Kọ Edhọ-Ifio Yọ Uzioraha?

Uyo nọ Ebaibol na ọ kẹ

Dede nọ Ebaibol ọ nwane ta gbiae he inọ edhọ-ifio e thọ, ehrẹ Ebaibol e rẹ sai fiobọhọ kẹ omai riẹ nọ Ọghẹnẹ o rri edhọ-ifio fihọ uzioraha.​—Ahwo Ẹfisọs 5:17.a

• Uvou-uthethei oye o rẹ wha edhọ-ifio ze, yọ Ọghẹnẹ o mukpahe uvou-uthethei. (1 Ahwo Kọrint 6:9, 10; Ahwo Ẹfisọs 5:3, 5) Ahwo nọ a re fi edhọ a re rẹro nọ edhọ-ifio na i ti kiekpe omọfa a ve wo ugho rai rehọ, rekọ Ebaibol na ọ ta nọ o thọ re ohwo o wo isiuru kpahe oware omọfa.​—Ọnyano 20:17; Ahwo Rom 7:7; 13:9, 10.

• O tẹ make rọnọ umutho ugho kakao dede a ro fi edhọ, o rẹ lẹliẹ ohwo mu uyoyou ugho họ ewo.​—1 Timoti 6:​9, 10.

• Enọ i re fi edhọ a rẹ rẹro so oghẹrẹ ogaga jọ. Whaọ, Ọghẹnẹ o rri iruemu itieye na fihọ ẹdhọgọ, oware nọ u re fou kẹle egagọ riẹ vievie he.​—Aizaya 65:11.

• Ebaibol ọ gwọlọ nọ ohwo kpobi o kru obọ ga evaọ iruo, orọnọ ọ rẹ keria re igho i kie no ehru ze he. (Ọtausiuwoma 2:24; Ahwo Ẹfisọs 4:28) Ahwo kpobi nọ i ru lele ohrẹ Ebaibol yena a rẹ sai wo “emu nọ a rọ obọ rai ru iruo kẹ.”​—2 Ahwo Tẹsalonika 3:10, 12.

• Edhọ-ifio e rẹ sae lẹliẹ ohwo wo uruemu omuhrowo, onọ Ọghẹnẹ o mukpahe.​—Ahwo Galesha 5:26.