Ebẹbẹ nọ I re Ru Omai Wo Ẹruore

“Evaọ edẹ urere na, oke obẹbẹ nọ o rẹ bẹ ẹria o te jọ.”​—2 TIMOTI 3:1.

KỌ WHỌ rehọ ẹro ruẹ hayo yo kpahe ọkpọ ebẹbẹ nọ ma be te fodẹ evaọ obotọ na no?

● Okpẹyao jọ nọ o du lahwe o kpe ahwo buobu gbidi gbidi.

● Ohọo ogaga jọ nọ u mu u kpe ahwo buobu.

● Otọ nọ u nuhu o raha iwou buobu je kpe idu ahwo buobu.

Whọ te jọ emagazini nana ruẹ eware jọ nọ i wuzou nọ u fo nọ whọ rẹ riẹ kpahe eware nana nọ e be via na. Whọ te jẹ ruẹ nọ Ebaibol na ọ ruẹaro no vẹre inọ eware itienana e te via evaọ etoke nọ a se “edẹ urere.”a

Orọnikọ ma kere emagazini nana re whọ ruẹse riẹ nọ ebẹbẹ e da oria kpobi fia ha, keme whẹ omara whọ be rọ ẹro ruẹ ebẹbẹ na. Rekọ ma kere iei re u fiobọhọ kẹ owhẹ wo ẹruore. Whọ te ruẹ epanọ eware ezeza jọ nọ Ebaibol ọ ruẹaro rai e be rọ via nẹnẹ, onọ u dhesẹ nọ “edẹ urere na” i ti kuhọ kẹle. Rekọ eme nọ ahwo jọ a ta kpahe eware nana i dhesẹ nọ a rọwo ho inọ edẹ urere na ma rrọ na. Fikiere whọ te jọ emagazini nana ruẹ eme itienana jọ gbe ẹjiroro nọ ma rọ riẹ nọ eware i ti woma kẹle.

[Ẹme-Obotọ]

Eruẹaruẹ 1. Etọ nọ I bi Nuhu

“Etọ i ti nuhu gaga.”—LUK 21:11.

● Nọ otọ u nuhu evaọ orẹwho jọ nọ a re se Haiti, utu ahwo etẹlẹvishọno jọ nọ a rrọ oria na be niyẹrẹ kpahe oware nọ o via na a te yo edo ọmọ jọ nọ o bi dimẹ evaọ otọ eware nọ i kie ruru iei. Winnie họ odẹ ọmọtẹ ọsese nana, yọ ọ jọ oware wọhọ ukpe ovo gbe emerae ezeza. Otọ nọ u nuhu na u kpe ọsẹgboni riẹ no, ọye ọvo ọ zọ.

EWARE NỌ E BE VIA Evaọ amara Ọvo ọrọ ukpe 2010, otọ u nuhu gaga evaọ Haiti, nọ u kpe ahwo idu egba esa (300,000). Yọ ahwo nọ a bu te ima ọvo gbe idu egba esa (1,300,000) ae otọ nọ u nuhu na o raha iwou rai, fikiere a gbe wo iwou nọ a rẹ rria ha. Otọ nọ u nuhu evaọ Haiti na o jọ gaga, rekọ etẹe ọvo otọ o jọ nuhu ga te ere he. No umuo Ane 2009 rite Ane 2010, o tẹ kawo, asia ikpegberee etọ i nuhu gaga evaọ eria sa-sa akpọ na.

ẸME NỌ AHWO JỌ A TA Orọnikọ etọ i bi nuhu enẹna vi epaọ anwẹdẹ hẹ; ẹriẹ ma be riẹ kpahe ai vi epaọ anwẹdẹ fiki eware sa-sa nọ ahwo-akpọ a ku no enẹna.

KỌ ERE O GINẸ RRỌ? Roro kpahe ẹme nana: Orọnikọ unu etọ nọ i ti nuhu oye Ebaibol ọ tẹrovi hi. Oware nọ Ebaibol ọ ta họ, “no oria ruọ oria” evaọ akpọ na, “etọ i ti nuhu gaga.” Yọ etọ nọ i bi nuhu na i dhesẹ vevẹ nọ edẹ urere na ma rrọ na.—Mak 13:8; Luk 21:11.

ẸVẸ WHO RORO? Kọ etọ nọ i bi nuhu e be ginẹ jọ gaga wọhọ epanọ Ebaibol ọ ruẹaro riẹ no vẹre na?

Uzẹme riẹ họ, orọnikọ etọ nọ i bi nuhu ọvo họ oware nọ u dhesẹ nọ edẹ urere na ma rrọ họ. Rekọ e rrọ usu eware nọ Ebaibol na ọ ruẹaro rai vẹre inọ e te via. Joma ta kpahe oware avivẹ.

[Ẹme nọ a fi ẹgba họ]

Etọ egaga nọ i bi nuhu na i bi ru nọ uye o be rọ bẹ ahwo gaga.​—KEN HUDNUT, U.S. GEOLOGICAL SURVEY.

[Ọnọ o wo Uwoho]

© William Daniels/​Panos Pictures

Eruẹaruẹ avọ 2. Ohọo nọ U bi Mu

“Ohọo u ti mu.”​—MAK 13:8.

● Ohọo ogaga nọ u je mu u ru nọ ọzae jọ ọ rọ kwa kpohọ iwhre jọ nọ a re se Quaratadji, evaọ obọ Niger. Inievo-emezae gbe emetẹ riẹ gbe imoni riẹ efa jọ a no ugbothabọ jọ ze ti kuomagbei evaọ iwhre na fiki ohọo na. Rekọ obọnana, ọzae na ọ rrọ kugbe ai hi, ọyọvo goli ọ rehọ uto hwa otọ kiẹzẹ evaọ oria jọ. Kọ fikieme ọ rọ rrọ oria riẹ sa? Osu iwhre na nọ a re se Sidi ọ ta nọ: “Ọzae na ọ be sae kuọ uviuwou riẹ hẹ, u te ru nọ ohọo u bi ro kpe ai kẹdẹ kẹdẹ. Yọ fikinọ ọ be ruẹ e rai na oma o be vuọ ẹe gaga, oye ọ rọ dhugbẹ nya kpohọ oria nọ ọ gbẹ jọ ruẹ e rai hi na.”

EWARE NỌ E BE VIA A tẹ ghale ahwo nọ a rrọ akpọ na kpohọ abọ ihrẹ, abọvo rai ọ be ruẹ emamọ emu re kẹdẹ kẹdẹ hẹ. Whaọ unuakpọ mai na nọ a re se sub-Saharan Africa oware na o jọ mai yoma dede, keme a tẹ ghale ahwo na kpohọ abasa, abọvo ọ be ruẹ emu re he. Re ma sai wo otoriẹ ẹme na ziezi, roro kpahe oriruo jọ. Ma rehọ iẹe nọ ọsẹ, oni gbe ọmọ a rrọ uviuwou jọ. Otẹrọnọ imava ọvo emu nọ ọ riẹ o re te re, koyehọ ohwo jọ ọ te jọ eveva. Kọ ono ọ te jọ eveva na? Ọsẹ na? Oni na? Manikọ ọmọ na? Iviuwou buobu a wo ẹbẹbẹ otiọnana.

ẸME NỌ AHWO JỌ A TA Emu nọ o bi no eware nọ a kọ ze evaọ akpọ na o re te ohwo kpobi re. Oware nọ o gwọlọ kpobi họ, a rẹ daoma ghale emu na evaọ oghẹrẹ nọ ọ sai ro te ohwo kpobi.

KỌ ERE O GINẸ RRỌ? Ginọ uzẹme nọ enẹna ewhẹrẹ e be mai wo emu no eware nọ a be kọ ze vi epaọ anwẹdẹ. Yọ u gine fo nọ egọmeti ọ rẹ riẹ epanọ ọ rẹ rọ ghale emu na evaọ oghẹrẹ nọ ohọo u gbe ro kpe ohwo ọvo ho. Rekọ a be sai ru ere he ghelọ epanọ a daoma te no anwọ ikpe nana kpobi ze na.

ẸVẸ WHO RORO? Kọ eruẹaruẹ nọ e rrọ obe Mak 13:8 na i bi gine rugba nẹnẹ? Ghelọ epanọ ahwo-akpọ a wo onaa nọ a bi ro ku eware te na, kọ whọ sai ginẹ ta nọ ohọo u gbe bi kpe ahwo evaọ akpọ na soso ghele?

Etọ nọ i bi nuhu gbe ohọo nọ u bi mu o be wha ẹbẹbẹ ọfa jọ ze, yọ ẹbẹbẹ yena ọ rrọ usu eware nọ Ebaibol ọ ruẹaro rai inọ e te via evaọ edẹ urere na.

[Ẹme nọ a fi ẹgba họ]

“A tẹ ghale emọ nọ ẹyao-irue, ẹyao eva-ikuo, gbe oghẹrẹ eyao efa i bi kpe kpohọ abasa, enọ e hae zọ evaọ usu rai a hae vrẹ abọvo, o hae jọ nọ a be ruẹ emu re ziezi.”​—ANN M. VENEMAN, ỌNỌ Ọ JỌ OSU UKOKO JỌ NỌ A RE SE UN CHILDREN’S FUND.

[Ọnọ o wo Uwoho]

© Paul Lowe/​Panos Pictures

Eruẹaruẹ avọ 3. Ikpeyao

“Ikpeyao . . . e te jọ.”​—LUK 21:11.

● Evaọ orẹwho Africa jọ nọ eware e jọ tahaku fiki ẹmo nọ a jariẹ fi, ọbo-imu jọ nọ a re se Bonzali ọ jẹ daoma epanọ o re ro siwi ezae ẹwho riẹ jọ nọ ẹyao jọ nọ a re se Marburga nọ o du lahwe o kru. Ezae nana yọ ahwo nọ a rẹ tọ otọ gwọlọ eware eghaghae, wọhọ igoru. Rekọ oware na o ga vi ọbo-imu nana abọ, fikiere o te bo se ebo-imu nọ e rrọ okpẹwho ologbo ọfa jọ re a nyaze ti fiobọhọ kẹe, rekọ a nyaze he. Nọ emera ene e vrẹ no ahwo na a tẹ nyaze, rekọ oke yena yọ Bonzali o whu no keme ẹyao Marburg na o vo ro ẹe uwhremu na, o te kpei.

EWARE NỌ E BE VIA Ẹyao-irue, ẹyao eva-ikuo, Aids, ẹyao owọre ogaga, gbe uliaro e rrọ usu eyao nọ i bi kpe ahwo gaga nẹnẹ na. Evaọ ukpe jọ kẹle na, eko eyao isoi nana i kpe ahwo nọ a bu te oware wọhọ ima ikpe gbe idu egba ihrẹ (10,700,000). Koyehọ evaọ emaharo esa kpobi evaọ ẹgbukpe na, ọjọ evaọ usu eyao nana o kpe ohwo jọ.

ẸME NỌ AHWO JỌ A TA Ahwo a bi dhe ebuebu evaọ akpọ na, fikiere eyao e rẹ sai dhe ebuebu re.

KỌ ERE O GINẸ RRỌ? Ahwo a gine bu akpọ na vi epaọ anwẹdẹ no. Rekọ enẹna ahwo-akpọ a mae riẹ epanọ a re ro vuhu oghẹrẹ ẹyao nọ ohwo ọ be mọ, ru epanọ o gbe ro vo ro amọfa ha, gbe epanọ a re ro siwi ei. Fikiere u fo nọ ahwo nọ a be mọ a re gbe bu te epanọ a rrọ na ha. Rekọ ahwo nọ a be mọ a bi dhe ebuebu.

ẸVẸ WHO RORO? Kọ ikpeyao e be ginẹ lahiẹ ahwo wọhọ epanọ Ebaibol ọ ruẹaro riẹ na?

Etọ nọ i bi nuhu, ohọo nọ u bi mu, gbe ikpeyao i bi kpe ahwo buobu gbidi gbidi evaọ akpọ na. Rọkẹ amọfa jọ, ahwo-akpọ ibe rai nọ u fo nọ a rẹ thọ ae jẹ rẹrote ae, ae a be kẹ ae uye je kpe ai ukpe-iyẹ. Fikiere joma ta kpahe oware ofa jọ nọ Ebaibol na ọ ruẹaro riẹ nọ o te via evaọ obaro.

[Ẹme-Obotọ]

[Ẹme nọ a fi ẹgba họ]

“O rẹ kẹ uye gaga nọ arao ojihẹ wọhọ okpohrokpo o te kpe ohwo. Yọ ere ọvona o rẹ kẹ uye re nọ amara ọsese jọ gheghe ọ tẹ wha ẹyao họ ohwo oma je kpei no. Yọ onọ o mai tube yoma họ, nọ ẹyao na o te bi vo ruọ amọfa je bi kpe ai.”​—MICHAEL OSTERHOLM NỌ O WUHRẸ KPAHE EYAO NỌ I RE VO.

[Ọnọ o wo Uwoho]

© William Daniels/​Panos Pictures

Eruẹaruẹ avọ 4. Ahwo A Wo Uyoyou kẹ Ibe Ahwo-Akpọ Rai Hi

“Ahwo . . . a ti wo uyoyou kẹ ibe ahwo-akpọ rai hi.”​—2 TIMOTI 3:1-3.

● Chris yọ ohwo jọ evaọ obọ Wales nọ o re ru iruo evaọ ọfisi jọ nọ a rẹ jọ fiobọhọ kẹ ahwo nọ ahwo uviuwou rai a kpe ukpe igbabọ hayo ru oware uyoma ofa jọ. Chris ọ ta nọ: “Mẹ kareghẹhọ nọ ẹdẹjọ nọ aye jọ nọ mẹ riẹ ọ nyaze ọfisi mai me vuhu rie he fiki ukpe-iyẹ nọ a kpe rie evaọ obọ uwou. Yọ u wo eyae efa jọ nọ a rẹ lahiẹ evaọ obọ uwou te epanọ a re ro rri omarai nọ a fioka ha, fikiere a tẹ nyaze a rẹ sae kpare ovao dede he fiki omovuọ.”

EWARE NỌ E BE VIA Evaọ orẹwho Africa jọ, a tẹ ghale eyae na kpohọ abasa, abọvo rai yọ ahwo nọ a lele wezẹ hayo nọ a ru oware obẹlẹ jọ kẹ evaọ okenọ a jọ emaha. Evaọ orẹwho yena ovona, a nọ ezae na epanọ a rri ukpe nọ ọzae o re kpe aye riẹ. Abọvo abasa ezae na a ta nọ oware ovo o thọ họ re ọzae o kpe aye riẹ. Rekọ, orọnikọ eyae ọvo oware utionana o be via kẹ hẹ. Wọhọ oriruo, evaọ obọ Canada, a tẹ ghale ezae nọ e rrọ orẹwho na kpohọ abọ akpe, enwenọ abasa rai yọ ahwo nọ eyae rai i kpe ukpe igbabọ, ku eka họ oma, hayo ru oware uyoma utioye ofa jọ no.

ẸME NỌ AHWO JỌ A TA Nẹnẹ ezae-avọ-eyae gbe ahwo uviuwou efa a mu ohwohwo họ ẹhọre he. Oware na họ, enẹna a be mae ta ẹme kpahe iẹe vi epaọ anwẹdẹ.

KỌ ERE O GINẸ RRỌ? Uzẹme o ginẹ rrọ inọ enẹna a be mae ta kpahe ohọre ezae-avọ-eyae. Rekọ, ghelọ epanọ a be ta kpahe iẹe te na, kọ ezae-avọ-eyae a siọ ohọre ba no? Vievie. Ukpoye enẹna o be mai yoma dede. Ahwo uviuwou a gbe bi dhesẹ uyoyou kẹ ohwohwo ho.

ẸVẸ WHO RORO? Kọ eruẹaruẹ nọ e rrọ 2 Timoti 3:1-3 i bi rugba nẹnẹ? Kọ whọ sai muẹrohọ no inọ ahwo uviuwou a gbe bi dhesẹ uyoyou kẹ omoma rai hi wọhọ epanọ u fo nọ o rẹ jọ?

Eruẹaruẹ avisoi nọ i bi rugba nẹnẹ họ, enọ e ta kpahe oghẹrẹ nọ ahwo a ti ru otọakpọ na. Joma rri oware nọ Ebaibol na ọ ta kpahe iẹe.

[Ẹme nọ a fi ẹgba họ]

“Eyae buobu a rẹ kake ta via ha inọ ezae rai i bi kpe ae. A te kele iei, whọ rẹ ruẹ nọ re aye ọ tẹ te vuẹ iporisi, yọ ọzae riẹ o kpe rie te oware wọhọ isia ọgbagbisoi soso no.”​—AYE JỌ NỌ Ọ RRỌ ỌTOTA KẸ ỌFISI OBỌ WALES JỌ NỌ A RẸ JỌ FIOBỌHỌ KẸ AHWO NỌ EZAE RAI I KPE.

Eruẹaruẹ avọ 5. A be Raha Otọakpọ Na

“[Ọghẹnẹ ọ te] raha enọ e be raha otọakpọ na.”​—EVIAVIA 11:18.

● U wo ọzae jọ nọ a re se Pirri nọ ọ rẹ bọo egọ evaọ iwhre Nigeria jọ nọ a re se Kpor. Ọyẹle nọ o hwẹ evaọ oborai o te su ruọ oria nọ ọ rẹ jọ bọo egọ na, jẹ raha okọ ku ei. Ọzae na ọ ta nọ: “Ọyẹle na ọ raha iko-ame mai je kpe iyei nọ e rrọ eva rai no, o be raha ovioma mai, yọ obọnana me gbe wo okọ họ.”

EWARE NỌ E BE VIA Egba-eriariẹ jọ e ta nọ ezuzu nọ o bi su ruọ abade na kukpe kukpe o bu wo umuo ho. A tẹ wawo iẹe, ọ rẹ gbẹdẹ vi ekpa isimeti ima ẹgba ọvo (100,000,000). Yọ a ta nọ a tẹ ghale ezuzu na kpohọ abava, abọvo soso enwenọ irọba ọvo, enọ e rẹ kaki gbo ho. U te no ẹraha nọ ahwo a be raha otọakpọ na no, a be rehọ eware nọ Ọghẹnẹ ọ ma fihọ iẹe, wọhọ ire, ọyẹle, gbe eware itieye na efa ro ruiruo vrẹta. Fikiere eware na i te bi re vẹrẹ vrẹ epanọ o hae jọ. Ekiakiẹ jọ nọ a ru i dhesẹ nọ re otọakpọ na o tẹ sae wariẹ wo eware nọ a jọ eva riẹ ro ruiruo evaọ ukpe ovo, o rẹ rehọ iẹe ukpe ovo gbe emerae isoi. Obe-usi obọ Australian jọ nọ a re se Sydney Morning Herald o ta nọ: “Ahwo nọ a rrọ akpọ na a te gbe bi vihọ jẹ be rehọ eware nọ Ọghẹnẹ ọ ma fihọ otọakpọ na ruiruo vrẹta wọhọ epanọ a bi ru obọnana, je ru ere rite ukpe 2035, o te gwọlọ nọ ma wo otọakpọ ọfa kugbe ọnana, o gbẹ rrọ ere he eware nọ Ọghẹnẹ ọ ma fihọ iẹe na e gbẹ te sai te kẹ omai hi.”

ẸME NỌ AHWO JỌ A TA Ahwo-akpọ a wo areghẹ gaga. Ae ọvo a riẹ epanọ a re ro ku ẹbẹbẹ nana họ a vẹ ruẹrẹ otọakpọ na fihọ epanọ ọ jọ vẹre.

KỌ ERE O GINẸ RRỌ? Ahwo jọ nọ a bi ru ekiakiẹ gaga, a be hae vẹvẹ ahwo unu kpahe epanọ eware nọ a bi ru e be raha otọakpọ na te. Rekọ ahwo a gbe bi ru eware nana ghele, yọ e be raha otọakpọ na vrẹ ọvo.

ẸVẸ WHO RORO? Kọ o ginẹ gwọlọ nọ Ọghẹnẹ o ru oware jọ rọ ruẹrẹ otọakpọ na wọhọ epanọ ọ ya eyaa riẹ na?

Whaọ u te no eruẹaruẹ isoi nọ ma ta ẹme kpahe no na, Ebaibol na ọ ruẹaro kpahe emamọ eware jọ nọ e te via evaọ edẹ urere na. Joma ta kpahe ọvo rai jọ.

[Ẹme nọ a fi ẹgba họ]

“Ọgbọ owowoma me wo vẹre. Rekọ obọnana, ọgbọ na ọ wọhọ oria nọ a re ku eware nọ e rẹ nua ahwo kpe fihọ.”​—ERIN TAMBER, NỌ ỌZAE JỌ NỌ Ọ BE RRIA ORIA JỌ EVAỌ AMERICA NỌ Ọ BE TA KPAHE EPANỌ ỌYẸLE NỌ O HWẸ NO ORIA JỌ MEXICO ZE EVAỌ UKPE 2010 Ọ RỌ RAHA ỌGBỌ RIẸ.

[Ẹkpẹti]

Kọ Ọghẹnẹ Ọ be Whae Ze?

Nọ orọnọ Ebaibol na ọ ta nọ eware iyoma nọ ma be ruẹ nẹnẹ na e ta via na, kọ oyena u dhesẹ nọ Ọghẹnẹ ọ be whae ze? Kọ ọye o bi ru nọ ma be rọ ruẹ uye? Whọ sae ruẹ iyo enọ yena evaọ uzou avọ 11 obe na, Eme Ebaibol na O Gine Wuhrẹ? nọ Isẹri Jihova a kere.

[Ọnọ o wo Uwoho]

U.S. Coast Guard photo

Eruẹaruẹ avọ 6. A be Ta Usi Uwoma na Evaọ Akpọ na Soso

“A te ta usi uwoma Uvie na evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.”​—MATIU 24:14.

● Aye jọ nọ a re se Vaiatea ọ be rria ukoliko jọ nọ u siomano nọ abade Pacific ọ wariẹ họ. Ukoliko nana o rrọ ruaro gaga, rekọ ahwo nọ a be rriae a tulo ho. Ghele epanọ oria nọ aye nana ọ be rria u siomano te na, Isẹri Jihova a nyaze te ta usi uwoma kẹe avọ ahwo nọ a gbẹ be rria oria na ghele. Fikieme? Keme Isẹri Jihova a gwọlọ nọ a rẹ ta usi uwoma Uvie na kẹ ohwo kpobi ghelọ oria nọ ọ be rria kẹ hẹ.

EWARE NỌ E BE VIA Oria kpobi evaọ akpọ na a be jọ ta usi uwoma na. Evaọ ukpe 2010 ọvo, Isẹri Jihova a rehọ euwa nọ i bu vrẹ ima-odu ọvo gbe ima egba ezeza (1,600,000,000) rọ ta usi uwoma na evaọ ekwotọ egba ivẹ gbe ọgbagbezeza (236). A tẹ ghale iẹe, koyehọ Osẹri Jihova kpobi ọ rehọ iminiti ọgba rọ ta usi uwoma kẹdẹ kẹdẹ. Evaọ ikpe ikpe nọ e vrẹ na, ebe nọ Isẹri Jihova a printi jẹ ghale kẹ ahwo i bu vrẹ ima-idu udhe (20,000,000,000).

ẸME NỌ AHWO JỌ A TA Nẹnẹ a mu usi uwoma họ ẹta ha. U te ikpe idu buobu no nọ ahwo a be rọ ta usi uwoma.

KỌ ERE O GINẸ RRỌ? Ginọ uzẹme nọ ahwo jọ a ta usi uwoma na no. Rekọ omoke kakao ọvo a ta usi uwoma na, yọ eria jọ ọvo a jọ tae re. Rekọ Isẹri Jihova a ru ọruẹrẹfihotọ nọ a be rọ ta usi uwoma na evaọ akpọ na soso, onọ u ru nọ ahwo buobu gbidi gbidi a ro yoi no. Isẹri Jihova a talamu iruo usi uwoma ota na ghelọ epanọ egọmeti gbe ikoko akpọ na jọ nọ i wo ẹgba jẹ geva gaga a bi kpokpo ai te.a (Mak 13:13) U te no ere no, a be hwa Isẹri Jihova osa fihọ usi uwoma nọ a be ta na ha. O make rrọ ere na, a be rehọ oke nọ a hai ro ru eware efa rọ ta usi uwoma na ghele. Yọ ọvọvẹ a rẹ rehọ ebe rai kẹ ahwo. Igho unevaze a bi ro ru iruo nana.

ẸVẸ WHO RORO? Kọ a be jọ akpọ na soso “ta usi uwoma Uvie na” nẹnẹ? Kọ eruẹaruẹ nana nọ i bi rugba na i dhesẹ nọ emamọ eware jọ e te via evaọ obaro?

[Ẹme-Obotọ]

[Ẹme nọ a fi ẹgba họ]

“Ma te gbẹ rọ oghẹrẹ kpobi ta usi uwoma Uvie na kẹ ahwo bẹsenọ Jihova ọ rẹ ta nọ u te no.”​—YEARBOOK ỌRỌ 2010.

Eware I ti Woma Kẹle Na!

“Omoke kakao ọvo u kiọkọ, ahwo omuomu na a gbẹ te jọ họ . . . Rekọ enọ e be romakpotọ na e te rọ otọakpọ na reuku, yọ eva e te were ae gaga fiki udhedhẹ nọ o dafia.”​—OLEZI 37:10, 11.

KỌ WHO bi rẹro oke nọ oria Ebaibol yena u ti ro rugba? Ababọ avro who bi rẹro riẹ. Yọ ma wo ẹjiroro sa-sa nọ ma rẹ rọ rọwo nọ oware yena o te via kẹle na.

Eware nọ ma ta kpahe no evaọ izoẹme nọ e vrẹ na yọ eruẹaruẹ Ebaibol sa-sa nọ i dhesẹ vevẹ nọ “edẹ urere na” ma rrọ na. (2 Timoti 3:1-5) Ọghẹnẹ ọ rehọ idibo riẹ ruẹaro kpahe eware yena re e sai ru omai wo ẹruore. (Ahwo Rom 15:4) Nọ orọnọ eware yena nọ a ruẹaro rai na i bi gine rugba na, ma riẹ nọ ebẹbẹ mai kpobi i ti kuhọ kẹle na.

Kọ eme ọ te via nọ edẹ urere na e tẹ vrẹ no? Uvie Ọghẹnẹ u ti mu ahwo-akpọ kpobi họ esuo. (Matiu 6:9) Roro kpahe eware jọ nọ Ebaibol ọ ta nọ e te via evaọ oke yena:

● Ohọo o gbẹ te jariẹ hẹ. “Emu ọ te dafia evaọ otọakpọ na; obọ ehru igbehru na o te vọ kpọhọhwẹ.”—Olezi 72:16.

● Ẹyao ọ gbẹ te jariẹ hẹ. “Ohwo ọvo nọ ọ be rria ẹkwotọ na nọ ọ te ta nọ, “Mẹ be mọ” ọ te jariẹ hẹ.”—Aizaya 33:24.

● A te ruẹrẹ akpọ na fihọ wowoma. “Udhude na avọ otọ oyaya na e te wereva, yọ udhude opraprara na o te ghọghọ jẹ whẹ idodo họ wọhọ ododo safrọn.”—Aizaya 35:1.

Enana yọ emeware jọ gheghe evaọ usu emamọ eware nọ Ebaibol ọ ta nọ e te via kẹle na. Kọ whọ gbẹ nọ Isẹri Jihova re a vuẹ owhẹ oware nọ u ro mu ae ẹro gaga inọ eware i ti gine woma kẹle na?