Ẹme-Obotọ

e A riẹ Xerxes I nnọ o re muofu ọkpoo. Ogbiku Griki jọ nọ a re se Herodotus o kere kpahe emo nọ Xerxes o lele orẹwho Grisi fi. Xerxes ovie na o juzi nọ jọ a dhe ekọ họ uhie ro ru akwa nya ehru ame nọ ọ rrọ Hellespont vrẹ. Rekọ nọ okpofou jọ ọ raha akwa na, Xerxes o te juzi nọ jọ a bru uzou ahwo nọ a ru akwa na no, ọ tẹ jẹ ta kẹ ahwo riẹ re a kẹ ame na uye ẹkwoma ẹfa nọ a rẹ fa ame na yọ a be la ame na eka. Evaọ okenọ o je lele ahwo Grisi fi ẹmo na, nọ ọzae jọ nọ o fe gaga ọ lẹ ovie na nọ o vi ọmọ riẹ kpohọ ẹmo ho, Xerxes ọ tẹ ta nọ jọ a bru ọmọ na ibro ivẹ re o jọ unuovẹvẹ kẹ ahwo na kpobi.