Ohọ-Oma Oghẹrẹ Igrepu jọ nọ A re Se Pomẹlo nọ Ọ rẹ Bẹre He

Pomẹlo yọ oghẹrẹ igrepu jọ nọ ọ rẹ jọ ruaro, yọ ame riẹ ọ rẹ mere. Ubi-ure na o tẹ maki kie no oria nọ u kpehru vi uwou ehru idhe ivẹ fihọ otọ dede, ọ rẹ bẹre he! Kọ eme o wha riẹ ze nọ ubi-ure nana ọ gbẹ rọ bẹre he na?

Roro kpahe onana: Nọ egba-eriariẹ a kiẹ ubi-ure na riwi, a tẹ ruẹ nọ ohọrọ ọfuafo nọ o rrọ eva ubi-ure na o wọhọ ifi nọ e jẹhọ ohwohwo, yọ imighogho esese e rrọ udevie rai. Nọ imighogho nana e be rro na, yọ ofou hayo amame u bi kokohọ eva rai. Okenọ ubi-ure na u te kie fihọ otọ, ame nọ ọ rrọ udevie imighogho na u ve ru nọ ohọ-oma pomẹlo na o rẹ rọ nẹ ruọ eva je ru ei gaga. Oyena u re ru ei nọ ọ gbẹ rọ bẹre he na.

Egba-eriariẹ a be dawo ifomu ayọno jọ nọ a rri oghẹrẹ nọ ohọ-oma pomẹlo na o rrọ ro ku. A ta nọ a sai rri oghẹrẹ nọ ohọ-oma ubi-ure na o rrọ na ro ru ehẹmẹte nọ ahwo nọ a rẹ dhẹ imotosaikoro a re kuhọ, eware nọ a re ru fihọ omoto re ọ seba ẹnwẹhẹ nọ a tẹ rehọ iẹe wo asidẹnte, gbe eware nọ a re ro ku oghẹrẹ arupre nọ a rẹ rra kpobọ ọvẹre na re nọ itho nọ e rrọ obehru na i te kpomahọ ae e gbẹ raha ha.

Ẹvẹ who roro? Kọ ohọ-oma oghẹrẹ igrepu nọ a re se pomẹlo nọ ọ rẹ bẹre he na, o hrerẹ ze? Manikọ ẹma a ma riẹ?