rehọ ẹba omọfa zaharo—nọ a je bi du uvio, nọ a jẹ be wọ ẹba omọfa họ unu, nọ a je bi du uvinẹ hayo nọ a jẹ be rọ obọ whrawhra ẹba omọfa yọ owezẹ.

Fikieme u je muẹme?

Rri eria Ebaibol sa-sa nọ e ta kpahe ẹba nọ a rẹ wọ họ unu.

Ebaibol ọ ta nọ: “Onana họ oreva Ọghẹnẹ, inọ wha . . . siomano ọfariẹ-ogbe.”—1 Ahwo Tẹsalonika 4:3.

Otofa ẹme nọ a fa “ọfariẹ-ogbe” na họ oghẹrẹ uruemu owezẹ kpobi nọ imava nọ e rọo ho a bi ru, onọ a je bi du uvio, nọ a jẹ be wọ ẹba omọfa họ unu, nọ a je bi du uvinẹ hayo nọ a jẹ be rọ obọ whrawhra ẹba omọfa. Okpẹtu ulogbo o sae no iruemu nana ze, maero ohwo riẹ o re gbe wo emamọ usu kugbe Ọghẹnẹ hẹ.—1 Pita 3:12.

Ebaibol ọ ta nọ: “Ohwo kpobi nọ o bi gbe-ọfariẹ ọ be raha uzi wọso oma obọriẹ.”—1 Ahwo Kọrint 6:18.

Ẹba omọfa nọ a rẹ wọ họ unu o sae kpomahọ egagọ ohwo jẹ tubẹ wha ẹyao ze dede. O sae kpomahọ iroro ra re. “Uruemu nana o rẹ lẹliẹ ohwo roro nọ o fioka ha, hayo vioja, hayo lẹliẹ ohwo jọ ọkọkora,” ere obe na Talking Sex With Your Kids o ta. “Nwanọ epanọ ohwo ọ rẹ jọ ọkọkora nọ a tẹ gbae du na, ere ọvona o rẹ jọ re nọ ohwo o te bi ru iruemu owezẹ nọ i fo ho. Aikpobi a re se owezẹ.”

Ebaibol ọ ta nọ: “Mẹ họ [Jihova] Ọghẹnẹ ra, ọnọ o wuhrẹ owhẹ wo erere.”—Aizaya 48:17.

Kọ whọ rọwo nọ uzi nọ Ọghẹnẹ o jie kpahe owezẹ ọzae-avọ-aye o sae kẹ owhẹ erere? Hayo who bi roro nọ a rọ ifi gba owhẹ? Re whọ sae kẹ iyo enọ nana, roro kpahe edhere nọ a fi eka sa-sa họ re a gbẹ dhẹ uspidi ga hrọ họ, ohwo ọ vẹ jẹ sae riẹ okenọ ọ sae rọ dhẹ oria jọ vrẹ gbe okenọ u fo nọ ọ rẹ rọ hẹrẹ re imoto efa e dhẹ vrẹ tao. Kọ whọ be hae rri eka yena wọhọ eware nọ e be thọ owhẹ manikọ e be hae dha owhẹ eva? Eme ọ rẹ sae via otẹrọnọ whẹ avọ edraeva efa a la izi yena vrẹ?

Ere ọvona izi Ọghẹnẹ e rrọ re. Who gbe koko ai hi, riẹ nọ who ti vu oware nọ whọ kọ. (Ahwo Galesha 6:7) “Who te gbobọ nyẹ orọwọ ra nyai ru oware nọ whọ riẹ nọ o thọ, riẹ nọ who ti gbe fioka ha evaọ aro ra,” ere obe na Sex Smart o ta. Evaọ abọdekọ riẹ, who te lele izi Ọghẹnẹ, u dhesẹ nọ whọ gwọlọ ru oware nọ u woma. U te no ere no, udu u ti brukpe owhẹ vievie he.—1 Pita 3:16.