Kọ U Fo re Mẹ Lẹ Se Erezi?

Uyo nọ Ebaibol na ọ kẹ

Ijo. Ebaibol na ọ ta nọ Ọghẹnẹ ọvo ma rẹ lẹ se, yọ odẹ Jesu ma rẹ rọ lẹ. Jesu ọ ta kẹ ilele riẹ nọ: “Wha lẹ epa onana: Ọsẹ mai nọ ọ rọ obọ odhiwu, odẹ ra ojọ ọrẹri.” (Matiu 6:9, Ebaibol Ẹri Na) O wuhrẹ ilele riẹ vievie nọ a lẹ se erezi, ikọ-odhiwu hayo omọfa jọ họ, ajokpaọ Ọghẹnẹ ọvo.

Jesu ọ tẹ jẹ ta kẹ ilele riẹ nọ: “Mẹ họ edhere na gbe uzẹme na gbe uzuazọ na. Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.” (Jọn 14:6) Yọ Jesu ọvo Ọghẹnẹ ọ kẹ udu nọ ọ rẹ rọ lẹ Ọghẹnẹ fiki mai.—Ahwo Hibru 7:25.

Kọ o thọ re mẹ lẹ se Ọghẹnẹ, mẹ vẹ jẹ lẹ se erezi?

Ọghẹnẹ ọ jọ evaọ Izi Ikpe na ta nọ: “Mẹ họ ỌNOWO na Ọghẹnẹ ra mẹ Ọghẹnẹ ọre-ihri.” (Ọnyano 20:5, Ebaibol Ẹri Na) Oghẹrẹ vẹ Ọghẹnẹ ọ rọ rrọ “ọre-ihri”? Ẹme-obotọ Ọnyano 20:5 evaọ Ebaibol New American Bible ọ ta nọ, ọ “gwọlọ nọ ọye ọvo a rẹ romakẹ riẹriẹriẹ.” Ọghẹnẹ ọ gwọlọ nọ ọye ọvo a rẹ go, yọ onana u kugbe olẹ, ọye ọvo a rẹ lẹ se.—Aizaya 48:11.

Ma tẹ be lẹ se omọfa jọ kpobi, makọ erezi hayo ikọ-odhiwu, yọ ma bi ru Ọghẹnẹ eva dha. Okenọ Jọn ukọ na ọ jẹ gwọlọ gọ ukọ-odhiwu jọ, ukọ-odhiwu na ọ whaha e riẹ, ọ ta kẹe nọ: “Whọ jọdẹ riẹ vievie he, keme mẹ avọ owhẹ ibẹ odibo ọvo na, jegbe imoni ra enọ i wo isẹri Jesu. Gọ Ọghẹnẹ.”—Eviavia 19:10, Ebaibol Ẹri Na.