Kọ whọ jẹ gwọlọ se Ebaibol na ẹdẹjọ rekọ whọ tẹ seba fikinọ who wo ọkpọ iroro ahwo nọ ma fodẹ evaọ obehru na? Rọkẹ ahwo buobu, re a se Ebaibol na o wọhọ owha ogbẹgbẹdẹ. Kọ ẹvẹ otẹrọnọ whọ riẹ nọ Ebaibol na ọ sai fiobọhọ kẹ owhẹ wo evawere je yeri emamọ uzuazọ? Kọ ẹvẹ otẹrọnọ whọ riẹ kpahe idhere jọ nọ whọ sai ro se Ebaibol na o vẹ were owhẹ ese? Kọ o te were owhẹ re who se Ebaibol na jẹ riẹ oware nọ o rrọ eva riẹ?

Se kpahe eme nọ ahwo jọ a ta nọ a ruẹ irere nọ i te rai evaọ okenọ a mu Ebaibol na họ ese.

Ọmọzae jọ nọ a re se Ezekiel nọ ọ rrọ ikpe 20 gbọ ọ ta nọ: “Evaọ oke ọsosuọ, mẹ wọhọ ohwo nọ ọ be dhẹ omoto nọ ọ riẹ obọno ọ be dhẹ nya ha. Rekọ Ebaibol na nọ me bi se, u bi fiobọhọ kẹ omẹ yeri emamọ uzuazọ. U wo emamọ ehrẹ nọ i bi fiobọhọ kẹ omẹ kẹdẹ kẹdẹ.”

Ọmọtẹ jọ nọ a re se Frieda nọ ọ rrọ ikpe 20 gbọ ọ ta re nọ: “Mẹ jẹ hai mu ofu ọgaga vẹre. Rekọ fiki Ebaibol na nọ me bi se, me wuhrẹ epanọ mẹ rẹ rọ kpọ ofu mẹ no. Onana u ru nọ ahwo buobu a bi ro si kẹle omẹ, fikiere me wo egbẹnyusu buobu no enẹna.”

Aye jọ nọ a re se Eunice nọ ọ rrọ ikpe 50 gbọ ọ ta kpahe Ebaibol na nọ: “Ebaibol na nọ me bi se u bi fiobọhọ kẹ omẹ zihe ruọ emamọ ohwo, je ru omẹ nwene ekpehre iruemu nọ me wo.”

Wọhọ epanọ ahwo nọ ma fodẹ gbe ima ahwo buobu efa nọ a bi se Ebaibol na a ta, who te bi se Ebaibol na u re fiobọhọ kẹ owhẹ yeri uzuazọ evawere. (Aizaya 48:​17, 18) U te no ere no, who te bi se Ebaibol na u re fiobọhọ kẹ owhẹ (1) jẹ emamọ iroro, (2) wo emamọ egbẹnyusu, (3) thihakọ ebẹbẹ uzuazọ, yọ (4) maero na, u re fiobọhọ kẹ owhẹ wuhrẹ uzẹme na kpahe Ọghẹnẹ. Obọ Ọghẹnẹ ehrẹ Ebaibol na i no ze, fikiere u re kiekpe owhẹ hẹ nọ who te bi ru lele ehrẹ Ebaibol na. Ọghẹnẹ ọ rẹ kẹ ekpehre ehrẹ hẹ.

Oware nọ o mai wuzou họ epanọ whọ sai ro mu Ebaibol na họ ese. Eware jọ vẹ e rẹ sai fiobọhọ kẹ owhẹ mu Ebaibol na họ ese jẹ reawere riẹ ziezi?

Eware jọ vẹ e rẹ sai fiobọhọ kẹ owhẹ mu Ebaibol na họ ese jẹ reawere riẹ ziezi? Muẹrohọ eware isoi jọ nọ i fiobọhọ kẹ ahwo buobu no.

Jọ oria nọ u fo oma se Ebaibol na. Gwọlọ oria nọ edo ọ rrọ họ. Whaha eware nọ e rẹ sai reghe iroro ra no oware nọ who bi se na. Nọ whọ tẹ rrọ oria nọ omofou ọ rrọ jẹ be rehọ emamọ ukpẹ se Ebaibol na, u re fiobọhọ kẹ owhẹ reawere isase riẹ ziezi.

Ruẹrẹ udu ra họ. Nọ orọnọ obọ Ọsẹ obọ odhiwu mai Ebaibol na o no ze na, who ti wo erere gaga no isase riẹ ze otẹrọnọ who wo ọkpọ uruemu ọmọboba nọ ọ rẹ romakpotọ wuhrẹ mi ọsẹgboni riẹ. Otẹrọnọ who wo ekpehre iroro jọ hayo avro kpahe Ebaibol na, daoma si ai no udu re Ọghẹnẹ ọ sai wuhrẹ owhẹ.​—Olezi 25:4.

Lẹ taure who te muhọ ese. Ebaibol na yọ Ẹme Ọghẹnẹ, fikiere ma gwọlọ obufihọ Ọghẹnẹ re ma sai wo otoriẹ riẹ. Ọghẹnẹ ọ ya eyaa nọ ọ te rehọ “ẹzi ọfuafo kẹ enọ e be yare iẹe.” (Luk 11:13) Ẹzi ọfuafo Ọghẹnẹ ọ rẹ sai fiobọhọ kẹ owhẹ riẹ oghẹrẹ nọ Ọghẹnẹ o re roro. Nọ oke o be nyaharo na, ẹzi ọfuafo na o ti rovie iroro ra re who wo otoriẹ “eware ididi Ọghẹnẹ.”​—1 Ahwo Kọrint 2:10.

Daoma wo otoriẹ oware nọ who bi se na. Orọnọ unu ewẹ-ebe nọ who se họ ẹme na ha. Rekọ daoma roro didi kpahe oware nọ wo bi se na. Nọ omara enọ nana: ‘Emamọ iruemu vẹ me muẹrohọ evaọ oma ohwo nọ me bi se kpahe na? Ẹvẹ mẹ sai ro fi oware nọ me se na họ iruo evaọ uzuazọ?’

Fi itee họ kẹ omara. Re whọ sai wo erere no isase Ebaibol ra ze, ru ei họ utee ra inọ who re wuhrẹ oware jọ nọ u re fiobọhọ kẹ owhẹ evaọ uzuazọ ra. Whọ sai fi itee nana họ kẹ omara, wọhọ: ‘Mẹ gwọlọ gbe wuhrẹ kpahe oghẹrẹ ohwo nọ Ọghẹnẹ ọ ginẹ rrọ.’ ‘Mẹ gwọlọ jọ emamọ ohwo, emamọ ọzae hayo emamọ aye uwou-orọo.’ Kẹsena whọ vẹ salọ eria Ebaibol nọ e rẹ sai fiobọhọ kẹ owhẹ le itee ra na tobọ.a

Eware isoi nana nọ ma ta kpahe na, i ti fiobọhọ kẹ owhẹ riẹ epanọ whọ sai ro mu Ebaibol na họ ese. Rekọ ẹvẹ whọ gbẹ sae rọ reawere isase Ebaibol ra vi epaọ ọsosuọ? Uzẹme nọ u lele onana o te kuyo onọ oyena.

Ẹvẹ isase Ebaibol e rrọ owhẹ oma? Kọ whọ be reawere riẹ manikọ u re fou owhẹ eho? Oghẹrẹ nọ who bi ro se Ebaibol na o sae wha onana ze. Joma ta kpahe eware jọ nọ whọ rẹ sai ru nọ e rẹ lẹliẹ isase Ebaibol ra siuru, whọ vẹ jẹ reawere riẹ.

Salọ Ebaibol ọgbọna jọ nọ eme riẹ e rrọ lọlọhọ. Whọ tẹ be rehọ Ebaibol nọ eme riẹ e rrọ gaga hayo ọnọ eme riẹ jọ i kiekpo no ru isase Ebaibol ra, o sae whae ze nọ whọ gbẹ rọ reawere isase Ebaibol ra ha. Fikiere salọ Ebaibol nọ eme riẹ e rrọ lọlọhọ nọ ọ rẹ sai duobọte owhẹ udu. Ghele na, ọ rẹ jọ Ebaibol nọ a romatotọ fa gbagba.a

Rehọ ifonu hayo ekọmputa ro se Ebaibol na. Nẹnẹ orọnikọ Ebaibol nọ a printi ọvo whọ rẹ ruẹ hẹ, rekọ whọ rẹ sae ruẹ Ebaibol na re evaọ ifonu gbe ekọmputa. Whọ rẹ sae jọ itanẹte se Ebaibol jọ, hayo danlodu riẹ fihọ ekọmputa, etablẹte, hayo ifonu ra. Efafa Ebaibol jọ i wo eware nọ e rẹ sai fiobọhọ kẹ owhẹ rehọ efafa Ebaibol efa wawọ ohwohwo nọ who te bi se kpahe oware jọ. Otẹrọnọ whọ gwọlọ gaviezọ kẹ isase Ebaibol nọ a se dovia, whọ sae ruẹ e riẹ re evaọ itanẹte. O rẹ were ahwo buobu re a gaviezọ kẹ Ebaibol nọ a se dovia nọ a tẹ rrọ omoto, nọ a tẹ be fọrọ eware, hayo nọ a te bi ru eware efa. Kọ whọ gbẹ dawo edhere nọ o kiehọ owhẹ oma re?

Kiẹ ebe nọ a kere no Ebaibol na ze riwi. Ebe nọ a kere no Ebaibol na ze e rẹ sai fiobọhọ kẹ owhẹ reawere isase Ebaibol ra. Whọ rẹ jọ ebe itieye na jọ ruẹ emapo nọ i bi dhesẹ eria sa-sa nọ a ta ẹme te evaọ Ebaibol na, onọ u re fiobọhọ kẹ owhẹ gwọlọ eria nọ who se ku evaọ isase Ebaibol ra lọlọhọ, o vẹ lẹliẹ oware na vẹ owhẹ ẹro ziezi. Izoẹme jọ wọhọ enọ e rrọ emagazini nana hayo enọ e rrọ oria nọ a re se “Iwuhrẹ Ebaibol” evaọ oria itanẹte jw.org/iso mai na, e rẹ sai fiobọhọ kẹ owhẹ wo otoriẹ abọ sa-sa Ebaibol na lọlọhọ.

Hae nwene oghẹrẹ nọ who bi ro se Ebaibol na. Otẹrọnọ o rrọ bẹbẹ kẹ owhẹ re who se Ebaibol na n’oka duoka, kọ u gbe woma re whọ kaki se abọ nọ ọ mae were owhẹ? Whọ tẹ gwọlọ riẹ kpahe ahwo nọ a viodẹ evaọ Ebaibol na, whọ sai se kpahe omomọvo rai evaọ isase Ebaibol ra. Whọ sae ruẹ oriruo epanọ whọ sai ro ru oyena evaọ ẹkpẹti nọ o lele uzoẹme nana “Romatotọ Kiẹ Ebaibol na re Whọ Riẹ Ahwo nọ A Ta Ẹme te Evaọ Eva Riẹ.” Hayo o sae jọnọ whọ gwọlọ se kpahe iku Ebaibol na unọjọ utọjọ, hayo oghẹrẹ nọ eware e rrọ via nya lele ohwohwo. Kọ whọ gbẹ dawo edhere jọ evaọ usu enana?

Ebaibol na yọ obe gheghe he. Ehrẹ nọ i no obọ Ọghẹnẹ ze eye e rrọ eva riẹ. (2 Timoti 3:16) Evuẹ Ebaibol na e rẹ sai fiobọhọ kẹ omai nwene uzuazọ mai. Ebaibol na ọ tubẹ ta nọ: “Ẹme Ọghẹnẹ ọ rrọ uzuazọ o te je wo ẹgba.” (Ahwo Hibru 4:12) Ebaibol na o wo ẹgba nọ o re ro fiobọhọ kẹ omai evaọ obọdẹ idhere ivẹ. Orọ ọsosuọ, Ebaibol na ọ rẹ kẹ omai ekpọvio evaọ uzuazọ ikẹdẹ kẹdẹ mai; yọ orọ avivẹ, u re fiobọhọ kẹ omai riẹ oghẹrẹ ohwo nọ Ọghẹnẹ ọ rrọ gbe eyaa riẹ.​—1 Timoti 4:8; Jemis 4:8.

Ebaibol na ọ sai fiobọhọ kẹ owhẹ yeri emamọ uzuazọ enẹna. Ebaibol na ọ sai fiobọhọ kẹ owhẹ evaọ ẹme nọ o kie kpahe omobọra. O kẹ ehrẹ kpahe eware ma be te fodẹ na.

• Oghẹrẹ nọ ma re yerikugbe amọfa. ​—Ahwo Ẹfisọs 4:​31, 32; 5:​22, 25, 28, 33.

• Oghẹrẹ nọ ma rẹ kpọ ofu mai, gbe oghẹrẹ nọ ma sae rọ rẹrote ugboma mai nọ ma tẹ be mọ. ​—Olezi 37:8; Itẹ 17:22.

• Oghẹrẹ nọ uruemu mai u fo nọ o rẹ jọ. ​—1 Ahwo Kọrint 6:​9, 10.

• Oghẹrẹ nọ ma rẹ raha ugho.​—Itẹ 10:4; 28:19; Ahwo Ẹfisọs 4:28.a

Nọ ọzae-avọ-aye jọ evaọ obọ Asia a fi ehrẹ Ebaibol na họ iruo, u fiobọhọ kẹ ae gaga. Wọhọ epanọ o rẹ jọ kẹ ahwo nọ a rọo obọ na, o jọ bẹbẹ kẹ ae re a rria dhedhẹ kugbe ohwohwo, jẹ sai lele ohwohwo ta ẹme ziezi. Rekọ a te mu eware nọ a je wuhrẹ evaọ Ebaibol na họ efihọ iruo. Kọ eme o no onana ze? Ọzae na nọ odẹ riẹ o rrọ Vicent ọ ta nọ: “Eware nọ me se no Ebaibol na ze i fiobọhọ kẹ omẹ fi isabọ sa-sa nọ mẹ rẹriẹ ovao dhe evaọ orọo mai kparobọ evaọ edhere oyoyou. Ehrẹ Ebaibol na nọ ma bi ru lele, e be lẹliẹ omai wo evawere evaọ orọo mai.” Aye riẹ nọ a re se Annalou ọ rọwokugbe ẹme ọzae riẹ na, keme ọ ta nọ: “Iriruo amọfa nọ ma se kpahe evaọ Ebaibol na i fiobọhọ kẹ omai gaga. Enẹna me bi wo evawere gbe edẹro evaọ orọo mai, yọ ma be nyate utee nọ ma fihọ kẹ omamai.”

Ebaibol na ọ sai fiobọhọ kẹ owhẹ riẹ oghẹrẹ ohwo nọ Ọghẹnẹ ọ rrọ. U te no eme nọ Vicent ọ ta kpahe orọo rai na no, ọ ta re nọ: “Isase Ebaibol na i fiobọhọ kẹ omẹ si kẹle Jihova vi epaọ ọsosuọ.” Oware nọ Vicent o muẹrohọ na u wuzou gaga, koyehọ Ebaibol na ọ sai fiobọhọ kẹ omai riẹ oghẹrẹ ohwo nọ Ọghẹnẹ ọ rrọ. Who te bi se Ebaibol na, orọnikọ ehrẹ nọ e rrọ eva riẹ ọvo who re wo erere no ze he, rekọ Ebaibol na ọ sai fiobọhọ kẹ owhẹ wo usu okpekpe kugbe Ọghẹnẹ. Yọ whọ te ruẹ nọ Ọghẹnẹ ọ ta kpahe oghẹrẹ nọ uzuazọ o te jọ evaọ obaro, koyehọ oke nọ ma te rọ reawere “uvi uzuazọ” nọ o te jọ bẹdẹ bẹdẹ. (1 Timoti 6:19) Onana yọ oware nọ ma rẹ sae jọ ebe efa ruẹ vievie he.

Nọ whọ tẹ ruẹrẹ oke họ bi se Ebaibol na jẹ ruabọhọ ere oruo, irere nọ ma fodẹ na i ti te owhẹ re, koyehọ Ebaibol na o ti fiobọhọ kẹ owhẹ yeri emamọ uzuazọ enẹna, je fiobọhọ kẹ owhẹ riẹ oghẹrẹ ohwo nọ Ọghẹnẹ ọ rrọ. Rekọ nọ who bi se Ebaibol na, ẹsejọhọ enọ buobu e te ziọ owhẹ iroro. Nọ o tẹ via ere, kareghẹhọ emamọ oriruo ọwharọ obọ Ẹtiopia nọ ọ rria anwọ ikpe idu ivẹ (2,000) nọ i kpemu no. O wo enọ buobu kpahe Ebaibol na. Nọ a nọe sọ o wo otoriẹ oware nọ o bi se na, ọ ta nọ: “Kọ ẹvẹ mẹ sae rọ riẹ otọ rai ajokpanọ ohwo jọ o fiobọhọ kẹ omẹ?”b Ọ tẹ rọwo nọ ohwo jọ nọ ọ riẹ Ebaibol na ziezi o fiobọhọ kẹe wo otoriẹ oware nọ o bi se na. Yọ ohwo nọ o fiobọhọ kẹe na họ Filip, ọnọ ọ jọ olele Jesu evaọ ikpe udhusoi ọsosuọ. (Iruẹru Ikọ 8:​30, 31, 34) Ere ọvona re, whọ tẹ gwọlọ gbẹ riẹ kpahe Ebaibol na, ma be tuduhọ owhẹ awọ nọ who vi ayare ra ziọ oria Itanẹte mai nọ a re se www.jw.org/iso, hayo kere kpohọ adrẹse nọ ọ kẹle owhẹ evaọ usu enọ ma fodẹ evaọ emagazini nana. Yọ whọ sae ta kẹ Isẹri Jihova nọ e kẹle owhẹ, hayo whọ sai kpohọ Ọgwa Uvie rai nọ ọ rrọ ẹwho ra. Kọ who gbe mu Ebaibol ra họ ese nẹnẹ re u fiobọhọ kẹ owhẹ yeri emamọ uzuazọ?