OBUFIHỌ RỌKẸ UVIUWOU
Epanọ Who re ro Fiobọhọ kẹ Ọmọ Ra nọ Ọ Riẹ Ru Hu
U kri kẹhẹ, u ti wo oware jọ nọ ọmọ ra ọ te jọ riẹ ru hu. Ẹvẹ whọ sai ro fiobọhọ kẹe nọ o tẹ via ere?
Oware nọ u fo nọ whọ rẹ riẹ
Ohwo kpobi ọ rẹ sai ru oware thọ ẹsejọ. Ebaibol ọ ta nọ “mai kpobi ma re zoruẹ.” (Jemis 3:2) Emaha na i re zoruẹ re. Rekọ nọ ohwo o te zoruẹ, emamọ oware jọ o sai noi ze. O sai fiobọhọ kẹ ọmaha riẹ oware nọ o re ru nọ eware e gbẹ riẹ nya kẹe he. A yẹ ohwo ọvo avọ areghẹ nọ a re ro ku ẹbẹbẹ họ họ, u fo nọ ọmọ kpobi o re wuhrẹ iẹe. Oni jọ nọ a re se Laura ọ ta nọ: “Mẹ avọ ọzae mẹ ma muẹrohọ nọ, nọ ọmọ ọ gbẹ riẹ oware jọ ru hu, o rẹ mai woma re who wuhrẹ ọmọ na oware nọ u fo nọ o re ru, ukpenọ who re ru wọhọ ẹsenọ ọmọ na o ru oware ovo thọ họ. Emaha e rẹ sai wuhrẹ oware nọ u fo nọ a re ru nọ eware e gbẹ riẹ nya ha.”
Emaha buobu a riẹ oware nọ a re ru hu nọ eware e gbẹ riẹ nya kẹ ae he. O rẹ jọ ere kẹ emọ jọ keme ọsẹgboni rai a rẹ thothọ rai gaga. Wọhọ oriruo, ọmọ o te feli ẹdawọ, esẹgbini jọ a rẹ ta nọ iticha rai ọ wha riẹ ze. Yọ emọ ivẹ e tẹ họre, esẹgbini jọ a rẹ ta nọ ọmọ ọdekọ na ọye ọ gwọlọ ẹme.
Kọ ẹvẹ ọmọ na ọ te rọ rọwo nọ o ru thọ, nọ ọsẹgboni a tẹ be thọe kẹse kẹse?
Oware nọ whọ rẹ sai ru
Wuhrẹ ọmọ ra nọ oware kpobi nọ o ru, o re kpowọ họ iẹe evaọ obaro.
Ebaibol na ọ ta nọ: “Oware kpobi nọ ohwo ọ be kọ, oye o ti vu re.”—Ahwo Galesha 6:7.
Oware kpobi nọ ohwo o ru, oware jọ u re noi ze. Ohwo ọ gbẹ riẹ oware ru hu, ẹbẹbẹ o re noi ze. U fo nọ emaha e rẹ riẹ onana re a sai roro kpahe abọ nọ a jọ riẹ ru hu nọ ẹbẹbẹ ọ tẹ romavia. Fikiere, nọ ọmọ ra ọ gbẹ riẹ ru hu, who gu ei fihọ omọfa uzou hu. Ukpoye, jọ ọmọ na ọ ruẹ umuye jọ nọ u no oware nọ o ru thọ na ze. Fiobọhọ kẹ ọmọ ra riẹ nọ oware nọ o ru thọ na oye o wha uye na sei na.
Fiobọhọ kẹ ọmọ ra riẹ oghẹrẹ nọ o re ro ku ẹbẹbẹ họ.
Ehri-uzi Ebaibol: “Ohwo okiẹrẹe ọ sai kie isiahrẹ, ọ vẹ wariẹ kpama.”—Itẹ 24:16.
O rẹ da gaga nọ ohwo ọ gbẹ riẹ oware ru hu, rekọ o nwani dhesẹ nọ u re kẹ ohwo na no ho. Fiobọhọ kẹ ọmọ ra riẹ oghẹrẹ nọ o re ro ku ẹbẹbẹ họ ukpenọ o re bruenu ọvo. Wọhọ oriruo, ọmọzae ra o te feli ẹdawọ evaọ obọ isukulu, ta kẹe nọ o te se obe ziezi, ọ te pase evaọ ẹdawọ ọfa. (Itẹ 20:4) Nọ ọmọtẹ ra avọ ogbẹnyusu riẹ a te wo ẹwhọ, fiobọhọ kẹe roro oware nọ ọ rẹ sai ru ro ku ẹwhọ na họ o tẹ make rọnọ ọye o ru thọ họ.—Ahwo Rom 12:18; 2 Timoti 2:24.
Wuhrẹ ọmọ ra nọ amọfa a rẹ sae daoma vi ei ẹsejọ.
Ehri-uzi Ebaibol: “Mẹ be ta kẹ owhai kpobi inọ ajọ ohwo ọvo o roro omariẹ kpehru vi epanọ u fo ho.”—Ahwo Rom 12:3.
U fo ho re whọ ta kẹ ọmọ ra nọ ohwo ọvo ọ sai mi ei aro ho, keme onana yọ uzẹme he. Yọ u re fiobọhọ kẹ ọmọ na ha. Makọ ọmọ nọ ọ riẹ obe ziezi evaọ isukulu dede, a re mi ei aro ẹsejọ. Yọ emọ nọ e riẹ arozaha jọ gaga evaọ isukulu, a rẹ jọ arozaha na kparobọ ẹsikpobi hi. Emọ i gbe rri omarai rro hrọ họ, o rẹ kẹ ae uye hrọ họ nọ eware e gbẹ nya oghẹrẹ nọ a roro ho.
Ebaibol ọ ta nọ eware egaga e sai ru ohwo ga ẹro je fiobọhọ kẹ ohwo wo ithihakọ. (Jemis 1:2-4) Fikiere, dede nọ o rẹ da ọmọ ra nọ eware e tẹ nyathọ, fiobọhọ kẹe riẹ nọ o rẹ sae jọ ere ẹsejọ.
Re a gine wuhrẹ emọ epanọ a rẹ rọ dadamu kẹ ebẹbẹ, o rrọ oware ẹdẹvo ho. Rekọ u ti fiobọhọ kẹ ae gaga, maero nọ a te te uzoge no. Obe jọ nọ o ta kpahe emọ eyọrọ nọ uzoẹme riẹ o rrọ Letting Go With Love and Confidence o ta nọ: “Izoge nọ i re fiududhe nọ ebẹbẹ i te te ai, a rẹ kaki ru oware nọ o rẹ wha uye ulogbo ofa ze he.” O ta re nọ: “Izoge itieye na a rẹ mai kru udu ga nọ eware nọ a rẹro rai hi e tẹ via.” Orọnọ oke uzoge ọvo onana u re jo fiobọhọ kẹ ae he, u re lele ai te ọkpako.
Oware jọ nọ u re fiobọhọ: Jọ emamọ oriruo. Kareghẹhọ nọ oware nọ whẹ omara who ru evaọ oke ẹbẹbẹ oye ọmọ ra ọ te rọ aro kele.