Eme Ebaibol na Ọ Ta Kpahe Evẹrẹavẹrẹ?
Uyo nọ Ebaibol na ọ kẹ
“Evẹrẹavẹrẹ” yọ okẹ igbunu nọ Ileleikristi ikpe-udhusoi ọsosuọ jọ a wo nọ a jẹ rọ ta evẹrẹ efa dede nọ a wuhrẹ evẹrẹ na ha. (Iruẹru Ikọ 10:46, New International Version) Ahwo nọ a re yo ẹvẹrẹ nọ a jẹ ta na a je wo otoriẹ eme nọ a jẹ ta. (Iruẹru Ikọ 2:4-8) Evẹrẹavẹrẹ o jọ usu ekẹ nọ Ọghẹnẹ ọ rehọ ẹzi ọfuafo riẹ kẹ Ileleikristi ikpe-udhusoi ọsosuọ jọ.—Ahwo Hibru 2:4; 1 Ahwo Kọrint 12:4, 30.
Oria vẹ evẹrẹavẹrẹ e jọ muhọ, kọ okevẹ u ro muhọ?
Obọ Jerusalẹm oware igbunu nana o jọ kake via evaọ ohiohiẹ Pẹntikọst 33 C.E nọ a je ru Ehaa ahwo Ju. Nọ ikọ Jesu nọ i bu te oware wọhọ udhozeza (120) a kokohọ, “ẹzi ọfuafo ọ tẹ vọ aikpobi oma, a te mu evẹrẹ sa-sa họ ẹjẹ.” (Iruẹru Ikọ 1:15; 2:1-4) Ogbotu ahwo buobu nọ a kokohọ “a no erẹwho akpọ na kpobi ze,” yọ “omomọvo ọ be jọ unu ilele na yo ẹvẹrẹ riẹ.”—Iruẹru Ikọ 2:5, 6.
Ẹjiroro vẹ a jẹ rọ jẹ evẹrẹavẹrẹ na?
Re u dhesẹ nọ Ọghẹnẹ ọ jẹ tha Ileleikristi na uke. Evaọ oke nọ u kpemu, Ọghẹnẹ o ru eware igbunu ro dhesẹ nọ ọ jẹ tha idibo riẹ nọ i wo ẹrọwọ uke, wọhọ Mosis. (Ọnyano 4:1-9, 29-31; Ikelakele 17:10) Ẹjiroro ọvona a jẹ rọ jẹ evẹrẹavẹrẹ na, onọ o kẹ imuẹro inọ Ọghẹnẹ ọ be tha ukoko Ileleikristi nọ a tohọ obọ na uke. Pọl ukọ na o kere nọ: “Orọnikọ enọ e rọwo eye erọunu e rrọ oka kẹ hẹ rekọ enọ e rọwo ho.”—1 Ahwo Kọrint 14:22.
Re u fiobọhọ kẹ Ileleikristi ta usi uwoma na ziezi. Ahwo nọ a yo eme nọ ilele Jesu a jẹ ta evaọ ẹdẹ Pẹntikọst na a ta nọ: “Ma bi yo nọ a be rọ evẹrẹ mai ta kpahe iruo urirẹ Ọghẹnẹ.” (Iruẹru Ikọ 2:11) Fikiere, ẹjiroro ọfa nọ a jẹ rọ ta evẹrẹavẹrẹ na họ re u fiobọhọ kẹ Ileleikristi na “se isẹri ziezi” je “ru ahwo zihe ruọ ilele evaọ udevie ahwo erẹwho na kpobi,” wọhọ epanọ Jesu o jie uzi kẹ ae. (Iruẹru Ikọ 10:42; Matiu 28:19) Ahwo nọ a bu te oware wọhọ idu esa (3,000) nọ a ruẹ oware igbunu nọ o via na jẹ gaviezọ kẹ usi uwoma nọ a jẹ ta na, a te zihe ruọ ilele evaọ ẹdẹ yena.—Iruẹru Ikọ 2:41.
Kọ evẹrẹavẹrẹ nọ a jẹ jẹ na o te jọ bẹdẹ bẹdẹ?
Ijo. Ekẹ ẹzi ọfuafo na, onọ u kugbe evẹrẹavẹrẹ nọ a jẹ jẹ na yọ oware ubroke. Ebaibol na ọ ta nọ: “Rekọ otẹrọnọ ekẹ eruẹaruẹ e riẹ, a ti si ai no otọ; otẹrọnọ erọunu e riẹ, i ti serihọ; otẹrọnọ eriariẹ e riẹ, a ti si ai no otọ.”—1 Ahwo Kọrint 13:8.
Okevẹ evẹrẹavẹrẹ nọ a jẹ jẹ na u ro kuhọ?
Ẹzi ọfuafo na ọ jẹ hai te Ileleikristi efa obọ nọ ikọ na a tẹ rọ obọ kpahe ae. (Iruẹru Ikọ 8:18; 10:44-46) Rekọ o wọhọ nọ ahwo nọ ikọ na a rehọ ekẹ ẹzi ọfuafo na kẹ a rehọ e rai kẹ amọfa ha. (Iruẹru Ikọ 8:5-7, 14-17) Wọhọ oriruo, ahwo egọmeti a sae kẹ ohwo jọ elasisi nọ ọ rẹ rọ dhẹ omoto, rekọ a kẹ ohwo yena nọ a kẹ elasisi na udu nọ ọ rẹ rọ kẹ amọfa elasisi hi. O rrọ vevẹ nọ evẹrẹavẹrẹ nọ a jẹ jẹ na i kuhọ nọ ikọ na gbe ahwo kpobi nọ ikọ na a rehọ okẹ yena kẹ a whu no.
Kọ ẹvẹ kpahe evẹrẹavẹrẹ nọ a be jẹ nẹnẹ na?
U muẹro nọ okẹ evẹrẹavẹrẹ nọ a jẹ jẹ na u kuhọ evaọ obọ ekuhọ ikpe-udhusoi ọsosuọ na. Nẹnẹ na, ohwo ọvuọvo ọ sae ta nọ ogaga Ọghẹnẹ ọ be rọ jẹ evẹrẹavẹrẹ hẹ.a
Ẹvẹ a sai ro vuhu Ileleikristi uzẹme?
Jesu ọ ta nọ uyoyou họ oka nọ a re ro vuhu ilele riẹ. (Jọn 13:34, 35) Pọl ukọ na ọ tẹ jẹ ta nọ uyoyou họ oka nọ a re ro vuhu Ileleikristi uzẹme. (1 Ahwo Kọrint 13:1, 8) Pọl ọ ta nọ ẹzi Ọghẹnẹ o ti fiobọhọ kẹ Ileleikristi dhesẹ emamọ iruemu nọ a re se “ubi ẹzi na,” yọ uyoyou họ ọrọ ọsosuọ.—Ahwo Galesha 5:22, 23.
a Rri uzoẹme na “Kọ Obọ Ọghẹnẹ Evẹrẹavẹrẹ I No Ze?”