Nọ o je su igodẹ ẹdẹjọ, Mosis ọ tẹ ruẹ oware igbunu jọ—etuetue nọ erae e be jọ ware, rekọ “ọ be tua ha.” (Owọ avọ 2) O te go kẹle re ọ ruẹ oware nọ o be via na. Jihova ọ tẹ rọ ẹkwoma ukọ-odhiwu tẹme kẹ Mosis no udevie erae na ze inọ: “Who bi kẹle he; si eviẹ ra no awọ ra, keme oria nọ who dikihẹ na otọ ọrẹri.” (Owọ avọ 5) Roro epanọ onana u gbunu te—fikinọ urru Ọghẹnẹ ọrẹri na u no etuetue na ze, otọ na omariẹ o tẹ jọ ọrẹri!

Ohrọoriọ Ọghẹnẹ o lẹliẹ omai wo ẹruore. Avọ obufihọ riẹ, mai ahwo-akpọ nọ e gba ha ma rẹ sae jọ fuafo ẹkwoma ekoko itee ikiẹrẹe riẹ, onọ o rẹ whae ze nọ ọ rẹ rọ jẹ omai rehọ. (1 Pita 1:15, 16) Aye Oleleikristi jọ nọ elọhoma gbe ọkora e jọ oma o wo omosasọ rono ikuigbe Mosis ọrọ etuetue nọ ọ jẹ ware erae na ze. Ọ ta nọ: “Otẹrọnọ Jihova ọ sai ru ẹkpẹ gheghe ọrẹri, koyehọ umutho ẹruore jọ ọ gbẹ rrọ kẹ omẹ. Eroro kpahe onana u fi obọ họ kẹ omẹ gaga no.”