Ewẹ-Ebe nọ A Fihọ Otọ Ẹjini

Nọ Zarina ọ họ-ame no evaọ ukoko Isẹri Jihova, ọ tẹ kwa no Russia nọ ọ jẹ rria zihe ziọ Central Asia avọ emetẹ ivẹ riẹ, yọ ọ gba riẹ mu nọ o re wuhrẹ ae eware nọ ọ rọwo evaọ Ebaibol na. Fikinọ eware e jọ gaga kẹe, ọ tẹ jẹ rria ubruwou ọvona kugbe ọsẹgboni riẹ gbe oniọvo ọmọzae riẹ avọ aye riẹ. Ọsẹgboni riẹ a tẹ ta kẹe nọ o du wuhrẹ emọ riẹ Ebaibol na ha. A tẹ jẹ ta kẹ emetẹ riẹ nọ a du rọwo nọ oni rai o wuhrẹ ai Ebaibol na ha.

Zarina o te roro kpahe edhere nọ ọ sai ro fiobọhọ kẹ emọ riẹ wuhrẹ kpahe Jihova. (Itẹ 1:8) Fikiere o te horie eva riẹ kẹ Ọghẹnẹ evaọ olẹ re o fiobọhọ kẹe wo areghẹ jẹ kpọe. Zarina o te ru lele olẹ riẹ. Tei te emetẹ ivẹ riẹ a re kpohọ ore ẹsikpobi, yọ nọ a rrọ edhere na, o re gbiku kẹ ae kpahe epanọ emama Jihova i gbunu te. Onana u te ru nọ emetẹ riẹ a rọ gwọlọ nọ a re wuhrẹ kpahe Ọnọma na.

Ofariẹ, Zarina o te roro kpahe edhere nọ ọ sai ro wuhrẹ ai obe na, Eme Ebaibol na O Gine Wuhrẹ?a O re kere idhe-eme gbe enọ nọ e rrọ obe na fihọ ewẹ-ebe, je kere evuẹ efa kugbei re emetẹ riẹ a sai wo otoriẹ eware nọ e rrọ obe na ziezi. Kẹsena o ve fi ewẹ-ebe na avọ epẹsoro fihọ otọ ẹjini nọ a rẹ rọ fọrọ iwu evaọ oria nọ a rẹ jọ họ. Nọ emetẹ riẹ a te kpohọ oria nọ a rẹ jọ họ, a ve se eware nọ o kere na je kere iyo rai fihotọ.

Edhere nana Zarina o ro wuhrẹ emetẹ riẹ izou ivẹ soso evaọ obe na taure a tẹ te kwa no etẹe kpohọ oria ọfa. Evaọ oria nọ a kpohọ na, Zarina o wo ufuoma nọ o je ro wuhrẹ emọ riẹ Ebaibol na ababọ ukpokpoma. Emetẹ ivẹ riẹ a họ-ame evaọ amara Akpe 2016, yọ eva e were e rai gaga inọ oni rai ọ rọ areghẹ gwọlọ idhere sa-sa nọ o re ro wuhrẹ ai uzẹme na kpahe Ọghẹnẹ.