O Make Rọnọ Mẹ rẹ Vuoma na, Oghẹrẹ Uzuazọ Ọvo Nana Mẹ rẹ Salọ!

A yẹ omẹ evaọ 1934 evaọ Pescara, ẹwho nọ ọ kẹle Abade Adriatic evaọ Italy. Emetẹ enẹ oni mẹ o yẹ, mẹ họ ọrọ ọmaha kpobi. Edẹ nọ ọsẹ mẹ ọ kẹ omai e rọ kpahe ohwohwo, e rehọ ubiẹme “A” muhọ, oye jabọ nọ odẹ mẹ o rọ rehọ ubiẹme “D” muhọ na.

No otọ avọ otọ ze, o rẹ were ọsẹ mẹ gaga re o wuhrẹ kpahe Ọghẹnẹ. Ọ kake riẹ kpahe Isẹri Jihova evaọ Ahrẹ 1943 nọ ọzae jọ nọ a re se Liberato Ricci, ọnọ Isẹri na a je wuhrẹ obe kugbe ọ ta kẹe kpahe Ebaibol, ọ tẹ kẹe Uwou-Eroro Na. U kri hi, Ọsẹ mẹ o te muọ amọfa họ ẹtakẹ kpahe eware nọ o bi wuhrẹ. Oni mẹ o kurẹriẹ ziọ ukoko na re. Dede nọ ọ riẹ obe ese he, ọyomariẹ o te muọ amọfa họ ẹtakẹ kpahe ẹruore nọ o wo, ọ rẹ fodẹ eria Ebaibol nọ ọ riẹ fihọ uzou no kẹ ae.

Uwou osese mai u je zurie. Etẹe ma je jo ru iwuhrẹ ukoko. Yọ dede nọ ibrikpẹ ivẹ ọvo ma wo, uwou mai esẹro okogho gbe ekobaro a jẹ hai wohọ.

Inievo-emetẹ ivẹ mẹ erọ ekpako a wo isiuru kpahe Ebaibol ho, uwhremu na a tẹ kwa no uwou nyai wo ezae. Rekọ o jẹ hae were omẹ avọ Cesira oniọvo-ọmọtẹ mẹ re ma gaviezọ kẹ Ọsẹ mai nọ o te bi se Ebaibol. Yọ o jẹ were omai re ma gaviezọ kẹ obọdẹ evuẹ nọ inievo nọ e jẹ hai weze ziọ utu osese mai na a rẹ kẹ.

Mẹ jẹ hai lele ọsẹ mẹ avọ amọfa kpohọ usi uwoma, rekọ fikinọ mẹ rẹ vuoma gaga, o rehọ emerae buobu re me te ti wo udu ta usi uwoma. Ghele na, uyoyou mẹ kẹ Jihova u je dhe ẹgẹga, yọ mẹ họ-ame evaọ Ahrẹ 1950. Oniọvo jọ ọ kẹ ovuẹ ame-ọhọ na evaọ uwou mai, ma te kpobọ abade nyae họ-ame. Ukpe nọ u lele i rie, a vi ọzae-avọ-aye jọ nọ e rrọ ekobaro obọdẹ ziọ ẹwho mai, yọ mẹ jẹ hai lele ai kpohọ usi uwoma ẹsikpobi. Epanọ me kpohọ usi uwoma te, ere o jẹ lọhọ kẹ omẹ te. Usi uwoma ota o jẹ lẹliẹ eva were omẹ gaga.

Mẹ Jẹ Iroro nọ I Nwene Uzuazọ Mẹ

Ọsẹro okogho ọsosuọ mai họ Piero Gatti.a Ọ tuduhọ omẹ awọ inọ me ruiruo ọkobaro re mẹ jẹ kwa kpohọ oria nọ a jọ mae gwọlọ etausiuwoma, oware nọ me ri roro ẹdẹvo ho. Evaọ ẹwho mai, emetẹ e rẹ jọ uwou esẹgbini rai bẹsenọ a rẹ rọo. Fikiere evaọ Asa 1952, me te muọ iruo ọkobaro họ, yọ mẹ gbẹ jẹ rria uwou ọsẹgboni mẹ. Oke yena, mẹ riẹ epanọ iroro yena nọ mẹ jẹ na i ti nwene uzuazọ mẹ te he.

Enwenọ oke yena ọvona, oniọvo-ọmọtẹ jọ nọ a re Anna ọ jẹ gwọlọ mu iruo ọkobaro họ re. Ọ tẹ kwa ze ti lele omai rria re ma hai gbe kpohọ usi uwoma. Evaọ 1954, a tẹ rọ omai imava mu ekobaro obọdẹ je vi omai kpobọ Perugia, ẹwho na ọ rehọ enwenọ ikilomita egba ivẹ gbe udhuvẹ gbe ikpe (250) thabọ no ẹwho mai, yọ Osẹri Jihova ọvuọvo ọ rrọ oria na ha.

Onana yọ oware okpokpọ kẹ omai! Ikpe 20 ọvo mẹ jọ, yọ anwẹnọ a ro yẹ omẹ, erẹ nọ mẹ nya no họ okenọ me ro lele ọsẹgboni mẹ kpohọ okokohọ. O jọ omẹ oma nọ me bi kpohọ abọfa akpọ na. Ozọ u je mu ọsẹ mẹ fikinọ mẹ avọ Anna ọvo ma be te rria uwou, fikiere ọ tẹ nyaze re o fiobọhọ kẹ omai gwọlọ uwou. Ma haya ubruwou nọ ma sai jo ru ewuhrẹ re. Oke ọsosuọ, mai imava ọvo ma jẹ jọ iwuhrẹ na. Usi uwoma ota o jẹ were gaga evaọ Perugia avọ ewho gbe iwhre nọ e kẹle riẹ, ma te muọ ahwo nọ a gwọlọ wuhrẹ Ebaibol họ ẹruẹ. Nọ ukpe ọvo o vrẹ no, oniọvo-ọmọzae jọ ọ tẹ kwa ziọ Perugia, kọ ọye o je ru iwuhrẹ kẹ omai. Nọ a vi omai kpohọ ẹwho ọfa evaọ 1957, yọ ukoko osese jọ o rrọ ẹwho na no.

Ẹwho ọsese jọ nọ a re se Terni evaọ Italy a vi omai nya. O jẹ were omai gaga re ma ta usi uwoma evaọ Terni keme ahwo buobu nọ a gwọlọ wuhrẹ Ebaibol a rrọ ẹwho na. Rekọ ebẹbẹ jọ e jariẹ. Dede nọ esuo ọgbahọ u kuhọ evaọ 1943, ahwo jọ nọ a rrọ esuo a gbẹ jẹ daoma re a whaha usi uwoma ota Isẹri Jihova, inọ ma re mi obe udu re ma tẹ ta usi uwoma no uwou ruọ uwou.

Ipolisi a jẹ hae lẹlẹ lele omai. Ẹsejọ ma rẹ vae abọ nọ ma tẹ nya ruọ udevie ahwo, rekọ orọnikọ ẹsikpobi o rẹ via ere he. A mu omẹ isiava. Ọrọ ọsosuọ, mẹ avọ ọsẹro okogho ma gbẹ jọ usi uwoma. Ipolisi a mu omai jẹ rehọ omai kpobọ ogege ipolisi, a tẹ ta nọ uzi nọ ma thọ họ ma be ta usi uwoma ababọ obe udu, a te ho omai. Ma rọwo jẹ eho na ha keme ma raha uvumọ uzi hi. Udu u je bru omẹ kpikpikpi. Me yere Jihova gaga inọ mẹ ọvo mẹ jọ usu hu. Eme uduotahawọ nọ e rrọ Aizaya 41:13 e ziọ omẹ iroro inọ: “Jọ ozọ u mu owhẹ hẹ. Me ti fiobọhọ kẹ owhẹ.” A te siobọno omai, nọ a rehọ ẹme na kpohọ ekọto, oguẹdhọ na ọ tẹ kpare ẹdhọ na kufiẹ. Nọ oware wọhọ emerae ezeza e vrẹ no, a tẹ wariẹ mu omẹ. Mẹ ọvo mẹ jọ usu. Rekọ a wariẹ kpare ẹdhọ na kufiẹ.

Uvẹ Sa-Sa nọ Mẹ rọ Gọ Jihova

Mẹ kareghẹhọ nọ oma u je mu omẹ gaga kpahe okokohọ nọ a jọ Naples ru evaọ 1954, okpẹwho nọ ọ rrọ ofẹ obọze ovatha-ọre Italy. Nọ ma te obei, mẹ tẹ fialoma via inọ me re ru oria nọ a ti jo ru okokohọ na fo, yọ oria nọ a kẹ omẹ nọ me ru fo ọ kẹle eplatfọmo na. Mẹ tẹ ruẹ oniọvo-ọmọzae jọ nọ o wo erru gaga, odẹ riẹ Antonio Caparelli, ọkobaro nọ o no Libya ze. Tei te ahwo uviuwou riẹ a kwa no Italy kpobọ Libya evaọ ubrobọ ekuhọ ikpe 1930.

Antonio ọ goma ziezi yọ o wo udu. Ọ jẹ hae rọ imotosaikoro riẹ dhẹ thethabọ kpohọ udhude Libya re ọ nyae ta usi uwoma kẹ ahwo Italy nọ e jẹ rria obei. Ma jẹ hai kere ileta se ohwohwo ẹsejọ. Rekọ evaọ 1959, o te zihe ziọ Italy. Ọ jọ Ebẹtẹle evaọ Rom emerae jọ, a te vi ei kpobọ ẹwho Viterbo evaọ Italy nyai ru iruo ọkobaro obọdẹ. Usu mai o tẹ te kpekpe, ma tẹ rọo evaọ Azie 29, 1959. Mẹ tẹ kwa bru Antonio evaọ Viterbo.

Ma gwọlọ oria nọ ma rẹ rria gbe oria nọ ma re jo ru iwuhrẹ. Ma tẹ haya ubruwou nọ ọ wọhọ istọ nọ ọ rrọ otọ uwou-ehru jọ, o wo oria nọ a rẹ jọ họ gbe oria nọ a re jo ku-ame evaọ obemu. Ma fi ehwa mai họ ubiozọ jọ jẹ rehọ ekọtini bru rie dhe. Obei o jọ ukpẹ na. Ofẹ nọ o kiọkọ o jọ otọ-uwou, yọ o tẹ rrọ ẹdẹ ewuhrẹ o vẹ jọ Ọgwa Uvie. Uwou na ọ nwani kiehọ họ, mẹ ọvo mẹ hae rria etẹe he. Rekọ eva e were omẹ keme mẹ avọ Antonio ọzae mẹ ma rrọ kugbe.

Evaọ 1961, a tẹ rọ Antonio mu ọsẹro okogho. Rekọ a kaki zizie iei kpohọ isukulu nọ a rẹ jọ wuhrẹ ekpako ukoko, yọ amara soso ọ jọ obei. Koyehọ evaọ amara soso, mẹ ọvo mẹ te jọ uwou. O lọhọ kẹ omẹ vievie he, maero evaọ owọwọ nọ mẹ ọvo mẹ rẹ jọ ubruwou osese mai na. Rekọ eva e were omẹ inọ Jihova ọ be rehọ Antonio ru iruo riẹ. Me je ru eware sa-sa, fikiere oke na o dhẹ vẹrẹ gaga.

Evaọ iruo ọsẹro okogho, ma re dhe ẹkwẹkwa. Ma jẹ hai no Veneto nọ ọ rrọ ofẹ ẹkpẹlobọ ovatha-ọre Italy kpohọ Sicily nọ ọ rrọ obọze ovatha-ọre. Oke ọsosuọ ma wo omoto ho, fikiere imoto ofa ma jẹ rro. Ẹdẹ jọ, nọ ma ruọ omoto nọ ọ dhẹ idhere iyoyoma iwhre Sicily no, ma tẹ ruẹ inievo nọ e nyaze ti dede omai, a wha eketekete lele oma nọ a te wọ ewha mai fihọ. Antonio o ku ikotu avọ ota họ, yọ me ku emamọ ewu mẹ jọ họ. Nọ ahwo a ruẹ omai nọ ma be nya lele inievo nọ e rrọ ewhẹrẹ avọ eketekete nọ ọ wọ ewha mai, o sae jọnọ ehwẹ ọvo a jẹ hwẹ.

Inievo na a jẹ ghale umutho eware nọ a wo kugbe omai. Iwou jọ i wo ame epọmpo ho hayo oria nọ a rẹ jọ họ họ. Ubruwou nọ ma wohọ ẹdẹ jọ, ohwo ọvo ọ re rriae he evaọ ikpe buobu. Evaọ aso, mẹ thuẹ te epanọ Antonio ọ rọ rọwo omẹ. Nọ ma kpare ehọ nọ a rọ hwa ifomu na, emerae nọ ma ruẹ a rẹ sai kele ai hi. U wo oware ovo nọ ma re ru hu evaọ udevie aso na. Ma frẹ enọ ma rẹ sae frẹ no, ma tẹ wariẹ kiẹzẹ.

Rekọ orọnikọ eware nana e mae jọ ẹbẹbẹ mẹ hẹ. Oware nọ o jẹ mae kẹ omẹ uye họ omovuọ. Nọ ma te te ukoko nọ ma ri te ẹdẹvo ho, o jọ bẹbẹ kẹ omẹ re me mu egbẹnyusu ekpokpọ. Rekọ mẹ ginẹ gwọlọ fiobọhọ kẹ inievo-emetẹ na jẹ tuduhọ ae awọ, fikiere mẹ tẹ jẹ daoma gaga. Avọ obufihọ Jihova, taure oka na o te ti re, udu mẹ o jẹ hai totọ. Ọghọ ologbo o ginẹ jọ nọ ma rọ jọ kugbe inievo na jẹ ruẹ epanọ a re ru ọghọ te, ẹrọwọ rai, gbe uyoyou rai kẹ Jihova.

Evaọ 1977, nọ ma rehọ umutho ikpe jọ ru iruo ọsẹro okogho avọ ubrotọ no,b a te zizie omai kpohọ Ebẹtẹle evaọ Rom re ma fiobọhọ ruẹrẹ eware họ kẹ Okokohọ Akpọ-Soso ọrọ 1978 nọ uzoẹme riẹ o rrọ “Victorious Faith” (Ẹrọwọ nọ Ọ Kparobọ). Nọ emerae jọ e vrẹ no, a tẹ vuẹ omai nọ ma jọ Ebẹtẹle ru iruo. U kri hi, a tẹ rrọ Antonio mu omọvo Ogbẹgwae Uwou Ogha.

O rehọ oke re uzuazọ Ebẹtẹle o tẹ reria omẹ oma, yọ omovuọ mẹ o jẹ hae lẹliẹ omẹ sioma rehọ. Rekọ Jihova o fiobọhọ kẹ omẹ, inievo na a te je fiobọhọ kẹ omẹ re, ẹmẹrera na mẹ tẹ te rehọ Ebẹtẹle fihọ uwou mẹ.

Ma Rẹriẹ Ovao Dhe Ebẹbẹ Ekpokpọ

Nọ ikpe jọ e vrẹ no, ma tẹ rẹriẹ ovao ku ẹbẹbẹ ọkpokpọ, ọye họ ẹbẹbẹ ẹyao. Evaọ 1984, Antonio o ru obẹrọ ubiudu, yọ oware wọhọ ikpe ikpe e vrẹ no, oghẹrẹ eyao efa i te je ki ei. Evaọ 1999, o te wo oghẹrẹ ẹyao ọta jọ. No otọ avọ otọ ze, ọzae mẹ yọ ohwo nọ ọ goma ziezi, rekọ ọ sai fi ẹyao oyoma nana kparobọ họ. O jẹ da omẹ gaga nọ mẹ jẹ ruẹ epanọ ẹyao na ọ be rọ ẹmẹrera guọghọ iẹe oma fihọ otọ. Mẹ jẹ lẹ gaga se Jihova, inọ ọ kẹ omẹ ẹgba nọ mẹ rẹ rọ rẹrote ọzae oyoyou mẹ na. Ofariẹ, mẹ jẹ hai se obe Ilezi ẹsikpobi. Enana e jẹ sasa omẹ oma nọ mẹ tẹ be ruawa. Antonio o whu evaọ Asa 18, 1999. Enwenọ ikpe 40 ma jọ orọo.

A rẹ sai gbiku ọkora nọ uwhu riẹ o wha se omẹ hẹ. Inievo uviuwou Ebẹtẹle gbe inievo nọ ma riẹ evaọ okenọ ma je ru iruo ọsẹro okogho na, a sasa omẹ oma gaga je dhesẹ uyoyou kẹ omẹ evaọ idhere sa-sa. O make rrọ ere na, ọkora nọ o jọ omẹ udu, maero evaọ owọwọ nọ mẹ tẹ rueva ubrukpẹ mẹ no evaọ Ebẹtẹle, a re gbiku riẹ hẹ. Olẹ gbe uwuhrẹ omobọ mẹ i fiobọhọ kẹ omẹ nọ oke o be nyaharo na. Uwhremu na, oma o jẹ were omẹ nọ me roro kpahe uzuazọ nọ mẹ avọ Antonio ma yeri kugbe no. O gbẹ be were omẹ re me roro kpahe eware nọ ma je ru kugbe, yọ me wo imuẹro inọ Antonio ọ rrọ ekareghẹhọ Jihova gbe inọ mẹ te wariẹ ruẹ e riẹ nọ a tẹ kpare iẹe ze no.

Mẹ jọ eria sa-sa ru iruo no evaọ Ebẹtẹle, obọnana oria nọ a re jo ko eware me bi jo ru iruo. O be were omẹ gaga inọ me bi ru iruo nọ e be wha erere se inievo Ebẹtẹle nọ e wọhọ uviuwou mẹ na. Mẹ be jẹ daoma wo obọ ziezi evaọ usi uwoma ota. Mẹ be sai ru te epanọ me je ru vẹre he, rekọ usi uwoma ota o gbẹ be were omẹ, yọ anwọ okenọ mẹ rọ jọ ọmọtẹ ze iruo nana e rọ were omẹ. Oyejabọ nọ mẹ rẹ rọ tuduhọ izoge na awọ inọ a ru iruo ọkobaro na. Mẹ riẹ epanọ iruo na e rẹ kẹ evawere te.

Nọ me te roro kpahe enwenọ ikpe 70 nọ me ro ru iruo odibọgba oke-kpobi no, mẹ ruẹ epanọ Jihova o ro fiobọhọ kẹ omẹ jẹ ghale omẹ no. Mẹ gbẹ be vuoma, fikiere mẹ riẹ nọ orọnọ ẹgba obọmẹ me ro ru eware nọ me ru no na ha. Me kpohọ eria sa-sa no, mẹ rọ ẹro ruẹ eware buobu no, yọ mẹ nyaku ahwo nọ a wuhrẹ omẹ eware buobu no re. Avro ọ riẹ hẹ, mẹ rẹ ta nọ a tẹ kẹ omẹ uvẹ, uzuazọ ọvona mẹ rẹ wariẹ salọ.