Ikọ na a koko ujaje Jesu na inọ a ta usi uwoma evaọ akpọ na soso. Evaọ ukpe 47 C.E., ilele nọ e jọ obọ Antiọk a te vi Pọl avọ Banabas kpohọ erẹ usi uwoma ota. Aimava na a rọ ajọwha ta usi uwoma na evaọ Dẹbi, Listra, gbe Aikoniọm, evaọ Esia Minor.

Pọl avọ Banabas a jẹ ta usi uwoma kẹ ohwo kpobi, te iyogbe te edafe, te emaha te ekpako. Ahwo buobu a te fi ẹrọwọ họ Jesu. Nọ Pọl avọ Banabas a jẹ ta usi uwoma kẹ Sẹjiọs Pọlọs osu ubrotọ Saiprọs, ọzae jọ nọ ọ rrọ ọgbẹva ọ tẹ jẹ gwọlọ whaha ae. Pọl ọ tẹ ta kẹ ọgbẹva na nọ: ‘Jihova ọ te rọ uye te owhẹ.’ Ẹsiẹvo na, ọzae na o te tuaro. Nọ Sẹjiọs Pọlọs osu ubrotọ na ọ ruẹ oware nọ o via na, o te zihe ruọ olele Jesu.

Pọl avọ Banabas a jọ oria kpobi ta usi uwoma na. A jẹ hae ta usi uwoma no uwou ruọ uwou, evaọ eki, evaọ edhere, gbe evaọ iwou-egagọ. Nọ a siwi ọzae jọ nọ ọ ko awọ evaọ Listra, ahwo nọ a ruẹ iruo igbunu nana a te je roro nọ Pọl avọ Banabas yọ eghẹnẹ, a tẹ gwọlọ gọ ai. Rekọ Pọl avọ Banabas a tẹ whaha ae bi bo kẹ ai nọ: ‘Ọghẹnẹ ọvo wha rẹ gọ! Mai yọ ahwo-akpọ gheghe.’ Ahwo Ju jọ nọ a nyaze a tẹ bẹbẹ ogbotu na họ re a kpe Pọl no. Fikiere ogbotu na a tẹ rọ itho fi Pọl je si ei ruọ otafe ẹwho na, bi roro nọ o whu no. Rekọ Pọl ọ gbẹ jọ uzuazọ! Inievo na a tẹ dhẹ ze te rehọ Pọl zihe kpobọ ẹwho na ababọ okioraha. Uwhremu na Pọl o te zihe kpobọ Antiọk.

Evaọ ukpe 49 C.E., Pọl ọ tẹ wariẹ kpohọ erẹ usi uwoma ota avivẹ. Nọ ọ nyae ruẹ Ileleikristi obọ Esia Minor no, ọ tẹ ta usi uwoma na te eria nọ i thabọ evaọ Europe. O kpobọ Athẹns, Ẹfisọs, Filipai, Tẹsalonika gbe eria efa. Saelas avọ Luk gbe Timoti a kuomagbe Pọl kpohọ erẹ na. A kuobọgbe Pọl jẹ to ikoko họ, yọ a fiobọhọ kẹ ahwo na gọ Ọghẹnẹ ziezi. Pọl ọ rria Kọrint te ẹgbukpe gbe emerae ezeza jẹ bọ inievo na ga. Ọ jẹ ta usi uwoma, wuhrẹ ahwo, yọ o kere ileta se ikoko buobu. Emehọ uwou-udhu Pọl ọ jẹ hai ko, re o wo ugho rọ rẹrote omariẹ. Nọ oke jọ o vrẹ no, Pọl o te zihe kpobọ Antiọk.

Evaọ ukpe 52 C.E., Pọl ọ tẹ wariẹ kpohọ erẹ usi uwoma ota avesa, yọ obọ Esia Minor o ro muhọ. O kpohọ eria nọ i thabọ wọhọ Filipai gbe Kọrint. Pọl ọ rria obọ Ẹfisọs ikpe buobu; o wuhrẹ ahwo, o siwi ahwo, yọ o fiobọhọ kẹ ukoko na gaga. Ọ jẹ hae kẹ ovuẹ evaọ ọgwa isukulu ẹwho na kẹdẹ kẹdẹ. Ahwo buobu nọ a gaviezọ kẹ Pọl a kurẹriẹ. Nọ ọ ta usi uwoma evaọ erẹwho buobu no, Pọl o te zihe kpobọ Jerusalẹm.

Odibo-ọmọtẹ jọ nọ ẹzi ogbegbe ọ jọ oma ọ jẹ rria ẹwho Filipai. Ẹzi ogbegbe na ọ jẹ kẹ ọmọtẹ na ogaga nọ ọ rẹ rọ ruẹaro, yọ ọ jẹ hae kọ igho buobu kẹ ilori riẹ. Ọmọtẹ na o je lele Pọl avọ Saelas emuemu edẹ buobu nọ a ziọ Filipai. Ẹzi ogbegbe na ọ jẹ lẹliẹ ọmọtẹ na bo lele ai nọ: “Ezae nana yọ idibo Ọghẹnẹ nọ Ọ Mai Kpehru na.” Uwhremu na Pọl ọ tẹ ta kẹ ẹzi ogbegbe na nọ: ‘Mẹ rehọ odẹ Jesu ta kẹ owhẹ nọ, noi oma no!’ Ẹzi ogbegbe na o te no ọmọtẹ na oma.

Nọ ilori riẹ a ruẹ nọ oware nọ o jẹ wha ugho se ai o gbẹ riẹ hẹ, eva e tẹ dhae gaga. A tẹ rehọ Pọl avọ Saelas bru isu ẹwho na, a tẹ ta nọ: ‘Ezae nana a be thọ uzi, yọ a be wha ozighi fihọ ẹwho na soso!’ Isu ẹwho na a tẹ ta nọ a fa Pọl avọ Saelas, je fi ai họ uwou-odi. Oriekarọ na o te fi ai họ abọ nọ ọ mai muebi evaọ obeva uwou-odi na kpobi, jẹ kare awọ rai fihọ ure.

Pọl avọ Saelas a te mu ile họ ẹso bi jiri Jihova, yọ amọfa nọ a jọ uwou-odi na a jẹ gaviezọ. Idudhe na evaọ udevie aso, otọ u te nuhu gaga, uwou-odi na soso u te nuhu. Ethẹ na kpobi e tẹ nwani rovie fihọ, eware nọ a rọ kare ahwo na kpobi e tẹ sawo no. Oriekarọ na ọ tẹ họrọ ruọ uwou-odi na, jẹ ruẹ ethẹ na kpobi nọ i rovie fihọ. Fikinọ o je roro nọ ahwo nọ a jọ uwou-odi na kpobi a dhẹ no, o te wolo ọgbọdọ riẹ re o kpe omariẹ no.

Pọl o te bo kẹe nọ: ‘Who kpe omara ha! Mai kpobi ma rrọ etenẹ!’ Oriekarọ na ọ tẹ dhẹ bru Pọl avọ Saelas, o te kigwẹ fihọ aro rai. Ọ tẹ nọ ae nọ: “Eme me re ru hrọ re mẹ sai wo esiwo?” A tẹ ta kẹe nọ: ‘Whẹ avọ uviuwou ra wha fi ẹrọwọ họ Jesu.’ Pọl avọ Saelas a te wuhrẹ iẹe avọ uviuwou riẹ Ẹme Jihova, oriekarọ na avọ uviuwou riẹ kpobi a tẹ họ-ame.

Timoti yọ oniọvo ọmọzae nọ ọ jọ ukoko obọ Listra. Ọsẹ riẹ ohwo Griki, rekọ oni riẹ ohwo Ju. Odẹ oni riẹ Yunisi, yọ odẹ oni-ode riẹ Lọis. Aimava na a wuhrẹ Timoti kpahe Jihova no emaha ze.

Nọ Pọl o kpohọ Listra evaọ erẹ usi uwoma ota avọ ivẹ riẹ, o te muẹrohọ nọ Timoti o you inievo na gaga, yọ ọ gwọlọ fiobọhọ kẹ ae. Pọl ọ tẹ ta kẹ Timoti nọ o lele iei kpohọ erẹ usi uwoma ota riẹ. Ẹmẹrera na, Pọl o te wuhrẹ Timoti epanọ a rẹ ta usi uwoma je wuhrẹ ahwo ziezi.

Ẹzi ọfuafo na ọ jẹ kpọ Pọl avọ Timoti evaọ oria kpobi nọ a jẹ nya. Evaọ aso ẹdẹ jọ, Pọl ọ tẹ jọ eruẹaruẹ ruẹ ọzae jọ nọ ọ be ta kẹe nọ ọ nyaze obọ Masidonia ti fiobọhọ kẹ ai. Fikiere Pọl, Timoti, Saelas, gbe Luk a te kpobọ Masidonia nyae ta usi uwoma jẹ to ikoko ekpokpọ họ.

Evaọ okpẹwho Masidonia jọ nọ a re se Tẹsalonika, ezae gbe eyae buobu a zihe ruọ ilele Jesu. Rekọ ahwo Ju jọ a tẹ jẹ re Pọl avọ inievo na ihri. Ahwo Ju na a te koko ahwo buobu họ re a wha ozighi fihọ ẹwho na, a tẹ rehọ inievo na bru isu okpẹwho na be ta nọ: ‘Ezae nana a be wọso egọmeti Rom!’ Fikinọ ahwo na a gwọlọ kpe Pọl avọ Timoti no, aimava a tẹ dhẹ kpobọ Bẹria evaọ aso.

Ahwo Bẹria a gaviezọ ziezi kẹ usi uwoma na, fikiere te ahwo Griki te ahwo Ju a te zihe ruọ ilele Jesu. Rekọ nọ ahwo Ju jọ a no obọ Tẹsalonika ze, a tẹ bẹbẹ ahwo ẹwho na họ re a ru ozighi, fikiere Pọl o te kpobọ Athẹns. Rekọ Timoti avọ Saelas a tẹ daji obọ Bẹria re a bọ inievo na ga. Nọ oke jọ o vrẹ no, Pọl ọ tẹ ta kẹ Timoti nọ o zihe kpobọ Tẹsalonika nyae tuduhọ inievo na awọ, re a sai thihakọ ukpokpoma ogaga nọ a jẹ rẹriẹ ovao dhe evaọ obei. Uwhremu na, Pọl o te vi Timoti kpohọ ikoko buobu re ọ tuduhọ ai awọ.

Pọl ọ ta kẹ Timoti nọ: ‘Ahwo kpobi nọ a gwọlọ gọ Jihova a ti kpokpo ai.’ A kpokpo Timoti je fi ei họ uwou-odi fikinọ o fi ẹrọwọ họ Jesu. Rekọ eva e jẹ were iẹe keme ọ riẹ nọ ọ be gọ Jihova.

Pọl ọ ta kẹ inievo obọ Filipai nọ: ‘Me bi vi Timoti bru owhai ze. O ti wuhrẹ owhai oghẹrẹ nọ u fo nọ a rẹ gọ Ọghẹnẹ, je wuhrẹ owhai epanọ a rẹ ta usi uwoma na.’ Pọl ọ riẹ nọ ọ rẹ sai fievahọ Timoti. Aimava a jọ egbẹnyusu, yọ a ta usi uwoma na kugbe evaọ ikpe buobu.

Nọ Pọl o no erẹ usi uwoma ota avesa riẹ ze, o te kpobọ Jerusalẹm. A tẹ jọ obọ Jerusalẹm mu ei fihọ uwou-odi. Evaọ aso ọ tẹ ruẹ eruẹaruẹ nọ Jesu ọ jọ ta kẹe nọ: ‘Who ti kpobọ Rom nyae ta usi uwoma.’ A tẹ rehọ Pọl no Jerusalẹm kpobọ Sisaria, ọ tẹ rria uwou-odi ikpe ivẹ evaọ obei. Nọ Fẹstọs osu Sisaria ọ jẹ rehọ Pọl gu ẹdhọ, Pọl ọ tẹ ta kẹe nọ: ‘Mẹ kpare ẹdhọ mẹ bru Siza.’ Fẹstọs ọ tẹ ta nọ: “Siza whọ kpare ẹdhọ ra bru; yọ obọ Siza whọ te nya.” A te fi Pọl họ okọ nọ u bi kpobọ Rom, inievo ivẹ jọ nọ a re se Luk gbe Aristakọs a te lele iei.

A bi te oria jọ no, ofou ọgaga o te muhọ efou evaọ abade na, yọ ofou na o fou edẹ buobu. Aikpobi nọ a jọ okọ na a je roro nọ a ti whu. Rekọ Pọl ọ tẹ ta kẹ ai nọ: ‘Ezae, ukọ-odhiwu jọ ọ ta kẹ omẹ evaọ ewezẹ nọ: “Ozọ u mu owhẹ hẹ, Pọl. Who ti te Rom, yọ ahwo kpobi nọ a rrọ okọ na kugbe owhẹ a te zọ.” Wha kru udu ga! Ma ti whu hu.’

Ofou ọgaga na o fou te edẹ ikpegbene (14) soso. Uwhremu na a tẹ te ruẹ okpa. Okpa na yọ ukoliko nọ a re se Mọlta. Nọ a bi te oria nọ uwẹkpẹ u kokohọ evaọ abade na, a te bi okọ na ruọ ehru uwẹkpẹ na, rekọ fiki ẹkporo ọgaga nọ ọ jẹ tehe okọ na, o tẹ bẹre ibribro. Ahwo egba ivẹ gbe udhosa gbe ikpegbezeza (276) nọ a jọ okọ na a zọ. Ejọ e ya ame, efa i te kru ewẹ-ekpala okọ na te okpa. Ahwo Mọlta a rẹrote ai ziezi, a te koko erae họ kẹ ai re a rria.

Emerae esa e vrẹ no, isoja na i te fi Pọl họ okọ ofa nọ u bi kpobọ Rom. Nọ a te obei, inievo na a tẹ nyaze te ruẹ Pọl. Nọ Pọl ọ ruẹ inievo na, o te yere Jihova je kru udu ga. Dede nọ Pọl yọ ohwo nọ a mu, a kẹ riẹ uvẹ re ọ rria uwou obọ riẹ nọ ọ haya, rekọ isoja a je rroro iei. Ọ rria etẹe ikpe ivẹ soso. Ahwo a jẹ nyabru Pọl ze, yọ ọ jẹ ta usi uwoma kẹ ai kpahe Uvie Ọghẹnẹ, je wuhrẹ ai kpahe Jesu. Pọl o je kere ileta se ikoko nọ e jọ Esia Minor, gbe Judia. Jihova ọ ginẹ rehọ Pọl ta usi uwoma kẹ ahwo erẹwho na.