Ẹvẹ Mẹ Sae rọ Jọ Osẹri Jihova?
Jesu o dhesẹ eware nọ ohwo o re ru re ọ sae jọ Osẹri Jihova evaọ obe Matiu 28:19, 20. A jọ oria ikere nana fodẹ eware nọ ohwo o re ru re ọ sae jọ olele Jesu, koyehọ re ohwo o se isẹri kpahe Jihova.
Oware 1: Wuhrẹ Ebaibol na. Jesu o jie uzi kẹ ilele riẹ nọ: “Wha ru ahwo zihe ruọ ilele . . . , wha wuhrẹ ae.” (Matiu 28:19, 20) Otofa ẹme nọ a fa “olele” na họ, “ohwo nọ a bi wuhrẹ.” Ebaibol na, maero kọ iwuhrẹ Jesu nọ e rrọ eva riẹ e rẹ sai fiobọhọ kẹ owhẹ wo evawere je yeri emamọ uzuazọ. (2 Timoti 3:16, 17) O te were omai re ma fiobọhọ kẹ owhẹ wuhrẹ Ebaibol na ọvọvẹ re whọ riẹ oware nọ Ebaibol na o gine wuhrẹ.—Matiu 10:7, 8; 1 Ahwo Tẹsalonika 2:13.
Oware avọ 2: Ru lele eware nọ who bi wuhrẹ. Jesu ọ ta nọ ahwo nọ a bi wuhrẹ Ebaibol na a re “ru eware kpobi nọ [o] jie uzi rai.” (Matiu 28:20) Onana u dhesẹ nọ orọnikọ who bi wuhrẹ Ebaibol na re who wo eriariẹ vọ uzou ọvo ho, ukpoye o gwọlọ nọ who re ru inwene evaọ uzuazọ ra je nwene uruemu ra gbe eware nọ who bi roro kpahe. (Iruẹru Ikọ 10:42; Ahwo Ẹfisọs 4:22-29; Ahwo Hibru 10:24, 25) Ahwo kpobi nọ a bi koko ujaje Jesu na a rẹ rọ aro kele iei rọ uzuazọ rai mudhe kẹ Jihova, yọ ae ọvo a rẹ jiroro na.—Matiu 16:24.
Oware avọ 3: Họ-ame. (Matiu 28:19) Evaọ Ebaibol na, a rọ ame-ọhọ wawo epanọ a re ki ohwo. (Rri Ahwo Rom 6:2-4.) O wọhọ ẹsenọ ohwo o whu no keme ọ nyasiọ uzuazọ anwae riẹ ba no, o te bi mu uzuazọ ọkpokpọ họ. Ame-ọhọ ra o re dhesẹ via kẹ ahwo kpobi evaọ ẹgbede inọ who ru eware ivẹ nọ Jesu ọ fodẹ na no, yọ whọ be yare Ọghẹnẹ re ọ kẹ owhẹ obruoziẹ-iroro ọfuafo.—Ahwo Hibru 9:14; 1 Pita 3:21.
Ẹvẹ mẹ sae rọ riẹ sọ mẹ ruẹrẹ oma kpahe kẹ ame-ọhọ no?
Nyabru ekpako ukoko na re whọ ta kẹ ae. A ti lele owhẹ ta ẹme re u mu ai ẹro inọ who wo otoriẹ oware nọ who gwọlọ ru na, who bi ru lele eware nọ who bi wuhrẹ, yọ whọ rọ uzuazọ ra mudhe kẹ Ọghẹnẹ no.—Iruẹru Ikọ 20:28; 1 Pita 5:1-3.
Kọ emọ Isẹri Jihova a re ru eware nana re?
Ee. Ma rẹ rọ “ọwhọkuo gbe ehrẹ Jihova” yọrọ emọ mai wọhọ epanọ Ebaibol na ọ ta. (Ahwo Ẹfisọs 6:4) Rekọ nọ a be kpako na, ae ọvo a rẹ jiroro kẹ omarai sọ a gwọlọ wuhrẹ, jẹ eware nọ a bi wuhrẹ na rehọ, je ru lele oware nọ Ebaibol na o wuhrẹ taure a tẹ te họ-ame. (Ahwo Rom 12:2) Rekọ oware nọ o mai wuzou họ, ohwo kpobi ọ rẹ jiroro kẹ omariẹ kpahe egagọ nọ ọ rẹ jọ.—Ahwo Rom 14:12; Ahwo Galesha 6:5.