Kọ Isẹri Jihova A Fi Izi Họ Kpahe Usu Ọmọtẹ avọ Ọmọzae?

Isẹri Jihova a rọwo nọ ehrẹ gbe izi nọ e rrọ Ebaibol na e rẹ sai fiobọhọ kẹ omai jiroro nọ e rẹ were Ọghẹnẹ jẹ wha erere se omai. (Aizaya 48:17, 18) Orọnikọ obọ mai ehrẹ gbe izi nana i no ze he, rekọ ma re ru lele ai. Joma ta kpahe epanọ ehrẹ gbe izi nana i ro wobọ kugbe usu ọmọtẹ avọ ọmọzae.a

• Orọo o rẹ jọ bẹdẹ bẹdẹ. (Matiu 19:6) Fikinọ Isẹri Jihova a riẹ nọ usu-orọo u re su kpohọ orọo, a re rri rie jeve jeve he.

• Enọ e kpako te ahwo nọ a rẹ rọo no ọvo a rẹ nya usu-orọo. Ahwo yena a rẹ “vrẹ udhudhu ọmoha no,” koyehọ okenọ isiuru owezẹ ọzae-avọ-aye e rẹ rọ jọ gaga.​—1 Ahwo Kọrint 7:36.

• Enọ e rẹ nya usu-orọo a rẹ jọ ahwo nọ a wo ufuoma nọ a rẹ rọ rọo. Dede nọ ahwo jọ a rẹ fa orọo rai no evaọ obọ egọmeti, evaọ aro Ọghẹnẹ, a wo ufuoma nọ a rẹ rọ rọo ho. Ebaibol na ọ ta nọ ọfariẹ-ogbe ọvo họ oware nọ o rẹ fa orọo.​—Matiu 19:9.

• Ebaibol na o jie uzi kẹ Ileleikristi re a rọo ahwo nọ a gbẹ rrọ egagọ. (1 Ahwo Kọrint 7:39) Oghẹrẹ nọ Isẹri Jihova a rri uzi nana họ, orọnikọ o be ta kpahe ohwo nọ o wo adhẹẹ kẹ eware nọ Isẹri Jihova a rọwo ọvo ho, rekọ ohwo nọ ọ rọwo eware nọ Isẹri Jihova a rọwo je bi ru lele ai, yọ ọ họ-ame no evaọ ukoko Isẹri Jihova. (2 Ahwo Kọrint 6:14) No anwae ze, Ọghẹnẹ o jie uzi kẹ idibo riẹ re a rọo ahwo nọ a gbẹ rrọ egagọ evona. (Emuhọ 24:3; Malakae 2:11) Wọhọ epanọ ahwo nọ a re ru ekiakiẹ evaọ oke mai na a muẹrohọ no, uzi nana u woma gaga.b

• O roja re emọ a yoẹme kẹ esẹgbini rai. (Itẹ 1:8; Ahwo Kọlọsi 3:20) Uzi nana u dhesẹ nọ emọ nọ e gbẹ be rria kugbe esẹgbini rai a re ru lele izi nọ esẹgbini rai a fihọ kpahe usu ọmọtẹ avọ ọmọzae. Izi nana e sai kiekpahe unuikpe nọ emọ na a rẹ jọ taure a te ti mu usu ọmọtẹ avọ ọmọzae họ gbe eware nọ a rẹ sae kẹ ae uvẹ nọ a ru.

• Nọ ma te rri oware nọ Ikereakere na e ta, ma rẹ ruẹ nọ Osẹri Jihova ọ sae jiroro sọ ọ rẹ nya usu-orọo gbe ohwo nọ o re lele nya usu-orọo. Onana o rọwokugbe ehri-uzi Ebaibol nana: “Ohwo kpobi ọ te wọ ọvuọ owha-iruo nọ u te rie.” (Ahwo Galesha 6:5, ẹme-obotọ) O make rrọ ere na, nọ Isẹri Jihova buobu a tẹ be jiroro kpahe usu ọmọtẹ avọ ọmọzae, a rẹ nya bru Isẹri Jihova efa nọ i you rai je kruga ziezi kẹ ohrẹ.​—Itẹ 1:5.

• Eware buobu nọ ahwo nọ a be nya usu-orọo a re ru na yọ izieraha ilogbo. Wọhọ oriruo, Ebaibol na o jie uzi kẹ omai nọ ma whaha ọfariẹ-ogbe. Orọnikọ owezẹ ọzae-avọ-aye ọvo a rẹ whaha ha, rekọ te iruemu etọtọ efa nọ u fo nọ ahwo nọ a re rọo ho a rẹ whaha, wọhọ ẹba omọfa nọ a rẹ rọ abọ whrawhra, ẹba ọzae hayo aye nọ a rẹ rọ unu vi, gbe ẹba ọzae nọ a re dhehọ uvinẹ aye. (1 Ahwo Kọrint 6:9-11) Makọ iruemu nọ e rẹ kpare isiuru owezẹ ọzae-avọ-aye yọ “egbegbe” nọ Ọghẹnẹ o mukpahe. (Ahwo Galesha 5:19-21) Ebaibol na o te je mukpahe “eme etọtọ” nọ a re ro gbiku.​—Ahwo Kọlọsi 3:8.

• Udu na, koyehọ oghẹrẹ ohwo nọ ma rrọ evaọ obeva o vọ avọ ẹghẹ. (Jerimaya 17:9) Udu na o sae viẹ ohwo họ ru eware nọ ọ riẹ nọ e thọ. Nọ imava nọ e be nya usu-orọo a gbẹ gwọlọ nọ udu rai o rẹ viẹ ae họ họ, a rẹ whaha eria nọ i siomano nọ aimava ọvo a rẹ jọ. Re a whaha odawọ, a sae jiroro nọ a rẹ jọ oria nọ amọfa a rrọ ẹsikpobi hayo inọ ohwo jọ ọ rẹ hae jọ kugbe ae. (Itẹ 28:26) Izoge Ileleikristi nọ e be gwọlọ nọ a rẹ rọo a re muẹrohotọ jẹ riẹ nọ usu-orọo nọ a rẹ nya evaọ itanẹte o rrọ yoyoma. Oware jọ nọ u ro yoma na họ, ohwo ọ sae nya usu kugbe ohwo nọ ọ riẹ ziezi hi.​—Olezi 26:4.