1 Ahwo Kọrint 10:13—“Ọghẹnẹ O re Ru Ẹme Riẹ Gba”

“Odawọ ọvuọvo u ri te owhai hi ajokpaọ onọ u bi te ahwo. Rekọ Ọghẹnẹ o re ru ẹme riẹ gba, yọ ọ rẹ kuvẹ hẹ re odawọ nọ wha rẹ sai thihakọ riẹ hẹ u te owhai, rekọ nọ odawọ u te te owhai ọ te gbẹ edhere kẹ owhai re wha sai thihakọ riẹ.”—1 Ahwo Kọrint 10:13, Efafa Akpọ Ọkpokpọ.

“Ẹdawọ ọvuọvo o re bru owhẹ tha ha, ajokpa oghẹrẹ nọ u bi te ahwo kpobi: rekọ Ọghẹnẹ avọ ọtẹruo, ọ nọ o re je ẹdawọ nọ ọ ro vi owhẹ o te owhẹ hẹ; rekọ ọ rẹ jọ eva ẹdawọ na ru epanọ owhẹ rẹ rọ va ae abọ, re whọ ruẹse sai thihi-akọ riẹ.”—1 Ahwo Kọrint 10:13, Ebaibol Ẹri Na.

Otofa Eme nọ E Rrọ 1 Ahwo Kọrint 10:13

Oria ikere nana o ta obọdẹ oware jọ kpahe Ọghẹnẹ nọ o rẹ lẹliẹ omai si kẹle iẹe, oye họ, o re ru ẹme riẹ gba. Idibo Ọghẹnẹ a sai fievahọ iẹe inọ o ti fiobọhọ kẹ ae evaọ etoke ebẹbẹ hayo nọ a tẹ rẹriẹ ovao ku edawọ.

“Odawọ ọvuọvo u ri te owhai hi ajokpaọ onọ u bi te ahwo.” Ẹsejọ, edawọ i re te idibo Ọghẹnẹ re a ru oware nọ o rẹ dhae eva. Dede nọ edawọ na e sae jọ gaga, orọnikọ idibo Ọghẹnẹ ọvo i bi te he, i te amọfa buobu no re. Fikiere idibo Ọghẹnẹ a riẹ nọ a rẹ sai thihakọ edawọ itieye na re.

“Ọghẹnẹ o re ru ẹme riẹ gba.” Ma rẹ sai fievahọ Jihovaa riẹriẹriẹ jẹ rẹroso iẹe. Jihova ọ ya eyaa nọ ọ te jọ kugbe ahwo nọ a you rie, enọ e be talamu ei gbe enọ i bi yoẹme kẹe. Yọ notọ avọ otọ ze, ọ be hai ru eyaa riẹ nana gba. (Iziewariẹ 7:9; Olezi 9:10; 37:28) Fikiere, ahwo nọ a be gọ Jihova a fievahọ iẹe inọ o ti ru eware ivẹ nọ ọ ya eyaa rai evaọ owọ ikere nana gba.

“Ọ rẹ kuvẹ hẹ re odawọ nọ wha rẹ sai thihakọ riẹ hẹ u te owhai.” Ọghẹnẹ ọ rẹ kuvẹ hẹ re odawọ nọ u bi te idibo riẹ o ga te epanọ a gbẹ sai ro thihakọ riẹ hẹ. Onana yọ edhere jọ nọ Ọghẹnẹ o re ro ru ẹme riẹ gba. Ọ riẹ eware nọ idibo riẹ omomọvo a rẹ sai thihakọ rai gbe enọ a rẹ sai thihakọ rai hi.—Olezi 94:14.

“Nọ odawọ u te te owhai ọ te gbẹ edhere kẹ owhai re wha sai thihakọ riẹ.” Ọghẹnẹ ọ rẹ sai si odawọ no hayo fiobọhọ kẹ idibo riẹ re a thihakọ riẹ. Wọhọ oriruo, ọ rẹ sae rehọ ẹzi riẹ kpọ idibo riẹ, rọ ẹme riẹ sasa ae oma, hayo rehọ idibo riẹ efa fiobọhọ kẹ enọ e be rẹriẹ ovao ku odawọ.—Jọn 14:26; 2 Ahwo Kọrint 1:3, 4; Ahwo Kọlọsi 4:11.

Eme nọ E Wariẹ 1 Ahwo Kọrint 10:13 Họ

Oria ikere nana o rrọ usu eware nọ Pọl ukọ na o kere se Ileleikristi nọ e jọ Kọrint. Evaọ ileta na, Pọl ọ ta kpahe eware nọ e via kẹ ahwo Izrẹl evaọ oke anwae, re Ileleikristi nọ e jọ Kọrint a riẹ eware nọ u fo nọ a re ru gbe eware nọ a rẹ yọroma kẹ. (1 Ahwo Kọrint 10:11) Pọl ọ fodẹ edawọ jọ nọ i te ahwo Izrẹl wọhọ, ẹdhọgọ gbe ọfariẹ-ogbe. (1 Ahwo Kọrint 10:6-10) Ahwo Izrẹl jọ a kie kẹ edawọ nana. Fiki eware nọ e via kẹ ahwo Izrẹl na, ọ ta kẹ Ileleikristi inọ a du fievahọ omobọ rai ga hrọ họ, bi roro nọ a sai kie kẹ edawọ họ. (1 Ahwo Kọrint 10:12) Ọ tẹ rehọ eme nọ e rrọ obe 1 Ahwo Kọrint 10:13 na tuduhọ ae awọ. Idibo Ọghẹnẹ a rẹ sai thihakọ odawọ kpobi nọ u te rai.

Rri ividio ọkpẹkpẹe nana re whọ ruẹ eware nọ e rrọ obe 1 Ahwo Kọrint.