Kọ Isẹri Jihova A rẹ Wha Ohẹriẹ Fihọ Iviuwou Manikọ A rẹ Bọ Ae Ga?

Mai Isẹri Jihova ma rẹ daoma gaga re ma bọ iviuwou mai gbe erọ erivẹ mai ga. Ma riẹ nọ Ọghẹnẹ họ ọnọ ọ to uviuwou họ. (Emuhọ 2:21-24; Ahwo Ẹfisọs 3:14, 15) Ọ jọ Ebaibol na kẹ omai ehrẹ buobu nọ i fiobọhọ kẹ ahwo evaọ akpọ na soso bọ orọo rai ga no je bi wo evawere.

Epanọ Isẹri Jihova A bi ro Fiobọhọ kẹ Iviuwou Wo Okugbe

Ma rẹ daoma ru lele ehrẹ Ebaibol keme i re fiobọhọ kẹ omai jọ emamọ ezae uwou-orọo, eyae uwou-orọo gbe esẹgbini. (Itẹ 31:10-31; Ahwo Ẹfisọs 5:22–6:4; 1 Timoti 5:8) Ehrẹ nọ e rrọ Ebaibol na i re fiobọhọ kẹ makọ ahwo uviuwou nọ a rrọ ọvuọ egagọ riẹ wo evawere. (1 Pita 3:1, 2) Eme nọ e rrọ obotọ na yọ eme nọ ahwo nọ a rrọ Isẹri Jihova ha a ta, enọ ọzae hayo aye rai o zihe ruọ Osẹri Jihova:

• “Evaọ ikpe ezeza ọsosuọ nọ ma rọ ruọ orọo, ẹwhẹwhọ ọvo ma jẹ hae whọ. Rekọ nọ aye mẹ, Ivete o zihe ruọ Osẹri Jihova no, ọ tẹ jẹ hai dhesẹ uyoyou je wo odiri vi epaọ anwẹdẹ. Inwene nọ aye mẹ o ru i fiobọhọ kẹ orọo mai gaga.”​—Clauir, evaọ obọ Brazil.

• “Okenọ Isẹri Jihova a mu Ebaibol na họ ewuhrẹ kugbe Chansa, ọzae mẹ, mẹ jẹ whaha iẹe keme me je roro nọ Isẹri Jihova a rẹ hẹriẹ iviuwou. Rekọ no anwọ oke yena ze, me muẹrohọ nọ Ebaibol na o fiobọhọ kẹ orọo mai gaga no.”​—Agness, evaọ obọ Zambia.

Nọ ma tẹ rrọ usi uwoma, ma rẹ vuẹ ahwo kpahe epanọ ehrẹ Ebaibol nọ a re ru lele i re ro fiobọhọ kẹ ai ru eware nana

• Salọ emamọ ọzae hayo aye

• Wo evawere evaọ ukpe ọsosuọ nọ a rọ ruọ orọo

• Rria dhedhẹ kugbe egọ gbe inierọo

• Raha ugho avọ areghẹ

• Whaha ẹwhọ

• Rọvrẹ ohwohwo

• Wuhrẹ emọ rai

Kọ ohwo o te kurẹriẹ, o rẹ wha ozighi fihọ orọo riẹ?

Uzẹme riẹ họ, ẹsejọ o rẹ wha ozighi ze. Wọhọ oriruo, iyẹrẹ nọ ekọmpene jọ nọ a re se Sofres ọ nẹ evaọ ukpe 1998, u dhesẹ nọ evaọ usu erọo nọ i bu te 20 nọ omọvo jọ ọ jẹ rrọ Osẹri Jihova, ọvo evaọ usu rai o wo ebẹbẹ gaga okenọ ọjọ o ro kurẹriẹ ruọ Osẹri Jihova.

Jesu ọ ta riẹ no vẹre inọ ahwo nọ a ru lele iwuhrẹ riẹ a te rẹriẹ ovao dhe ọwọsuọ evaọ obọ ahwo uviuwou rai ẹsejọ. (Matiu 10:32-36) Ogbiku jọ nọ a re se Will Durant ọ ta nọ evaọ otọ esuo ahwo Rom, “a je rri Ileleikristi wọhọ ahwo nọ a rẹ wha ohẹriẹ fihọ uviuwou,”a yọ ere a bi rri Isẹri Jihova jọ nẹnẹ. Kọ onana u dhesẹ nọ Isẹri Jihova a be ginẹ wha ohẹriẹ fihọ iviuwou rai?

Okenọ okọto European Court of Human Rights o jẹ ta ẹme kpahe ota nọ a be bọwo Isẹri Jihova inọ a be wha ohẹriẹ fihọ iviuwou, o ta nọ enọ e rrọ Isẹri Jihova ha na ae a rẹ wha ozighi na ze. A re “dhesẹ adhẹẹ kẹ ufuoma nọ ahwo uviuwou rai nọ a rrọ Isẹri Jihova a wo ho, onọ a sai ro ru iruẹru egagọ rai.” Okọto na o ta re nọ: “Oware nana o rẹ via gaga evaọ iviuwou nọ ahwo a jẹ rrọ ọvuọ egagọ riẹ, yọ ere o rẹ via kẹ Isẹri Jihova re.”b Makọ okenọ ahwo uviuwou Isẹri Jihova a tẹ be wọso ae, a rẹ daoma ru lele ohrẹ Ebaibol nana inọ: “Wha rọ eyoma hwosa eyoma kẹ ohwo ọvo ho. . . . O tẹ lọhọ, nọ orọnọ obọ rai o rrọ na, wha lele ahwo kpobi rria dhedhẹ.”​—Ahwo Rom 12:17, 18.

Oware nọ o wha riẹ ze nọ Isẹri Jihova a rọ rọwo nọ egagọ rai na ọvo a rẹ jọ rọo

Isẹri Jihova a bi ru lele ohrẹ Ebaibol nọ o ta nọ a rẹ rọo “evaọ Olori na ọvo,” koyehọ a rẹ rọo ohwo nọ a gbẹ rrọ egagọ ọvona. (1 Ahwo Kọrint 7:39) Ohrẹ nana u woma gaga, u te je no Ebaibol ze. Wọhọ oriruo, evaọ ukpe 2010, obe awhusi jọ nọ a re se Journal of Marriage and Family o ta nọ “ezae-avọ-eyae nọ a rrọ egagọ ọvona, nọ a re ru iruẹru egagọ ọvona, jẹ rọwo eware evona” a rẹ mae kpekpe ohwohwo oma evaọ orọo rai.c

O make rrọ ere na, Isẹri Jihova a rẹ ta kẹ ahwo nọ a gbẹ rrọ ukoko re a hẹriẹ no ọrivẹ-orọo rai hi, enọ e rrọ Isẹri Jihova ha. Ebaibol na ọ ta nọ: “Otẹrọnọ oniọvo jọ o wo aye nọ ọ rrọ Oleleikristi hi, yọ o were aye na nọ ọ rẹ rria kugbei, jọ ọ nyasiọ aye na ba ha; yọ otẹrọnọ aye jọ o wo ọzae nọ ọ rrọ Oleleikristi hi, yọ o were ọzae na nọ ọ rẹ rria kugbei, jọ ọ nyasiọ ọzae riẹ ba ha.” (1 Ahwo Kọrint 7:12, 13) Isẹri Jihova a bi ru lele uzi Ebaibol nana.