Aizaya 26:3—“Enọ E Rehọ Eva Rai Kpahe Owhẹ, Whọ rẹ Yọrọ Ae Evaọ Udhedhẹ nọ Ogbunu”

“Whọ te sẹro enọ e rẹroso owhẹ riẹriẹriẹ; whọ te kẹ ae udhedhẹ nọ u wo oba ha, keme whẹ a fievahọ.”—Aizaya 26:3, Efafa Akpọ Ọkpokpọ.

“Enọ e rehọ eva rai kpahe owhẹ, whọ rẹ yọrọ ae evaọ udhedhẹ nọ ogbunu, keme a fievahọ owhẹ.”—Aizaya 26:3, Ebaibol Ẹri Na.

Otofa Eme nọ E Rrọ Aizaya 26:3

Aizaya ọ rọ eme nana dhesẹ nọ Ọghẹnẹ ọ rẹ sẹro enọ i fievahọ iẹe riẹriẹriẹ. Edhere jọ nọ o re ro ru onana họ, o re fiobọhọ kẹ ae wo ufuoma gbe udhedhẹ.

“Whọ te sẹro enọ e rẹroso owhẹ riẹriẹriẹ.” A jọ owọ ikere nana ta kpahe ahwo nọ a gba riẹ mu inọ a re fievahọ Jihovaa Ọghẹnẹ riẹriẹriẹ oke kpobi. Ahwo nọ a fievahọ Ọghẹnẹ a riẹ nọ u fo nọ ọye a rẹ dhẹ bru evaọ oware kpobi. Wọhọ oriruo, a tẹ be jiroro oware nọ u wuzou gaga, a rẹ rẹroso areghẹ obọrai hi. Ukpoye, a re roro kpahe oware nọ Ọghẹnẹ ọ ta evaọ oware kpobi nọ a gwọlọ ru. (Itẹ 3:5, 6) Re a riẹ oware nọ Ọghẹnẹ ọ ta kpahe oware jọ, a rẹ romatotọ se Ẹme riẹ Ebaibol na, a ve roro didi kpahe oware nọ a se na. (Olezi 1:2; 119:15) A tẹ rẹriẹ ovao ku ẹbẹbẹ jọ, a rẹ lẹ se Ọghẹnẹ re o fiobọhọ kẹ ae riẹ oware nọ a re ru. (Olezi 37:5; 55:22) A te ru enẹ, u re dhesẹ nọ a fievahọ Ọghẹnẹ, yọ Ọghẹnẹ ọ rẹ kẹ ae udhedhẹ.

“Whọ te kẹ ae udhedhẹ nọ u wo oba ha.” Ẹme Hibru nọ a fa “udhedhẹ” na, o romavia isiava. Onana u dhesẹ epanọ ẹme na o wuzou te. Re a sai fi ẹgba họ ẹme na, a sae fae “udhedhẹ nọ u wo oba ha,” hayo “udhedhẹ nọ ogbunu.” Otọ ẹme na họ, ahwo nọ a fievahọ Jihova riẹriẹriẹ a re wo udhedhẹ iroro. Udu u re te ae otọ makọ oghẹrẹ ebẹbẹ nọ i bi te ae kẹhẹ. (Olezi 112:7; 119:165) Re ohwo ọ sai wo udhedhẹ nana, o re wo usu okpekpe kugbe Ọghẹnẹ, jẹ daoma ru oware nọ u kiehọ eva aro riẹ.—Itẹ 3:32; Aizaya 48:18.

Nọ Ọghẹnẹ ọ tẹ make kẹ idibo riẹ “udhedhẹ nọ u wo oba ha,” orọnikọ onana u dhesẹ nọ ọ rẹ nwane thọ ae no ebẹbẹ hẹ, re a gbẹ ruawa kpahe oware ọvo ho. (1 Samuẹle 1:6, 7; Job 6:1, 2; Olezi 31:9) Ukpoye, o re fiobọhọ kẹ ae re a thihakọ ebẹbẹ rai. (Aizaya 41:10, 13) O re yo elẹ rai, ọ rẹ kẹ ae areghẹ, ogaga, gbe omosasọ. (Olezi 94:19; Itẹ 2:6; Aizaya 40:29) Fikiere makọ epanọ eware e ga te kẹhẹ, udu u re te ae otọ.—Ahwo Filipai 4:6, 7.

Eme nọ E Wariẹ Aizaya 26:3 Họ

Aizaya ọruẹaro na ọ rria evaọ oware wọhọ ikpe idu ivẹ gbe egba eree nọ i kpemu (2800). Ahwo buobu nọ a jẹ rria Juda oke yena gbe ikpe buobu nọ i lele rie, a jẹ rọ eva rai kpobi gọ Jihova ha. Fiki onana, Jihova ọ kuvẹ uwhremu na re a raha Jerusalẹm nọ ọ jọ okpẹwho esuo rai evaọ 607 B.C.E.

Rekọ taure a tẹ te raha Jerusalẹm, o vrẹ ikpe udhusoi. Oke yena Aizaya o ro kere ole nọ ọ rrọ uzou avọ 26 na ro jiri Jihova. (Aizaya 26:1-6) A jọ ole na dhesẹ okpẹwho jọ nọ ọ te jọ ẹkwotọ Juda evaọ obaro. Ẹsejọhọ okpẹwho na họ Jerusalẹm nọ a wariẹ bọ.

Nọ ahwo Ju a no igbo ze no evaọ 537 B.C.E., a wariẹ bọ ugbẹhẹ Jerusalẹm evaọ ikpe nọ i lele i rie. Evaọ oke yena, ahwo Ju nọ a zihe ze na a wo ufuoma, fikiere a sae ta nọ: “Ma wo okpẹwho ọgaga.” (Aizaya 26:1) Rekọ orọnọ ugbẹhẹ na họ oware nọ o ru nọ okpẹwho na ọ rọ jọ gaga ha. Ukpoye, okpẹwho na o wo ufuoma gbe omofọwẹ keme Ọghẹnẹ ọ be ghale ahwo riẹ jẹ sẹro rai.—Aizaya 26:2.

Epọvo na re nẹnẹ. Ahwo kpobi nọ a fievahọ Jihova riẹriẹriẹ a re wo ufuoma keme a rehọ Jihova wọhọ “Utho,” hayo oria adhẹzọ rai.—Aizaya 26:4.

Rri ividio ọkpẹkpẹe nana re whọ ruẹ eware nọ e rrọ obe Aizaya.