Uwou Arifẹ Ẹwọ jọ nọ A re Se Malleefowl

Arifẹ ẹwọ jọ nọ a re se malleefowl nọ a rẹ ruẹ evaọ ofẹ obọze ovatha-ọre Australia, o re ru oware jọ nọ u gbunu gaga. Arifẹ na ọ rẹ ruẹ nọ uwou riẹ o rẹ rọ idigri ivẹ hayo esa dhẹ vi ọgbagbene he (34°C), yọ o rẹ rọ idigri ivẹ hayo esa rrorro vi ọgbagbene he. Ẹvẹ arifẹ na ọ be sai ro ru uwou riẹ rrorro enẹ te aso te uvo, no emuhọ rite ekuhọ ukpe soso?

Evaọ ezi ekpahe, arifẹ na ọ rẹ tọ ọgọdọ nọ o diwi te imita ọvo, jẹ kẹre te imita esa, kẹsena ọrọ ọzae o ve koko ebe gbe imire vọ eva riẹ. Nọ oso ọ jẹ rrọ ziezi ku ebe gbe imire nọ o si vọ ọgọdọ na no, ọ vẹ tọ oria nọ o ti fi ike họ fihọ evaọ eva riẹ, kẹsena o ve nwo ẹkpẹ ruru ebe na kpobi. Ẹmẹrera na, ebe na i ve muhọ egbo no je ru nọ obeva ọgọdọ na ọ rẹ rọ rrorro.

Oke kpobi nọ ọrọ aye na ọ tẹ gwọlọ fi eke họ, ọrọ ọzae na o ve nwo ẹkpẹ na no re ọrọ aye na ọ sae fi eke na họ oria nọ a ruẹrẹhọ kẹ ike na. Kẹsena o ve nwo ẹkpẹ ruru eke na ababọ oke oraha. No Azie rite Ava, ọ sai fi ike nọ i bu te ọgbagbisoi họ.a

No oke te oke, ọrọ ọzae avọ ọrọ aye na a re dhe ugbunu rai họ ẹkpẹ na re a riẹ epanọ o dhẹ hayo rrorro te. Kẹsena a ve nwo ẹkpẹ fihọ iẹe hayo nwo ẹkpẹ noi wọhọ epanọ a gwọlọ nọ o rẹ rrorro te. Wọhọ oriruo:

• No amara Asa rite Asoi, nọ ebe nọ e rrọ ọgọdọ na i te muhọ egbo no, onana u re ru nọ ẹkpẹ na ọ rẹ rọ rrorro gaga. Re ẹkpẹ nọ ọ rrọ ọgọdọ na ọ sai dhẹ omojọ, ọrọ ọzae na o ve nwo ẹkpẹ jọ no ehru oria nọ ike na e rrọ no. Nọ ẹkpẹ na o je dhẹ no omojọ, o ve nwoi zihe.

• Evaọ ezi ivo, ọrọ ọzae na o re nwo ẹkpẹ ọfa fihọ ehru ẹkpẹ na re ẹrrorro uvo na u gbe te ike na ha. Rekọ kohiohiẹ kohiohiẹ evaọ irioke, o ve nwo ẹkpẹ nọ ọ rrọ ehru na no. Nọ uwou riẹ gbe ẹkpẹ nọ o nwo no na i je dhẹ no, ọ vẹ wariẹ nwo ẹkpẹ na zihe.

• No amara Azie rite Akpegbọvo nọ ebe na i te gbo re no, ọrọ ọzae na o ve nwo enwenọ ẹkpẹ na kpobi no, re ẹrrorro uvo na ọ sai te ike na gbe ẹkpẹ nọ o nwo na no. Uwhremu na, ọ vẹ wariẹ nwo ẹkpẹ nọ ọ rrorro na zihe re ẹrrorro ọ sae jọ uwou riẹ ziezi evaọ aso.

Kẹdẹ kẹdẹ, ọrọ ọzae na ọ rẹ rọ euwa nọ i bu vi euwa isoi ro nwo ẹkpẹ nọ ọ rẹ vọ oware wọhọ ekpa isimeti ikpegbisoi. Ẹkpẹ na nọ o bi dhe enwenwo na u re fiobọhọ evaọ abọ ọfa re. U re ru nọ ẹkpẹ na ọ rẹ rọ jọ lọlọhọ, yọ onana u re fiobọhọ kẹ emọ riẹ nọ e sa no re a sae tọ lafi no ẹkpẹ na ze.

Ẹvẹ who roro? Kọ oghẹrẹ nọ arifẹ nọ a re se malleefowl na o re ro ru uwou riẹ re ọ rrorro hayo dhẹ fihọ epanọ ọ gwọlọ na, u mu romavia? Manikọ ẹma a ma riẹ?